Khiavdim 31:1-11
Nqe cim:
“Vajtswv twb pub koob hmoov rau nej txhua tus lawm, yog li ntawd nej yuav tsum siv tej koob hmoov uas nej tau ntawd kom muaj nqis rau lwm tus” (I Petus 4:10).
Lus nug rau sawvdaws xav:
– Tus Tswv muab tes haujlwm dabtsi cob rau Npexalees?
– Tus Tswv pub yam koob hmoov twg rau Npexalees thiab cov pab nws ua haujlwm?
– Khiavdim 36:1-7 qhia paub tej khoom siv los ua tus Tswv lub Tsevntaub yog muab qhov twg los?
– Peb kawm tau dabtsi dhau ntawm ntu Vajluskub no?
Npexalees yog ib tug txiv neej nyob hauv xeem Yudas uas nyob rau Mauxes tiam. Nws tau Vajtswv tuav nkaus npe hais kom ua Lub Tsevntaub. Tus Tswv pub rau nws puv npo Vaj Ntsujplig, kev totaub, kev txawj paub thiab muaj peevxwm ua tau haujlwm txhua yam. Vim ua Tsevntaub yog ib tes haujlwm loj heev, yog li ntawd tus Tswv thiaj hais kom Auhauli-as uas yog xeem Das los pab ua haujlwm. Tagnrho Auhauli-as thiab lwm tus uas tau xaiv los pab ua haujlwm puavleej tau tus Tswv pub muaj tswvyim zoo los ua tes haujlwm Nws txib (nqe 6). Hais txog tej khoom siv los ua lub Tsevntaub ces twb muaj cov pejxeem coj tuaj fij los ntawm lub siab dawb siab dav thiab fij ntau tshaj tej uas yuav siv lawm (Khiavdim 36:1-7).
Niaj hnub nimno, tej koob hmoov sab ntsujplig tau Timthawj Paulus hais txog hauv Phau Vajluskub Tshiab (Loos 12:6-8; I Kauleethaus 12:8-10, 28; Efexus 4:11) yog tej koob hmoov pheej pom muaj nyob tiam ntawd, tiamsis Timthawj Paulus tsis tau sau txhij txhua txog tej koobhmoov. Zaj uas hais txog Npexalees thiab cov neeg nrog nws ua haujlwm tau Vaj Ntsujplig pub koob hmoov txawj siv txhua yam ua lub Tsevntaub, qhia peb pom hais tias koob hmoov sab ntsujplig tau siv rau txhua tes haujlwm sab ntsujplig kom pab tau Pawg Ntseeg thiab ua rau Vajtswv tau koobmeej. Pivtxwv li niaj hnub nimno, muaj tej pab tau xaiv los tswj tej cuabyeej siv los pehawm xws li pab xa suab, pab qhib teeb, pab siv lub tso duab… tej ntawd kuj yog tej koob hmoov sab ntsujplig. Txhua tus yuavtsum zeem paub tej koob hmoov tus Tswv pub rau tus kheej thiab siv kom muaj nqis ua tus Tswv haujlwm.
Vajtswv pub rau Npexalees, Auhauli-as thiab cov pab ua haujlwm muaj peevxwm thiab tswvyim zoo los sib pab ua lub Tsevntaub. Nws pub rau lawv muaj kev totaub, lub siab txawj paub thiab txaus siab los ua tus Tswv tes haujlwm. Tsis tas li ntawd xwb, kev ua lub Tsevntaub cheemtsum muaj ntau yam khoom los ua, yog li ntawd tus Tswv kuj tshoov cov pejxeem siab kom muaj siab loj siab dav, fij txhua yam tuaj txaus nkaus vim lawv paub hais tias txhua yam lawv muaj yog Vajtswv pub rau lawv. Vim li ntawd, thaum cheemtsum ua tus Tswv tes haujlwm, lawv thiaj txaus siab hlo fij txhua yam txij dag zog mus rau nyiaj kub (Khiavdim 36:1-7). Nyob hauv txhua yam kev ua haujlwm puavleej cheemtsum tug nqis zog, tug pab nyiaj. Vajtswv Txojlus hais tias: “Vajtswv twb pub koob hmoov rau nej txhua tus lawm, yog li ntawd nej yuav tsum siv tej koob hmoov uas nej tau ntawd kom muaj nqis rau lwm tus” (I Petus 4:10). Thaum peb txhua tus zeem paub hais tias txhua lub peevxwm, tswvyim, kev totaub thiab txhua yam peb muaj puavleej yog koob hmoov Vajtswv pub ces peb yuav tsis ntshai qhov uas fij txhua yam rau tus Tswv los ntawm siab loj siab dav.
Thov Vajtswv,
Tus Tswv uas muaj kev hlub, thov pab nyuam yaus ua tau tus tubtxib ncajncees, muaj tswvyim hauv kev thuav dav thiab siv tej koob hmoov Koj pub los ua muaj nqis rau Koj Pawg Ntseeg. Amees.
Peb tabtom siv yam koob hmoov twg los koom tes ua tus Tswv haujlwm?
Nyeem Vajluskub hauv peb lub xyoo: Mikhas 4:3-5:9
Kênh Youtube BHKTHN:
