Klei Aê Diê Blŭ: Klei Mtô Mñă Klei Bhiăn 29:22-29
Êlan kliăng: “Snăn yơh hlei pô hmư̆ klei kâo blŭ anei leh anăn gưt srăng jing msĕ si sa čô mnuih thâo mĭn mdơ̆ng sang ñu ti dlông boh tâo” (Y-Mathiơ 7:24)
Klei êmuh ksiêm mĭn: Ya klei truh Aê Diê srăng tuh kơ phung ƀuôn sang Israel tơdah diñu kkuh kơ rup yang? Si klei Aê Diê bi kmhal ngă mgei kơ dŭm ala čar riêng gah? Si brei drei hdĭp tơdah hriăm kơ klei anei?
Mjưh ruê̆ kdrêč 29 jing klei hưn brei răng kơ phung ƀuôn sang Israel kơ boh jhat kjham snăk diñu srăng klam tơdah êbat hlăm êlan kkuh kơ rup yang. Amâo dưi bi mĭn ôh mơ̆ng sa krĭng mdrŏng sah jăk siam, bŏ hŏng êa ksâo leh anăn êa hnuê ƀiădah Aê Diê dưi bi mlih jing kdrăn rơ̆k krô pui ƀơ̆ng hŏng boh tâo pui leh anăn hra. Anôk anăn jing lăn djiê, amâo mâo ana kyâo rơ̆k tơ̆k dưi bluh knăt čăt jing ôh, amâo dưi ba sa boh tŭ dưn kơ phung ƀuôn sang ôh. Y-Môis lač kơ ƀuôn Sôdôm leh anăn Gômôrơ čiăng kơ phung ƀuôn sang dưi thâo kơ klei huĭ hyưt kơ hnơ̆ng luč rai mơ̆ng sa krĭng lăn tơdah Aê Diê tăm pah.
Klei bi kmhal kơ phung ƀuôn sang Ñu ăt kpư̆ mgei dŭm ala čar riêng gah, tơl dŭm djuê ana anăn bi êmuh snei: ‘Si ngă Yêhôwa ngă snei kơ čar anei?’ Leh anăn klei diñu wĭt lač jing kyua phung ƀuôn sang Israel hngah leh klei bi mguôp Yêhôwa Aê Diê phung aê diñu đưm ngă leh hŏng diñu. Klei anei brei ƀuh bruă hngah kơ Aê Diê, lui klei bi mguôp ƀuăn rơ̆ng leh hŏng Aê Diê jing phŭn kơ klei tăm pah hlăm klei hdĭp.
Tơdah mâo wưng hlăm klei hdĭp tui hlue Khua Yang ƀiădah drei amâo mdei tuôm nanao hŏng klei truh anei truh kơ klei truh mkăn, sa hlăm dŭm mta brei drei ngă jing čŏng ksiêm dlăng pô dôk hdĭp hlăm klei bi mguôp hŏng Khua Yang mơ̆. Klă sĭt amâo djŏ djăp klei truh hlăm klei hdĭp jing kyua drei hngah kơ Aê Diê sơăi ôh, Y-Yôp jing sa čô êdah hĭn kơ klei anei. Ƀiădah ăt mâo klei amâo jăk hlăm klei hdĭp jing boh tŭ mơ̆ng knuih hdĭp lăm lui Aê Diê kbiă mơ̆ng klei hdĭp pô, čiăng kơ klei mkăn hrô kơ brei Aê Diê jing khua. Drei amâo dưi thâo săng ôh djăp klei hgăm kơ Aê Diê. Klei Aê Diê Blŭ ăt mtô drei, klei yuôm bhăn hĭn tơdah Aê Diê brei klei mtô anei jing čiăng kơ drei leh anăn anak čô drei thâo mđing hlue ngă Klei Aê Diê Blŭ mtô grăp hruê hlăm klei hdĭp čiăng ñĕ kơ klei truh anăn kyua Aê Diê bi kmhal phung hngah kơ Khua Yang, “Klei hgăm pioh kơ Yêhôwa Aê Diê drei; ƀiădah klei Ñu bi êdah leh pioh kơ drei leh anăn kơ phung anak drei nanao hlŏng lar, čiăng kơ drei dưi ngă jih jang klei blŭ hlăm klei bhiăn anei” (êlan 29). Amâo mâo ya klei huĭ hyưt ôh leh anăn amâo myun hŏng bruă hngah kơ Aê Diê, lui Ñu hlăm klei hdĭp pô. Brei hdĭp thâo mĭn hlue ngă Klei Aê Diê Blŭ mtô leh anăn mkŏ jing sang klei đăo pô hlăm Boh Tâo kjăp lă lar jing Khua Yang Yêsu Pô Bi Mtlaih (Y-Mathiơ 7:24-27).
Ksiêm dlăng drei pô hlăm klei hmư̆ leh anăn hlue ngă Klei Aê Diê Blŭ bi mơak kơ Aê Diê leh mơ̆ amâodah ka?
Wah lač: Ơ Khua Yang, jing Aê Diê thâo trih, Akâo kơ Ih đru kâo đăm mluk lăm lui ôh Aê Diê hlăm klei hdĭp kâo. Akâo kơ Ih đru kâo leh anăn anak čô kâo jih ai tiê sĭt suôr gưt asăp Ih mtô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
