Mathais 17:22-23
Nqe cim:
“…Yexus hais rau lawv hais tias: ‘Luag yuav ntes Neeg Leej Tub coj mus tsimtxom. Luag yuav muab nws tua; tiamsis peb hnub nws yuav sawv hauv qhov tuag rov qab los.’ Cov thwjtim nyuaj siab kawg li.” (Mathais 17:22-23)
Lus nug rau sawvdaws xav:
– Cov Thwjtim xav licas thaum hnov Tswv Yexus hais ua ntej txog Nws kev tuag thiab sawv rov los?
– Vim licas cov Thwjtim yuav xav li ntawd?
– Yuav ua licas peb thiaj ua neej nyob hauv kev kajsiab, zoo siab?
Ntawm no yog zaug thib ob Timthawj Mathais sau tseg txog zajxwm Tswv Yexus hais ua ntej txog Nws kev raug txomnyem thiab kev sawv rov los rau cov thwjtim (Mathais 16:21). Nyob thawj zaug, Timthawj Petus tau cheem Tswv Yexus, tiamsis zaug no cov thwjtim nyuaj siab thaum hnov tus Tswv rov hais txog qhov uas Nws yuav raug txomnyem thiab raug tuag. Timthawj Mathais siv lo lus “nyuaj siab kawg li” los hais txog cov thwjtim kev nyuaj siab. Vim licas lawv yuav nyuaj siab li ntawd? Cov thwjtim yeej tseem tsis tau totaub vim licas Tswv Yexus yuav tsum tuag thiab hnub tim peb Nws sawv rov los. Raws li lawv pom, tus Tswv tabtom tau cov pejxeem hlub thaum Nws lub koob npe yim hnub yim muaj coob tug paub txog, cov thwjtim kuj pom Tswv Yexus ua tau ntau yam txujci tseemceeb, qhia tshwm Nws lub hwjchim tswjkav huabcua, mob nkeeg thiab tej dab; yog li ntawd qhov uas Tswv Yexus yuav raug ntes thiab raug tua yog qhov uas nyuaj totaub kawg li. Cov thwjtim puav leej ntseeg hais tias, los ntawm tej uas Tswv Yexus tau ua, Nws yeej muaj peevxwm sawv los ua ib tus vajntxwv, vim licas Nws yuav tsum tuag?
Cov thwjtim tsuas pom txog qhov uas Tswv Yexus yuav raug txomnyem, raug tuag, tiamsis lawv tsis faj txog tus Tswv kev muaj yeej thiab kev sawv rov los ci ntsa iab. Tswv Yexus tsis ntshai thiab tsis qaug zog vim tus ntoo khaublig tiamsis Nws lees yuav tus ntoo khaublig. Cov thwjtim tsuas cia siab tias Tswv Yexus yuav tsim tsa ib lub tebchaws qhov muag pom nyob hauv ntiajteb no, tiamsis Nws tes haujlwm yog tsim tsa ib lub tebchaws sab ntsujplig uas nyob mus ib txhis, qhov ntawd tsuas muaj tiav dhau ntawm Tswv Yexus txojkev tuag thiab kev sawv rov los xwb.
Nyob hauv lub tsamthawj ntawm zajxwn no, Tswv Yexus cov Thwjtim yeej tsis tau totaub lub ntsiab ntawm tus Tswv kev tuag thiab sawv rov los, vim li ntawd lawv thiaj nyuaj siab kawg li. Hnub no peb yog cov uas twb ntseeg Tswv Yexus thiab tabtom nyob hauv Nws lub tebchaws ib txhis, peb puas tau saj txojkev zoo siab xyivfab thiab kaj siab hauv lub neej raws tus Tswv qab lawm tau? Ntau tus ntseeg Yexus tuaj hauv Tuamtsev tiamsis tseem muaj tej lus yws tsis zoo, qaug zog, tseem muaj tus yamntxwv thiab tes haujlwm qhia tshwm kev txhawj ntshai, nyuaj siab thaum ntsib ib yam dabtsi twg, coob tug tseem mus nrhiav tej yeeb tshuaj, dej cawv los haus kom hnovqab tej kev nyuaj siab. Tswv Yexus twb kov yeej kev txhaum thiab kev tuag lawm, peb tabtom nyob hauv Nws txojkev muaj yeej; tus Tswv twb sawv rov los thiab tabtom nyob hauv Vajtswv cov menyuam lub neej, yuav tsum cia tus Tswv txojkev kaj siab, zoo siab tswj kav hauv peb lub siab.
Thov Vajtswv,
Tus Tswv uas hlub tshua, nyuam yaus ua Koj tsaug vim Koj tau tuag txhiv nyuamyaus tej kev txhaum thiab sawv rov los pub nyuam yaus muaj txojsia ntev dhawv ib txhis. Thov pab nyuam yaus ua lub neej zoo, xyivfab thiab muaj nqis rau Koj. Nyuam yaus tuav Yexus Khetos lub npe thov, Amees.
Peb puas tau saj txojkev zoo siab, kaj siab hauv tus Tswv Yexus lawm tau?
Nyeem Vajluskub hauv peb lub xyoos: II Kevcai 33
Kênh Youtube BHKTHN:
