Klei Aê Diê Blŭ: Klei Bi Hriêng 21:25-26
Êlan kliăng :“Hlăm jih klei anei kâo bi êdah leh kơ diih hŏng klei mă bruă srăng đru phung awăt, êjai hdơr klei Khua Yang Yêsu blŭ leh, lač, ‘Brei kơ arăng jing jăk mơak hĭn kơ mă tŭ” (Bruă Phung Khua Ƀĭng Kna 20:35)
Klei êmuh ksiêm mĭn: Ya dua rup bi klăk Mtao Y-Salômôn bi êdah? Si ngă klei mdê boh knhal tuč kơ dua rup anăn? Si ngă Khua Yang čiăng drei hdĭp leh anăn mă bruă?
Dua êlan Klei Bi Hriêng anei bi êdah kơ dua rup bi klăk mgar. Mnuih alah bi klăk hŏng mnuih kpă ênô. Sa čô mnuih jih hruê knŏng tluh kơ mnơ̆ng, knŏng čiăng mă tŭ, bi klăk hŏng sa čô mnuih brei amâo hơưi ôh. “Klei mnuih alah tluh čiăng bi mdjiê ñu pô” čiăng lač kơ klei luč klei čang hmăng kbiă hriê mơ̆ng klei pô anăn čuôt klih, knŏng čiăng mkăm pioh bi lu ƀiădah amâo čiăng mă bruă ôh čiăng mâo mnơ̆ng anăn; knŏng bi mĭn ƀuh, êpa mhao kơ mnơ̆ng ñu čiăng mâo ƀiădah amâo kriăng mă bruă ôh. Kngan amâo mă bruă ôh si thâo mâo mnơ̆ng kơ ƀăng êgei mmah? Klei sa čô mnuih alah čiăng amâo jing sĭt ôh, leh anăn klei ư̆ êpa, klei luč klei čăng hmăng srăng bi knap leh anăn bi mdjiê ñu ƀrư̆ ƀrư̆. Mtao Y-Salômôn brei ƀuh msĕ mơh kơ boh knhal tuč mdê gah gôk plah mnuih mâo klei mĭn amâo sĭt ôh hŏng mnuih kriăng, “Mnuih alah mâo klei tluh ƀiădah amâo mâo mnơ̆ng ôh, ƀiădah phung mnuih kriăng mâo djăp mta mnơ̆ng” (Klei Bi Hriêng 13:4).
Tơdah hdĭp ƀiădah amâo čiăng mă bruă ôh, snăn mnuih alah pô amâo djăp mnơ̆ng ƀơ̆ng huă ôh, ƀai êjai hĭn si dưi đru pô mkăn. Mnuih alah knŏng mĭn mă kơ ñu pô amâo uêñ mĭn kơ pô riêng gah ôh, knŏng thâo mkăm pioh ƀiădah amâo thâo bi mbha ôh. Bi klăk hŏng mnuih alah, mnuih kriăng gĭr ktĭr mă bruă čiăng bi mâo mnơ̆ng amâo djŏ pioh yua knŏng hjăn kơ ñu pô ôh, ƀiădah mâo êbeh dlai čiăng “brei amâo hơưi ôh”, si tô hmô brei hŏng klei kmah. Mnuih kriăng thâo kral nanao klei jăk jĭn lu êbeh Aê Diê brei leh kơ ñu čiăng ñu hdĭp thâo đru bi mbha. Mtao Y-Salômôn pia kơ mnuih hdĭp msĕ snăn jing mnuih kpă ênô, kyuadah gơ̆ thâo bi êdah klei khăp leh anăn uêñ mĭn nanao kơ klei kƀah knap phung ayŏng amai adei riêng gah.
Tơdah Khua ƀĭng kna Y-Pôl mtă kơ phung anak čô Khua Yang gĭr mă bruă čiăng dưi đru mnuih mkăn, ñu lŏ bi hdơr kơ êlan hdră hdĭp Khua Yang Yêsu pô tuôm mtô leh snei, “Brei kơ arăng jing jăk mơak hĭn kơ mă tŭ.” Khua Yang čiăng drei kriăng mă bruă čiăng bi mâo prăk kăk, amâo djŏ čiăng mâo klei hdĭp mda knŏng kơ drei leh anăn gŏ sang drei pô ôh, ƀiădah wăt čiăng mâo mnơ̆ng mnuă kăp đru phung ruă duam, kƀah knap msĕ mơh. Mâo klei jăk jĭn amâo djŏ knŏng klei dưi duah lu prăk kăk, mâo mnơ̆ng mnuă lu êbeh ôh, ƀiădah wăt hdĭp hŏng klei thâo khăp, brei kơ pô mkăn hŏng klei kmah msĕ mơh. Phung anak čô Aê Diê amâo dưi alah ôh, ƀiădah brei mâo klei kriăng, ngă jih jang bruă hŏng jih ai tiê msĕ si ngă kơ Khua Yang, leh anăn thâo đru phung ayŏng adei dôk hlăm klei dleh knap msĕ mơh. Hŏng klei anăn, drei srăng bi êdah klei drei hdơr knga leh anăn khăp kơ Khua Yang kơ jih jang mnuih.
Si ngă drei kriăng mă bruă, hŏng jih ai tiê uêñ mĭn, khăp leh anăn đru mnuih mkăn?
Wah lač: Ơ Khua Yang, kâo lač jăk kơ Ih kyuadah Klei Ih Blŭ bi hriăm kâo hlăm klei dôk dơ̆ng ƀơ̆ng huă grăp hruê. Đru kâo kriăng mă bruă, leh anăn hdĭp hŏng klei thâo hdơr knga kơ Ih nanao hŏng klei thâo uêñ mĭn đru jih jang phung knap mñai jŭm gah găn kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Yap 36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
