Klei Aê Diê Blŭ: Y-Mathiơ 17:22-23
Êlan kliăng: “…Yêsu lač kơ phung ƀĭng kna, “Arăng srăng jao Anak Mnuih hlăm kngan mnuih, phung anăn srăng bi mdjiê Ñu, leh anăn Ñu srăng lŏ hdĭp ti hruê tal tlâo.” Phung ƀĭng kna ênguôt snăk.” (Y-Mathiơ 17:22-23)
Klei êmuh ksiêm mĭn: Si klei mĭn phung ƀĭng kna leh hmư̆ Khua Yang hưn kơ klei djiê leh anăn klei Ñu kbiă lŏ hdĭp? Ya ngă phung ƀĭng kna mâo klei mĭn snăn? Si drei ngă čiăng hdĭp nanao hlăm klei êđăp ênang, hơ̆k mơak?
Anei jing gưl tal dua Khua ƀĭng kna Y-Mathiơ lŏ čih kơ klei Khua Yang Yêsu hưn êlâo kơ Klei Ñu Tŭ knap mñai leh anăn Kbiă lŏ hdĭp kơ phung ƀĭng kna (Y-Mathiơ 16:21). Êlâo anăn, Khua ƀĭng kna Y-Pêtrôs ghă leh Khua Yang Yêsu, ƀiădah tal anei phung ƀĭng kna bi êdah klei ênguôt hnĭng tơdah hmư̆ Khua Yang lŏ lač kơ klei Ñu srăng tŭ klei knap mñai leh anăn klei djiê. Khua ƀĭng kna Y-Mathiơ yua boh blŭ “ênguôt snăk” čiăng lač kơ ai tiê phung ƀĭng kna.Ya ngă diñu mâo klei ênguôt snăk snăn? Phung ƀĭng kna ăt ka thâo săng ôh ya ngă Khua Yang Yêsu djiê leh anăn hruê tal tlâo Ñu kbiă lŏ hdĭp. Tui si diñu, Khua Yang dôk mâo phung ƀuôn sang khăp čiăng tơdah klei hing ang Ñu ƀrư̆ hruê ƀrư̆ lu mnuih thâo, phung ƀĭng kna ăt tuôm ƀuh leh Khua Yang Yêsu ngă lu klei myang, bi êdah klei myang Ñu hlăm êa hlĭm hjan, klei ruă duam leh anăn wăt hŏng yang jhat, kyua anăn bruă arăng mă Khua Yang Yêsu leh anăn mdjiê Ñu jing klei bŏ hŏng dleh thâo săng. Phung ƀĭng kna đăo hŏng ya klei Khua Yang Yêsu ngă leh, Ñu dưi jing sa čô mtao, snăn ya ngă Ñu djiê?
Phung ƀĭng kna knŏng mĭn kơ bruă Khua Yang tŭ klei knap mñai, tŭ klei djiê ƀiădah diñu amâo mđing ôh kơ klei dưi guh kơang leh anăn klei Ñu kbiă lŏ hdĭp yuôm bhăn. Khua Yang Yêsu amâo dôk ñăt leh anăn amâo dưi ôh ti kyâo bi kal ƀiădah Ñu tŭ ư klei djiê ti kyâo bi kal. Phung ƀĭng kna knŏng čang hmăng Khua Yang Yêsu srăng mkŏ mjing sa ƀuôn ala mtao êdah klă ti lăn, ƀiădah bruă Ñu jing mkŏ mjing sa ƀuôn ala mtao mngăt myang lă lar, klei anăn knŏng tŭ dưn mơ̆ng klei Ñu djiê leh anăn kbiă lŏ hdĭp.
Hlăm boh klei yăl dliê anei, phung ƀĭng kna Khua Yang Yêsu ăt ka săng ôh klei yuôm bhăn kơ klei djiê leh anăn klei Ñu kbiă lŏ hdĭp anăn diñu dôk hlăm klei ênguôt snăk. Drei hruê anei jing phung đăo leh kơ Khua Yang Yêsu leh anăn dôk thâo kơ ƀuôn ala mtao lă lar Ñu, drei dôk thâo kơ klei mơak, klei jăk leh anăn êđăp ênang hlăm klei hdĭp tui hlue Khua Yang leh mơ̆? Lu phung đăo nao sang kkuh mpŭ grăp hruê kăm ƀiădah ăt adôk lu klei blŭ amâo jăk, êdu ai, mâo knuih leh anăn bruă ngă bi êdah klei rŭng răng, ênguôt hnĭng ti anăp sa klei mâo, lu mnuih ăt duah hăt djŭp, kpiê, ƀiêr msĕ si sa hdră čiăng wơr jih klei ênguôt. Khua Yang Yêsu dưi leh hŏng klei soh leh anăn klei djiê, drei dôk hlăm klei dưi Ñu; Khua Yang kbiă lŏ hdĭp leh leh anăn dôk hdĭp hlăm phung ƀuôn sang Ñu, brei klei êđăp ênang, hơ̆k mơak Khua Yang kiă kriê hlăm ai tiê grăp čô drei.
Drei dôk thâo kơ klei mơak, klei êđăp ênang hlăm Khua Yang Yêsu mơ̆?
Wah lač: Ơ Khua Yang khăp hơiêng, kâo bi mni kơ Ih djiê leh kyua klei soh kâo leh anăn kbiă lŏ hdĭp čiăng brei klei hdĭp lă lar. Akâo kơ Ih đru kâo bi mĭn klei jăk, hơ̆k mơak leh anăn tŭ dưn kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
