II Kevcai 29:22-29
Nqe cim:
“Yexus hais tias, txhua tus uas hnov kuv tej lus thiab ua raws li tej lus ntawd, tus ntawd zoo ib yam li tus uas muaj tswvyim, nws ua nws lub tsev rau saum pobzeb.” (Mathais 7:24)
Lus nug rau sawvdaws xav:
– Vajtswv yuav ua rau cov Yixalayees ntsib tej teemeem twg yog lawv pe mlom?
– Vajtswv kev rau txim ua rau tej haivneeg ib ncig raug ceeb li cas?
– Peb yuav tsum ua neej li cas thaum kawm paub txog tej no?
Xaus tshooj 29 yog tej lus ceebtoom cov Yixalayees txog tej teebmeem txaus tshai uas lawv yuav raug yog hais tias lawv mus pe mlom. Xav tsis txog hais tias ib lub tebchaws av rog thiab zoo qoobloo tiamsis Vajtswv muaj peevxwm ua kom qhuav ua leejfaj thiab ua ntsev. Qhov chaw ntawd dhau los ua thaj av tuag, nroj tsuag, qoobloo tuaj tsis taus, sau tsis tau ib yam dabtsi los rau cov pejxeem. Mauxes rov hais txog lub nroog Xaudoos thiab lub nroog Kaumaulas kom tus Tswv haivneeg xam pom txog kev puas tsuaj txaus ntshai ntawm thaj av raug tus Tswv foom phem.
Qhov uas tus Tswv rau txim rau Nws haivneeg kuj ua rau tej haivneeg ib ncig raug ceeb, txog qib uas lawv sib nug hais tias: Vim licas tus Tswv tau ua li ntawd rau haivneeg no? Thiab lus teb uas lawv txais tau yog vim cov Yixalayees tsis ua raws li tej lus cogtseg uas Vajtswv tau cog rau lawv cov yawgkoob. Qhov no qhia pom hais tias qhov uas tsis txais yuav tus Tswv, muab tej lus cogtseg nrog tus Tswv tso povtseg yog qhov pib ntawm kev raug foom tsis zoo hauv lub neej.
Yog muaj tej lub sijhawm twg hauv lub neej raws tus Tswv qab, peb pheej ntsib tej teebmeem tas teebmeem tuaj, ib yam uas peb yuavtsum ua yog rov ntsuamxyuas peb tus kheej saib puas tabtom ua neej hauv tej lus cogtseg nrog tus Tswv. Tseeb tiag, tsis yog txhua yam teebmeem tuaj raug peb puavleej yog vim peb tso tus Tswv tseg, Yauj yog ib tug qauv qhia peb txog qhov no. Tiamsis kuj muaj tej yam kev txomnyem yog los ntawm qhov uas peb muab tus Tswv tshem tawm hauv peb lubneej, cia lwm yam ua tus tswjkav peb, tsis cia tus Tswv ua tus kav. Peb tsis muaj peevxwm totaub tagnrho txhua yam ntawm tus Tswv. Vajtswv Txojlus kuj qhia peb hais tias, qhov tseemceeb thaum tus Tswv pub tej kevcai yog cia peb thiab peb tej xeebntxwv kawm xyaum ua raws li tus Tswv tej lus qhia txhua hnub hauv lub neej, qhov ntawd pab tau peb tsis raug tej teebmeem uas tus Tswv foom rau cov neeg uas tsis lees yuav Nws, “muaj tej yam uas tus Tswv uas yog peb tus Vajtswv tsis qhia rau leejtwg paub; tiamsis nws twb qhia nws tej kevcai rau sawvdaws kom peb thiab peb tej xeebntxwv ua raws li tej kevcai ntawd mus ibtxhis” (nqe 29). Tsis muaj dabtsi yuav txaus ntshai thiab txomnyem npaum li qhov uas tsis lees yuav tus Tswv, muab Nws tshem tawm hauv peb lub neej mus. Yuav tsum ua neej muaj tswvyim raws li Vajtswv Txojlus qhia thiab txhim kho yus lub tsev sab kev ntseeg rau saum lub Pobzeb ruaj khov ibtxhis uas yog Cawm Seej Yexus (Mathais 7:24-27).
Thov Vajtswv,
Tus Tswv, yog Vajtswv tus uas khibxeeb. Thov pab nyuam yaus txhob ua tus tsis muaj tswvyim uas muab Koj tshem tawm hauv lub neej. Thov pub rau nyuam yaus thiab nyuam yaus cov xeebntxwv tas siab ua raws li Koj tej lus qhia. Nyuam yaus tuav Yexus Khetos lub npe thov, Amees.
Peb puas tau ntsuamxyuas peb tus kheej txog kev mloog thiab ua raws tus Tswv tej lus lawm tau?
Nyeem Vajluskub hauv peb lub xyoos: II Kevcai 32
Kênh Youtube BHKTHN:
