Mathais 17:24-27
Nqe cim:
“Yog li ntawd, nej yuav noj yuav haus lossis yuav ua ib yam dabtsi, nej yuav tsum ua kom Vajtswv tau ntsejmuag. Nej tsis txhob ua ib yam dabtsi uas yuav ua rau cov neeg Yudais lossis lwm Haivneeg lossis cov ntseeg Vajtswv tu siab. Nej cia li ua nej lub neej ib yam li kuv ua kuv lub.” (I Kauleethaus 10:31-32)
Lus nug rau sawvdaws xav:
– Tus sau se hauv lub Tuamtsev tau nug Timthawj Petus txog yam dabtsi?
– Tswv Yexus qhia rau Timthawj Petus txog tes haujlwm them se rau Tuamtsev licas?
– Tus ntseeg Yexus ua tiav feemxyuam rau tebchaws thiab tsis ua rau lwm tus yuamkev yuav txais tau dabtsi?
Se Tuamtsev yog yam se uas nom tswv Loos tso cai rau cov neeg Yixalayees sau los siv rau kev ua haujlwm thiab txhim kho lub Tuamtsev hauv nroog Yeluxalees. Nyob hauv Khiavdim 30:11-16, tus Tswv samhwm txhua xyoo txhua tus txiv neej uas muaj hnub nyoog nees nkaum xyoo rov saud yuav tsum them ib nrab sekhee nyiaj siv rau hauv lub Tsev ntaub. Tshuav ntu sijhawm uas cov Yixalayees mus ua cev qhev rov los, vim tseem txomyem Nehemis thiaj samhwm kom tsuas them ib feem peb nyiaj sekhee txhua xyoo rau hauv tus Tswv lub Tuamtsev lawm xwb (Nehemis 10:32).
Nyob rau Tswv Yexus tiam, cov txiv neej Yixalayees uas muaj nees nkaum xyoo rov saud muaj feem xyuam them se rau Tuamtsev, vim li ntawd thaum tau nug hais tias Tswv Yexus puas them se, Timthawj Petus thiaj sawv cev tus Tswv teb hais tias “them”. Thaum mus rau hauv tsev, tus Tswv nug Timthawj Petus hais tias: “Ximoos, koj xav li cas? Leejtwg yog cov uas them se rau tej vajntxwv hauv ntiajteb no? Lawv cov tubki lossis lwm tus them?” Ximoos teb hais tias, “Lwm tus them xwb.” Tswv Yexus lo lus hais, “Yog li ntawd, tsis tas cov tubki yuav them li”, muaj lub ntsiab xav qhia hais tias Tswv Yexus yog Vajtswv Leej Tub, raws li ntiajteb txojcai tus Tswv tsis raug them se. Tiamsis vim tsis xav ua tus qauv tsis zoo rau lwm tus thiab ua kev khwv rau Timthawj Petus, yog li ntawd Tswv Yexus thiaj samhwm kom Timthawj Petus mus tom hiav nuv ntses, thaum nuv tau yuav pom ib lub nyiaj nyob hauv tus ntses lub qhov ncauj, lub nyiaj ntawd txaus them se rau tus Tswv thiab Petus. Tswv Yexus lo lus samhwm no txawv heev tiamsis thaum Timthawj Petus ntseeg, mloog lus, tus Tswv tau pab nws tau tej yam nws cheemtsum “them kuv se thiab koj se”.
Dlau los ntawm Tswv Yexus tej lus hais rau Timthawj Petus, peb pom hais tias tus Tswv muaj cai tsis them se rau lub Tuamtsev rau qhov Nws yog Vajtswv Leej Tub. Tiamsis tus Tswv tau ua qauv zoo rau peb los ntawm qhov uas ua tiav txhua feemxyuam rau Vajtswv thiab tshwjxeeb yog tsis ua rau lwm tus xav yuamkev. Tus ntseeg Yexus nimno yuav tsum nco ntsoov ua tiav nyias feemxyuam uas yog ib tug pejxeem rau lub tebchaws uas peb tabtom nyob, them se kom txaus nkaus txawm yog peb twb tau txais kev cawm dim thiab yog pejxeem saum ntuj lawm. Peb tsis txhob ua tus qauv phem rau tej feemxyuam ntawm ib tug pejxeem nyob hauv lub tebchaws uas peb nyob, tsis txhob nrhiav tej cai xws li “tsis ncajncees”, “tsis muaj qabhau”, “ tsis haum cai”…. los liammoj kom dim yus tus kheej feemxyuam them se. Thaum peb ua tiav feemxyuam rau tebchaws thiab tsis ua rau lwm tus xav yuamkev, peb yuav tau luag saib taus thiab tsis raug neeg ntiajteb hais phem lossis totaub yuamkev.
Thov Vajtswv,
Tus Tswv, thov pab nyuam yaus ua tau qauv zoo, ua tiav feemxyuam rau sawv daws, tshwjxeeb yog kev them se rau tebchaws txaus nkaus kom nyuam yaus tsis ua rau lwm tus yuamkev thiab tsis ua rau Koj lub npe rau luag txob thuam. Nyuam yaus tuav Yexus Khetos lub npe thov, Amees.
Puas muaj zaum twg uas peb txhob txwm qaij lossis ua tsis tiav feemxyuam them se?
Nyeem Vajluskub hauv peb lub xyoos: II Kevcai 34
Kênh Youtube BHKTHN:
