Klei Aê Diê Blŭ: Y‑Yakơ 1:2-4
Êlan kliăng: “Ơ phung ayŏng amai adei, tơdah diih tuôm hŏng klei lông dlăng lu mta, brei diih yap klei anăn jing klei hơ̆k mơak sơăi” (Y‑Yakơ 1:2)
Klei êmuh ksiêm mĭn: Phung đăo kơ Khua Yang srăng tuôm hŏng ya klei lông dlăng? Si ngă knuih brei drei mâo? Si ngă dưi yap klei lông dlăng jing klei hơ̆k mơak?
Hră mơĭt kơ phung đăo phung Yuđa bra đuĕ tar ƀar lăn ala, Y‑Yakơ bi mđĭ ai digơ̆ kơ knuih dôk dơ̆ng ƀơ̆ng huă tơdah tuôm hŏng klei dleh dlan, klei lông dlăng. Ñu lač klei lông dlăng digơ̆ tuôm anăn jing “klei lông dlăng lu mta”, čiăng lač mâo lu mta klei lông dlăng hŏng hnơ̆ng ktrŏ, hdjŭl mdê mdê, bi hmăi kơ djăp mta klei hlăm klei hdĭp. Hră Hêbrơ 11:35-38 yap djăp mta klei lông dlăng phung đăo kơ Khua Yang srăng tuôm, mơ̆ng klei lông dlăng djŏ kơ klei mĭn, ai tiê truh kơ asei mlei. Wăt drei pô ƀiă lu tuôm găn leh mơh đa đa klei lông dlăng anăn, tŭ klei pô mkăn djă djik djăk, bi kah hjăn, blŭ mgao kyua klei đăo, mâo đa đa tŭ klei arăng čăm biêng, bi mdjiê. Ƀiădah jih klei anăn amâo djŏ jing klei lŏ bi kngăr ôh, kyuadah Khua Yang Yêsu tuôm hưn êlâo leh snei, “hlăm lăn ala diih srăng mâo klei knap mñai” (Y‑Yôhan 16:33).
Tuôm hŏng klei dleh dlan, drei khăng čiăng êran đuĕ amâodah akâo kơ Khua Yang mă mđuĕ hĕ klei dleh dlan anăn. Ƀiădah Y‑Yakơ mtrŭt brei phung đăo yap klei lông dlăng “jing klei hơ̆k mơak sơăi”. Anăn jing klei hơ̆k mơak sĭt, klei hơ̆k mơak klă ênŭm, klei hơ̆k mơak doh êngeh. Si ngă dưi hơ̆k mơak klă ênŭm?
Boh klă gơ̆ tơdah drei thâo săng si ngă klei lông dlăng bi hmăi kơ klei đăo drei snăn drei dưi mâo klei hơ̆k mơak klă ênŭm. Y‑Yakơ amâo lač ôh hơ̆k mơak yơh, hdĭp jăk bĕ leh anăn jih jang klei srăng êgao. Ñu mblang phung đăo srăng mâo klei hơ̆k mơak kluôm ênŭm tơdah dlăng kơ boh tŭ srăng mâo êdei anăp amâo djŏ dlăng kơ klei dleh dlan ară anei hin ôh: “klei lông dlăng kơ klei diih đăo mjing klei gĭr”. Klei gĭr jing klei dưi ngă nanao ya klei pô dôk ngă leh ti krah klei dleh dlan. Hlăm klei hdĭp myang, klei gĭr čiăng lač kơ klei dôk kjăp hlăm klei đăo, dôk kjăp phĭt, amâo mâo mgei ôh, knang nanao kơ Khua Yang leh anăn ăt hdĭp tui si klei Ñu čiăng, anei jing sa hlăm dŭm mta knuih jăk mơ̆ng klei đăo, jing boh mơ̆ng Yang Mngăt Jăk (Galati 5:22). Y‑Yakơ lŏ mblang thiăm klei gĭr anăn yơh srăng đru phung đăo dưi “jing prŏng khue, klă ênŭm, amâo kƀah sa klei ôh” (êlan 4). Leh anăn – anăn yơh jing phŭn knhal sĭt čiăng drei yap djăp mta klei lông dlăng jing klei hơ̆k mơak sơăi.
Mâo đa đa hlăm phung drei dôk găn klei ktrŏ kyua prăk kăk, klei bi keh koh hdơ̆ng ung mô̆, anak čô amâo gưt asăp, amâo suaih asei mlei, bruă tuôm hŏng klei dleh dlan, tŭ klei pô mkăn ktư̆ juă, lu klei mkăn đa đa…Khua Yang amâo mtô drei hơ̆k mơak kyua klei anăn ôh. Ƀiădah tơdah drei dlăng kơ ênuk êdei anăp, boh kơ klei drei đăo leh anăn klei drei knang kơ Khua Yang, drei srăng mâo klei hơ̆k mơak leh anăn jhŏng bi tlă anăp hŏng klei truh ară anei hin čiăng dưi êbat mbĭt hŏng Khua Yang.
Si ngă klei lông dlăng leh êgao đru drei đĭ hriê kơ prŏng hlăm Khua Yang?
Wah lač: Ơ Khua Yang, Ih thâo ya klei dleh dlan kâo dôk bi tlă anăp. Akâo Ama thiăm ai ktang kơ kâo čiăng kâo dưi găn jih klei lông dlăng leh anăn đĭ hriê kơ prŏng hlăm klei đăo, leh anăn dưi bi knal hdră jăk Ih pioh leh kơ klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
