II Kevcai 29:9-15
Nqe cim:
“Yog li ntawd, nej yuav tsum muab siab npuab thiab ua raws li tus TSWV tej lus cog tseg no txhua lo huv tibsi, tej uas nej ua thiaj yuav vammeej.” (II Kevcai 29:9)
Lus nug rau sawvdaws xav:
– Vim licas Mauxes pheej qhuab ntuas thiab nqua hu cov Yixalayees coj raws li tus Tswv tej lus cogtseg?
– Vim licas tus Tswv tej lus cogtseg rau Nws haiv neeg muaj nqis ib txhis?
– Niaj hnub nimno peb thiab peb cov xeebntxwv coj tus Tswv tej lus cogtseg licas?
Txawm yog Mauxes tau kev txhawb zog los ntawm tej haujlwm loj uas yav dhau los tus Tswv ua rau haivneeg Yixalayees, los nws yeej tsis yog ib tug uas tsuas nco txog tej yam zoo thaum ub, tsis quavntsej tej yam nimno tshwmsim. Tiamsis, nws zeem paub tseeb hais tias phaum neeg tshiab ntawm cov Yixalayees yuav ntsib tej tsamthawj tshiab thiab tej kev sim siab tshiab tabtom tos lawv tom hauv ntej. Los ntawm lub meejmom ua tus coj sab ntsujplig, Mauxes paub hais tias tsuas yog thaum phaum neeg tshiab ntawm cov Yixalayees muaj kev koom siab, koom ntsws txhimkho kev coglus tseg nrog tus Tswv, ua neej xyuamxim hauv kev coj raws tus Tswv tej luscog tseg nyob hauv lub tebchaws av rog tiamsis puvnpo kev dag ntxias; ces thaum ntawd lawv thiaj yuav tau txais tus Tswv tej koobhmoov hauv lubneej. Ntawd yog vimchiv thoob plaws phau II Kevcai, zaug dhau zaug, Mauxes nqua hu phaum neeg tshiab ntawm cov Yixalayees yuav tsum coj raws li tus Tswv tej lus cogtseg.
Nyob hauv tshooj no, Mauxes tas siab nqua hu cov thawjcoj thiab cov pejxeem, tsis hais lwm haivneeg nrog lawv nyob, cia li los nyob hauv kev cog lustseg nrog tus Tswv kom tau suav hais tias yog tus Tswv haivneeg. Tus Tswv tej lus cogtseg rau cov Yixalayees yog tej lus cogtseg tsis muaj sijhawm xaus, pib ntawm lawv cov yawg koob uas yog Anplahas, Ixaj, Yakhauj thiab tau txuas mus rau cov Yixalayees ntau phaum neeg tomqab lees yuav. Tej lus cogtseg no tseem yuav txuas mus rau tej phaum neeg tshiab uas yug los thiab loj hlob hauv Tebchaws Coglus Tseg. Tej lus cogtseg ntawd yog:“Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog” (II Kevcai 6:4-5). Txhais tau hais tias, tus yaumsij kom cov Yixalayees muaj lub neej zoo kajsiab, txawm yuav nyob hauv tiaj suabpuam lossis nyob hauv lub tebchaws av rog thiab zoo qoobloo, ntawd yog coj raws li tej lus cogtseg ibtxhis nrog tus Tswv.
Txhua yam hauv ntiajteb no puav leej muaj sijhawm siv, tiamsis tej lus cog tseg ntawm tus Tswv thiab Nws haiv neeg muaj nqis mus ibtxhis. Rau qhov Vajtswv yog tus uas tsis muaj nrim. Tswv Yexus qhia nyob hauv Mathais 6:33 hais tias: “Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej.” Vim li ntawd, yog peb rau siab ntso ua raws li tus Tswv tej kevcai ces peb yuav tau txais tej lus cogtseg uas tus Tswv hais nyob hauv Vajluskub txhua tiam. Yog li ntawd, peb yuav tau qhia txog tus Tswv tej lus cog tseg ibtxhis rau peb tej xeebntxwv, thiab cobqhia lawv tuav ruaj, coj raws li tej lus cogtseg, ntawd yog txoj haukev pab kom muaj kev vammeej hauv lub neej.
Thov Vajtswv,
Tus Tswv uas nyob mus ibtxhis, yog Tus uas nyuam yaus pehawm. Thov qhia nyuam yaus paub rau siab ntso tuav ruaj Koj tej lus cog tseg, tsis tas li ntawd xwb, thov pab kom nyuamyaus nco ntsoov feem xyuam uas cob qhia txhua phaum neeg hauv nyuam yaus tsev neeg kom tuav ruaj Koj tej lus cogtseg. Nyuam yaus tuav Yexus Khetos lub npe thov, Amees.
Peb puas tas siab pab peb tej menyuam hauv peb tsev neeg tuav ruaj tus Tswv tej lus cogtseg ibtxhis lawm tau?
Nyeem Vajluskub hauv peb lub xyoos: II Kevcai 30
Kênh Youtube BHKTHN:
