Klei Aê Diê Blŭ: II Klei Yăl Dliê 26:16-23
Êlan kliăng: “Yêhôwa bi êmut kheh kơ phung mâo ai tiê mgao, brei ih thâo sĭt diñu amâo srăng tlaih kơ klei bi kmhal ôh” (Klei Bi Hriêng 16:5).
Klei êmuh ksiêm mĭn: Si ngă phung khua ngă yang ghă leh Mtao Y‑Usia? Si ngă ñu lŏ bi kdơ̆ng wĭt? Ya jing boh kơ klei anăn? Si ngă knuih brei drei mâo tơdah mâo klei arăng ƀuah kơ klei soh drei ngă leh hlăm klei hdĭp?
Aê Diê bŏ hŏng klei pap, brei nanao mmông myun kơ mnuih soh kmhal kơ klei soh leh anăn lui hĕ klei soh. Aê Diê brei leh kơ Mtao Y‑Usia mmông myun čiăng ñu weh đuĕ mơ̆ng klei ngă soh hŏng klei yua khua ngă yang prŏng Y‑Asaria leh anăn sapăn pluh čô phung khua ngă yang nao mbĭt mblang kơ ñu klei dưi ngă leh anăn amâo dưi ngă, ghă ñu myơr mnơ̆ng ƀâo mngưi kơ Aê Diê. Diñu brei mtao kbiă mơ̆ng adŭ doh jăk, Aê Diê amâo srăng brei klei jăk jĭn ôh kơ ñu kyua bruă anei. Tui si djŏ ñu srăng gưt kơ klei phung khua ngă yang kčĕ leh anăn kbiă đuĕ mơ̆ng Sang kkuh mpŭ, ƀiădah lĕ Mtao Y‑Usia lŏ bi kdơ̆ng wĭt msĕ si sa čô mnuih mluk, bi êmut kơ klei thâo mĭn leh anăn klei bi hriăm (Klei Bi Hriêng 1:7). Ñu ngêñ kyua čôñ kơ klei arăng kčĕ kơ ñu, ñu dôk djă sa boh mtĭl pui čiăng čuh mnơ̆ng ƀâo mngưi, ăt ngă tui si klei ñu pô čiăng. Êjai ñu dôk ngêñ kơ phung khua ngă yang snăn ñu djŏ phŭng ti adhei. Phung khua ngă yang ƀuh klei anăn, digơ̆ suôt ñu đuĕ kơ tač mtam. Hlăk anăn ñu amâo lŏ ngă klei khăng kŏ ôh ƀiădah ñu pô ăt “kbiă hŏng klei ruăt mơh” kyuadah ñu thâo Aê Diê yơr kngan bi kmhal ñu leh. Mâo mnuih ngă soh hŏng Aê Diê ƀiădah knŏng hjăn ñu pô hŏng Aê Diê yơh thâo kơ ñu dôk tŭ klei mkra mjuăt. Tinei, jih jang mnuih ƀuh sơăi klei Aê Diê bi kmhal mtao, kyua klei soh mgao ñu kjham snăk leh anăn čiăng ngă klei bi hmô kơ pô mkăn mơh.
Ñu djŏ phŭng leh anăn bi ktlah dôk mdê hŏng phung ƀuôn sang hlăm sa boh sang hjăn leh anăn amâo lŏ dưi nao kơ Sang kkuh mpŭ ôh hlŏng kơ ñu djiê (Bruă Lêwi 13:46; II Bruă Mtao 15:5). Wăt tơdah ñu dưi ngă lu bruă jăk kơ ala čar dưn (II Klei Yăl Dliê 26:4-15) ƀiădah arăng amâo dơr ñu hlăm msat pioh kơ phung mtao ôh, ƀiădah knŏng dơr ti sa bĭt anôk giăm hŏng anôk anăn, jing lăn phung mtao, kyuadah ñu jing sa čô mnuih “djŏ phŭng”. Mơ̆ng sa čô mnuih Aê Diê brei dôk dơ̆ng ti čŏng klei guh kơang, klei hing ang ñu arăng hmư̆ kbưi, ară anei ñu hdĭp hŏng klei hêñ, bi luč jih jang mnơ̆ng, amâo lŏ kiă kriê ñu pô ôh, jih jang mnuih ñĕ đuĕ, arăng dơr ñu tui si klei bhiăn dơr mnuih djŏ phŭng.
Tui si djŏ, tơdah ñu gưt klei phung khua ngă yang ghă snăn ñu srăng mâo klei Khua Yang pap brei leh anăn amâo mâo klei truh kơ ñu ôh. Ƀiădah ai tiê mgao ngă kơ ñu amâo lŏ mâo klei uêñ ôh, amâo uêñ ôh kơ klei bhiăn Aê Diê, bi êmut kơ klei phung khua ngă yang kčĕ, snăn klei anăn jing bi êmut kơ Aê Diê pô yơh. Aê Diê bi êmut kheh kơ phung mâo ai tiê mgao, brei ih thâo sĭt diñu amâo srăng tlaih kơ klei bi kmhal ôh (Klei Bi Hriêng 16:5). Ênoh srăng tla kyua klei mgao jing prŏng snăk. Đăm dlăng hơăi mang ôh!
Mâo mơ̆ klei blŭ, bruă ngă bi êdah kơ klei drei mgao? Akâo Khua Yang đru drei thâo ƀuh leh anăn kmhal hĕ mtam.
Wah lač: Ơ Khua Yang, tơdah kâo mâo klei blŭ, bruă ngă bi êdah kơ klei kâo mgao, akâo Ih ƀuah, mkra, bi hriăm kâo. Brei kâo mâo klei thâo mĭn leh anăn kmhal hĕ mtam êlâo kơ êgao mmông. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
