Klei Aê Diê Blŭ: Rôm 8:5-8
Êlan kliăng”: “Klei khăp mĭn kơ klei tui si kđeh jing klei djiê; ƀiădah klei khăp mĭn kơ klei tui si Yang Mngăt Jăk jing klei hdĭp leh anăn klei êđăp ênang” (Rôm 8:6)
Klei êmuh ksiêm mĭn: Knhuah hdĭp khăp mĭn kơ klei tui si kđeh srăng atăt truh kơ si boh jhat? Si jing klei khăp kơ klei mĭn tui si kđeh? Si klei dôk dơ̆ng ƀơ̆ng huă sa čô mnuih khăp mĭn kơ klei tui si kđeh? Klei hriăm hruê anei mñă drei kơ ya klei?
Khua ƀĭng kna Y-Pôl kñăm snei: hdĭp khăp mĭn kơ klei tui si kđeh jing klei djiê (êlan 6). Mnuih khăp mĭn kơ klei tui si kđeh dưm ai tiê klei mĭn ñu knŏng kơ klei tui si kđeh. Mnuih anăn srăng bi mĭn, duah hdră êlan čiăng bi hrăp jih ya klei ai tiê ñu khăp čiăng, mbĭt hŏng klei anăn ñu uêñ mĭn duah ênoh yuôm kơ asei mlei ñu pô, mâo hdră kñăm čiăng leh anăn klei bhiăn dôk dơ̆ng ƀơ̆ng huă tui si hnơ̆ng ñu pô čuăn. Bhiăn gơ̆ phung dôk hdĭp khăp mĭn kơ klei tui si kđeh mâo klei mĭn khăng msĕ, mă tian diñu pô jing yang kơ diñu (Philip 3:19). Diñu ngă djăp mta klei khă bi hrăp klei diñu pô tluh ƀiădah amâo uêñ mĭn ôh hlei Aê Diê jing, ya klei bi mguôp Aê Diê mâo hŏng diñu.
Phung hdĭp khăp mĭn kơ klei tui si kđeh, lui brei knuih soh mnuih hđăp mơ̆ng djuê ana Y-Ađam, lĕ hlăm klei soh, bi kdơ̆ng hŏng Khua Yang gĭt gai klei hdĭp diñu. Diñu đing đăo kơ klei khăp leh anăn klei jăk Khua Yang, čiăng dưi mâo klei guh kơang mđơr hŏng Khua Yang, čiăng êngiê hjăn păn hŏng Khua Yang, amâo gưt kơ klei bhiăn Aê Diê ôh. Klei boh sĭt, phung anei amâo dưi gưt kơ klei bhiăn Aê Diê doh jăk ôh, kyuadah diñu jing hlŭn leh kơ klei soh leh anăn klei myang klei mmăt dôk kă čăp diñu. Diñu čŏng čiăng ngă bi kdơ̆ng hŏng klei Khua Yang čiăng. Kyuanăn, hlei pô khăp mĭn kơ klei tui si kđeh jing roh hŏng Aê Diê leh anăn klei hdĭp diñu amâo dưi bi mơak kơ Aê Diê ôh (êlan 7-8).
Tơdah lač kơ phung khăp mĭn kơ klei tui si kđeh, năng ai drei bi ƀuh anăn jing phung kthŭl, roh răt, mưč mač Anăn Aê Diê, knan knăk, čuôt klih, knhông, mplư luar, jhat ƀai, đa đa mkăn… Ƀiădah lĕ, klei bi kdơ̆ng hŏng Aê Diê amâo djŏ knŏng kna ti bruă ngă knhuah hdĭp amâo kpă ôh, ƀiădah mta yuôm jing hlăm lam ai tiê dôk mâo klei mĭn bi kdơ̆ng hŏng Aê Diê. Sa čô mnuih năng ai mâo knhuah hdĭp jăk siam êdi, knhuah dôk dơ̆ng ƀơ̆ng huă jăk kmah, thâo khăp, thâo đru arăng, … ƀiădah tơdah pô anăn ngă jih klei anăn kyua hŏng klei čiăng bi êdah ênoh yuôm leh anăn klei kpă ênô pô dê, amâodah gĭr ktĭr ai tiê djă pioh klei bhiăn Aê Diê, amâodah mkăm pioh bruă ngă jăk kyua čiăng dưi mă tŭ klei bi mtlaih, snăn mnuih anăn jing mnuih bi kdơ̆ng ti anăp ală Aê Diê. Klei soh prŏng hĭn Aê Diê amâo dưi pap brei ôh, jing klei amâo yap Aê Diê jing Khua kơ kluôm jih jang lăn adiê, leh anăn amâo djŏ Khua Yang kơ klei hdĭp ñu pô. Aê Diê amâo dưi pap brei ôh kơ mnuih hngah kơ Aê Diê dôk mbĭt leh anăn kơ klei khăp Ñu, amâo hlue ngă ôh tui si hdră êlan Ñu mkra čiăng mă tŭ klei bi mtlaih leh anăn dưm Ñu ti êngao kơ klei hdĭp pô.
Si ngă drei ƀuh mâo êyui mnuih khăp mĭn kơ klei tui si kđeh hlăm klei hdĭp drei pô mơ̆?
Wah lač: Ơ Khua Yang, bi mni kơ Aê Diê Tlâo Čô Yang pap leh kơ kâo, pŏk ală mngăt kâo čiăng kơ kâo thâo kral Ih jing Pô hrih mjing jih jang mnơ̆ng, leh anăn jing Khua Yang kơ klei hdĭp kâo! Akâo Khua Yang đru kâo đăo knang kơ Ih nanao, mđing hmư̆ asăp Ih, sĭt suôr mă bruă kơ Ih čiăng dưi bi knal klei hdĭp êđăp ênang jăk mơak hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
