Loos 8:18-22
Nqe cim:
“ Ib puas tsav yam uas Vajtswv tsim tos ntsoov xav pom hnub uas Vajtswv cov menyuam los” (Loos 8:19)
Lus nug rau sawvdaws xav:
– Timthawj Paulus qhia paub txhua yam hauv lub ntiajteb tab tom zoo li cas?
– Vim li cas txhua yam tos ntsoov hnub uas Vajtswv cov menyuam tshwm los?
– Qhov uas Vajtswv cov me nyuam tshwm los puas pab tau txhua yam li cas?
Timthawj Paulus qhia kom Vajtswv cov menyuam nco txog zaj uas noob neej poob kev txhaum. Thaum poj koob yawmtxwv tsis mloog lus mus noj tsob txiv uas Vajtswv txwv, tibneeg thiab txhua yam uas nyob hauv ntiajteb thiaj raug Vajtswv foom tsis zoo huv tibsi (Chivkeeb 3:17-19). Kev tau zoo thiab kev kaj siab thiaj xaus rau hnub ntawd! Txhua yam tsiaj nrog rau tej nroj tsuag thiab tibneeg nyob tsis tau ua ke, av tuaj nroj tsuag fab, tibneeg yuav tsum khwv lub hws nrog thiaj tau noj. Tibneeg yim hnub yim ua phem ntxiv, txhob txwm tawm tsam Vajtswv tsis tseg thiab tswj kav txhua yam uas Vajtswv muab cob rau tibneeg. Tibneeg qia dub thiab siv tej uas Vajtswv tsim tseg raws li kev ntshaw. Txij thaum ntawd los txog nim no, txhua yam hauv ntiajteb quaj nyiav vim yuav tsum tawmtsam thiaj muaj nyob, ib txhia twb raug poob rau kev puastsuaj lawm.
Txhua yam tos ntsoov hnub uas Vajtswv cov menyuam los (nqe 19). Txhua tus ntseeg tseeb puavleej yog Vajtswv menyuam. Qhov uas txhua yam tos ntsoov hnub Vajtswv cov menyuam tshwm los yog tos hnub uas Yexus rov los tos cov ntseeg mus nrog Nws nyob. Vajtswv Txojlus qhia peb paub tias: “Thaum muaj neeg mus qhia Txojmoo Zoo uas hais txog Ntuj Ceebtsheej mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg” (Mathais 24:14). Hnub ntawd lub ntuj tshiab, teb tshiab yuav tshwm los thiab txhua yam nyob hauv ntiajteb yuav hloov dua tshiab. Txhua yam tau dim ntawm kev raug foom tsis zoo. Hnub ntawd kev puastsuaj yuav tsis muaj, kev tuag yuav raug swb mus (II Petus 3:13; Tshwmsim 21:1).
Vim Vajtswv txoj kev hlub, peb tau Vajtswv tsim thiab pub ua neej nyob hauv ntiajteb no. Qhov uas peb tshwm sim yog tshwm los cia siab rau txhua yam uas Vajtswv npaj nyob tom ntej. Cov ntseeg Yexus yog kev nplij siab thiab kev cia siab rau txhua yam hauv lub ntiajteb. Hauv kev ua neej, cov ntseeg muaj feem xyuam tu thiab saib xyuas txhua yam Vajtswv tsim (Chivkeeb 1:26), vim li ntawd peb yuavtsum tu thiab saib xyuas kom txhua qhov chaw peb muaj kaj siab, txhua yam thiaj loj hlob thiab huam vam. Peb txhob txov txhua yam uas Vajtswv tsim, txhob ntov hav zoov, txhob lom ntses thiab txhob tua tsiaj hav zoov ywj siab. Cov ntseeg yuav tsum sib qhia thiab cob qhia tej menyuam, tej xeeb ntxwv, ua tej haujlwm me me xws li cog ntoo, tu vajtse, sau tej yam qias nyob muaj chaw. Dhau ntawd, yuav tsum qhia txog tus Tswv Yexus rau txhua tus kom tes haujlwm cawm txhua yam thiaj li yuav muaj tiav.
Thov Vajtswv:
Vajtswv! Thov Koj pab kom nyuam yaus muaj nplooj siab hlub li Koj, thiab pub lub zog rau nyuam yaus kom ua tau ib tus tub txib ncajncees, muaj tswvyim rau Koj, pab kom nyuam yaus yog lub chaw cia siab rau txhua yam nyob ib ncig ntawm nyuam yaus. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb yuav ua neej li cas rau txhua yam ib ncig ntawm peb?
Nyeem Vajlus kub hauv peb lub xyoos: Henplais 2
Kênh Youtube BHKTHN:
