Klei Aê Diê Blŭ: Klei Kbiă 31:1-11
Êlan kliăng: “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăl kiă jăk bi mbha klei Aê Diê pap.” (I Y‑Pêtrôs 4:10)
Klei êmuh ksiêm mĭn: Ya mta bruă klam Khua Yang jao kơ Y‑Bêsalel? Ya mta klei brei Khua Yang brei kơ ñu leh anăn kơ phung mă bruă mbĭt hŏng ñu? Klei Kbiă 36:1-7 brei thâo mơ̆ng kbiă hriê jih jang mnơ̆ng pioh rŭ mdơ̆ng Sang čhiăm? Ya klei drei mă hriăm mơ̆ng trăn Klei Aê Diê Blŭ anei?
Y‑Bêsalel jing sa čô mơ̆ng găp djuê Yuđa hlăk ênuk Y‑Môis. Aê Diê čuăn ruah ñu pioh ngă bruă rŭ mdơ̆ng Sang čhiăm. Khua Yang bi bŏ ñu hŏng Yang Mngăt Jăk mâo klei knhâo, klei thâo săng, klei thâo mĭn leh anăn klei mbruă hlăm bruă ktur kač krah. Kyuadah hđrĭng bruă ngă anei jing prŏng snăn Khua Yang ăt čuăn ruah Y‑Ôhôliap mơ̆ng găp djuê Dan jing pô đru ñu. Wăt Y‑Ôhôliap leh anăn jih jang phung ngă bruă rŭ mdơ̆ng Khua Yang brei klei thâo mĭn čiăng kơ diñu dưi ngă bruă jao (êlan 6). Bi kơ mnơ̆ng pioh ngă anôk doh jăk mâo leh phung ƀuôn sang ba myơr hŏng klei čŏng čiăng kmah snăk tơl leh jih bruă ăt adôk êbeh mơh (Klei Kbiă 36:1-7).
Hruê anei, jih jang klei brei myang khua ƀĭng kna Y‑Pôl hưn mdah hlăm dŭm trăn Klei Aê Diê Blŭ Klei Bi Mguôp Hđăp (Rôm 12:6-8; I Kôrantô 12:8-10, 28; Êphêsô 4:11) jing mta klei brei khăng tuôm hlăm ênuk anăn, ƀiădah amâo răk ênŭm jih ôh. Hlăm klei Y‑Bêsalel leh anăn phung ngă bruă mbĭt hŏng ñu mâo Yang Mngăt Jăk brei klei brei knhâo mbruă pioh mdơ̆ng Sang čhiăm brei kơ drei ƀuh klei brei myang ăt pŏk wăt kơ jih bruă myang mkăn mơh kñăm pioh mă bruă kơ Phung Sang Aê Diê leh anăn bi guh kơang kơ Anăn Aê Diê. Msĕ si ênuk anei, mâo bruă klam hlăm bruă mđung asăp, bruă bi mngač, bruă mtrang… hlăm mmông kkuh mpŭ ăt jing klei brei myang mơh. Brei grăp čô thâo kral dŭm talăng Khua Yang brei kơ drei pioh duh leh anăn lŏ bi mđĭ hĭn klei brei anăn mă bruă kơ Aê Diê.
Aê Diê brei leh kơ dua čô Y‑Bêsalel, Y‑Ôhôliap leh anăn kơ phung mbruă klei dưi ngă leh anăn klei thâo mĭn pioh bi đru ngă bruă rŭ mdơ̆ng Sang čhiăm. Khua Yang brei kơ diñu klei knhâo, mbĭt hŏng ai tiê čŏng ciăng leh anăn mâo ai tiê mtrŭt diñu nao mguôp mă bruă kơ Aê Diê. Êngao kơnăn, bruă mdơ̆ng Sang čhiăm čiăng yơh mâo mnơ̆ng mnuă, snăn Khua Yang ăt mtrŭt ai tiê kmah phung ƀuôn sang, čŏng čiăng ba myơr lu êbeh kyuadah diñu thâo săng jih jang mnơ̆ng diñu mâo kbiă hriê mơ̆ng Aê Diê leh anăn Ñu yơh pô thiê brei. Kyuanăn, tơdah mâo bruă Aê Diê čiăng, diñu hmiêt mkăp đru mguôp mbĭt dơ̆ng mơ̆ng ai ktang wăt prăk mah (Klei Kbiă 36:1-7). Hlăm ya mta bruă ăt čiăng sơăi mâo pô bi mguôp ai, pô bi mguôp prăk ngă. “tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăp kiă jăk bi mbha klei Aê Diê pap” (I Y‑Pêtrôs 4:10). Tơdah grăp čô drei thâo kral jih jang klei mbruă, klei thâo mĭn, klei knhâo leh anăn wăt ngăn drăp jing mơ̆ng Aê Diê brei sơăi, snăn drei amâo srăng ngă kĭ kơ̆ ôh čiăng myơr hŏng ai tiê kmah kơ Khua Yang.
Hŏng ya mta klei brei drei dôk bi mguôp mbĭt ngă bruă kơ Sang Aê Diê?
Wah lač: Ơ Khua Yang Pô jăk, akâo Ih đru kâo kiă kriê sĭt suôr, thâo mĭn nanao hlăm bruă lŏ bi mđĭ hĭn leh anăn yua klei pap Khua Yang brei kyua klei tŭ dưn mbĭt kơ Sang Ih.
Dlăng Klei Aê Diê Blŭ hlăm tlâo thŭn: Y‑Mika 4:3-5:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
