I Samuel 1:11-18
“Sư pơma pơkă khan: Ơ Kră Yang Tih Hloh, tơdah ih lăng mơnat kơ đam drŏ-kăn ih, ‘blŏk bĕ kơ inh ‘nĕ kơ hiơt kơ inh đam drŏ-kăn ih, mă-lei gô ăn kơ đam drŏ-kăn ih đei minh ‘nu kon drŏ-nglo, thoi ei inh gô ăn sư kơ ih Kră Yang đĭ chăl arih sư, ưh kơ gơh yuă dah hơkôih sŏk sư.” (I Sa-mu-ên 1:11)
Nơ̆r jet tơchĕng pơwao:
– Yă Hana năm tơ Kră Yang ‘Bok Kei-Dei, năm hăm tơdrong sư băt kơ’Bok Kei-Dei thoi yơ, tơdrong kiơ pơdrŭt sư năm, păng sư năm hăm jơhngơ̆m thoi yơ?
– Lĕch yua đơ̆ng sư năm tơ Kră Yang noh, sư iŏk đei kơ sư tơdrong kiơ?
– Đơ̆ng tơdrong mă pơdrŭt yă Hana krao khan ei, păng đơ̆ng jơhnơ̆m sư krao khan noh, tơ’blŏk kơ bơ̆n tơdrong kiơ kơplah bơ̆n krao khan?
Yă Hana hlôi chĕp tơdrong chhŭr nuih sơ’ngon sư năm ba‘bơ̆t anăp “Kră Yang rơbâu- rơngan lĭnh”, anăn Sư ‘nâu wă tơ’bôh Sư bơih tu tơm tơdrong mơsêh mơyang pran kơtang, păng tơdrong mơsêh pran kơtang noh ưh kơ tôch kiơ̆ thoi Sư wă. Anăn Sư ‘nâu hei wă khan ‘Bok Kei-Dei mơsêh mơyang hơtai oei wei pơgơ̆r tôm-tĕch tơdrong tôm-tong kơ anăn, yua kơ thoi noh, yă Hana mă khan sư tơ’bơ̆p tơdrong truh anat kiơ, thoi yơ hĭ, sư kư̆m oei lui ngeh kơ Kră Yang gơh tơplih dôm tơdrong truh anat noh. Sư năm tơkan tơ “Kră Yang rơbâu-rơngan linh” tơkan hăm tơdrong sư băt kơdih “bơngai drŏ-kăn đam Kră Yang”, dah “đĭch Kră Yang.” wă khan mĭnh ‘nu bơngai mă ưh kơ đei tơdrong gơh wă athei Kră Yang pơm ăn kơ sư mă tơdrong kiơ kiơ. Sư bơngai đĭch đam gô mơ̆ng kơ Yŏng Tơ’ngla wă đĕch. Dôm tơdrong sư krao apĭnh noh sư apinh Kră Yang lăng sư,mơnat kơ sư đĕch,sư apinh hăm jơhngơ̆m gô mơ̆ng kơ Kră Yang, chu kiơ̆ thoi Kră Yang wă đĕch,sư ưh kơ khan yua kơ sư arih ‘lơ̆ng bơih, dah mă khan sư jang kơ Kră Yang thoi ‘nâu thoi to bơih na athei Kră Yang khŏm dŏng sư, sư ưh kơ thoi ‘nei ôh.
Hlĭch dêh,‘bơ̆t yă Hana pơkă hăm Kră Yang khan tơdah Kră Yang ăn kơ sư mĭnh ‘nu kon drŏ-nglo
lei sư gô pơyơ̆r kon sư kơ Kră Yang dĭng “đĭ chăl arih”, nơ̆r pơkă ‘nâu nơ̆r pơkă Nasi rê (Jô̆ bơngai 6:1-21).Mă khan nơ̆r sư krao khan noh pơpôi gah tơdrong sư kăl wă kơdih ră mă-lei sư ưh kơ kret tơsen kiơ dah mă wă đei kơ sư đĕch ôh yua kơ sư hlôi pơkă bơih khan wă achăng lê̆ kon sư mă tŏk-bŏk oei krao khan apinh noh. Yă Hana gơh pơkă hăm Kră Yang thoi noh, yua kơ sư ‘bôh băt sư kơdih ưh kơ gơh pơm minh tơdrong kiơ, na yua kơ ‘noh, tơdah Kră Yang ăn kơ sư tơdrong kiơ ‘nei, ‘noh jơ̆ đơ̆ng Kră Yang mơnat đĕch. Yua kơ kiơ đơ̆ng blŭng-a hloi Yang Bơhngol ‘Lơ̆ng pao anăn ‘bar ‘nu kon drŏ-nglo ‘bok Hêli pơm kơnê̆ noh, na tơ âu chih roi tơdrong yă Hana pơkă pơyơ̆r kon hơ’lơ̆p sư? Yua kơ ‘lơ̆p Samuel ‘nâu đơ̆ng Kră Yang ‘Bok Kei-Dei hơmet lê̆ wă tơplih đêl anih bre kon‘bok Hêli mă arih pơm kơnê̆ noh păng tơpli đêl anih ‘bok Hêli hai mơ̆n.Yă Hana hlôi krao khan apĭnh,ưh kơ apĭnh ăn kơ sư kơdih đĕch ôh mă-lei sư apĭnh ăn tơdrong jang Kră Yang hai. Yă Hana ưh kơ hlôh yua kơ kiơ sư đei tơdrong pơlong lăng gah tơdrong sư hơwŏng ưh kơ đei hơ’lơ̆p noh, mă-lei Kră Yang băt lê̆ adrol tôm tơdrong tơ anăp păng Kră Yang rơih yă Hana wă ba ăn kon pơlei Sư mĭnh ‘nu bơngai mă Sư lăng ‘lơ̆ng tơpăt.
Ưh kơ ngê̆ gô dĭng mă yă Hana rơneh kơ nge Samuel‘mơ̆i na đei lĕch yua đơ̆ng sư krao khan noh ôh,mă-lei lĕch yua ăn kơ sư đơ̆ng rŏng kơ krao khan noh hloi, “sư weh đơ̆ng ei, sŏng-sa, muh măt sư praih hiôk pă đei sơ’ngon dơ̆ng bơih”.(tr.18). Ding truh tơ jơ noh bơih ră mă-lei yă Hana tam mă đei iŏk đei kơ sư ‘mơ̆i đơ̆ng nơ̆r Kră Yang tơl tơwih kơ sư. Mă khan lei ră, tơdrong krao khan hăm đon lui hlôi ba ăn kơ yă Hana đei jơhngơ̆m hiôk hơđơ̆ng, sư lăp đon pŭ iŏk tơdrong truh anat ‘bơ̆t năp sư; sư oei sa pơma dơnuh hăm yă Pinêna hăm jơhngơ̆m plơ̆ng ‘nao ưh kơ rơgah rơgĕnh, chhŭr nuih thoi ki hei brei mơsơ̆ bơih.Yă Hana‘nâu,tơdrong sư ‘noh, ưh kơ‘bơ̆t KrăYang ăn kơ sư đei hơ’lơ̆p dah ưh‘nei ôh, sĭn to hloh dơ̆ng, sư lui ngeh kơ tôm tơdrong tơdă ‘lơ̆ng mă Kră Yang đei hơmet mă thoi thoi yơ.
Kơkuh kơ Ih Kră Yang,apĭnh Ih bơtho ĭnh, ăn kơ ĭnh đei đon lui kơjăp iăp kơtang,đei jơhngơ̆m chu yom, ling-lang chơchă tơdrong Ih wă lăm chăl arih ĭnh. Inh krao khan yua anăn Kră Yang Yêsu Krist, Amen!
Bơ̆n pơhrăm iŏk tơdrong kiơ đơ̆ng yă Hana pơm kơmil trong ăn kơ bơ̆n lăm tơdrong krao khan?
Đŏk Sơ̆p Hla bơar ‘Bok Kei-Dei lăm pêng sơnăm: Luka 3
Kênh Youtube BHKTHN:
