Klei Aê Diê Blŭ: I Y‑Samuel 1:11‑18
Êlan kliăng: “Ñu blŭ klei ƀuăn leh anăn lač, “Ơ Yêhôwa kơ phung kahan, tơdah sĭt nik Ih srăng dlăng kơ klei knap mñai dĭng buăl mniê Ih leh anăn hdơr kơ kâo, leh anăn amâo wơr bĭt ôh dĭng buăl mniê Ih, ƀiădah srăng brei kơ dĭng buăl mniê Ih sa čô anak êkei, snăn kâo srăng brei gơ̆ kơ Yêhôwa jih jang hruê gơ̆ dôk hdĭp, leh anăn arăng amâo srăng kuêh ƀŭk gơ̆ ôh.”” (I Y‑Samuel 1:11)
Klei êmuh ksiêm mĭn: Hŏng si klei thâo săng, klei mtrŭt ai tiê, leh anăn klei mĭn H’An nao kơ Khua Yang?Ya boh tŭ dưn ñu mă tŭ? Ya klei mñă kơ drei kơ klei mtrŭt ai tiê leh anăn knuih mâo êjai wah lač?
H’An ba leh klei rŭng ênguôt ñu ti anăp “Yêhôwa kơ phung kahan”, jing Anăn iêo bi êdah phŭn leh anăn klei ktang amâo mâo knhal tui si klei Khua Yang čiăng. Anăn iêô anei mblang jing Aê Diê Ktang Myang ăt dôk kiă kriê, ksiêm dlăng jih jang klei, kyuanăn, thâodah ya mta klei truh dưn, H’An ăt đăo kơ Khua Yang mâo klei dưi bi mlih. Ñu nao kơ “Yêhôwa kơ phung kahan” hŏng klei thâo săng ñu jing “dĭng buăl mniê Ih” amâodah “hlŭn kơ Aê Diê”, sa čô mnuih amâo mâo klei dưi akâo tui si klei pô čiăng ôh, ƀiădah kluôm dhuôm tui si klei mĭn leh anăn klei čiăng jăk Khua ñu. Jih klei ñu akâo, knŏng akâo kơ Khua Yang khăp pap mđing brei kơ ñu hŏng ai tiê klei mĭn đup gưt, amâo tuôm jhŏng čoh čuăn ya mta klei čiăng BREI Khua Yang đru mtlaih ñu ôh.
Yuôm bhăn êdi, tơdah H’An ƀuăn hŏng Khua Yang, tơdah Khua Yang brei kơ ñu sa čô anak êkei, ñu srăng myơr anak kơ Khua Yang “jih jang hruê gơ̆ dôk hdĭp”, anei jing sa klei kat asei Nasirê (Klei Yap 6:1‑21). Wăt tơdah ñu wah lač akâo klei ñu pô čiăng, ƀiădah amâo mâo klei čuôt klih ôh kyuadah ñu ƀuăn rơ̆ng srăng bi ktlah hŏng anak êkei ñu dôk akâo. H’An dưi ƀuăn rơ̆ng hŏng Khua Yang msĕ snăn, kyuadah ñu thâo săng ñu amâo mâo sa mta mnơ̆ng ôh, amâo dưi ngă ya mta klei ôh, kyuanăn yơh, tơdah ya mta klei Khua Yang brei, anăn jing dŏ Khua Yang kluôm dhuôm.
Ya ngă mơ̆ng kčưm dơ̆ng, Yang Mngăt Jăk mñă anăn dua čô anak jhat ƀai Y‑Hêli, leh anăn tinei čih klei H’An ƀuăn myơr anak ñu? Kyuadah Y‑Samuel jing hdră Aê Diê mprăp pioh hrô anôk dua čô anak jhat ƀai wăt Y‑Hêli mơh. H’An kwưh akâo amâo djŏ knŏng kơ ñu pô ôh, ƀiădah wăt kơ bruă Aê Diê mơh. Ñu amâo thâo săng ôh si ngă ñu tŭ klei lông dlăng amâo mâo anak, ƀiădah Khua Yang thâo êlâo hruê êdei anăp leh anăn ruah ñu čiăng ba kơ phung ƀuôn sang Aê Diê sa čô mnuih kpă ênô mơ̆ng Aê Diê.
Amâo lŏ guôn tơl truh hruê kkiêng kơ Y‑Samuel ôh, ƀiădah boh tŭ dưn truh mtam kơ H’An leh ñu wah lač, ñu “đuĕ wĭt leh anăn ƀơ̆ng huă, leh anăn ƀô̆ mta gơ̆ amâo lŏ jing ênguôt ôh” (êlan 18). Tơl truh hlăk anăn, H’An ka mă tŭ ôh klei Aê Diê wĭt lač, ƀiădah klei wah lač hŏng klei đăo ba leh kơ ñu klei êđăp ênang, hmiêt mkăp tlă anăp hŏng klei dleh dlan, hŏng H’Pênina, hŏng ai tiê klei mĭn mrâo, amâo lŏ adôk knuih ênguôt hnĭng ôh. Klei Aê Diê brei amâodah amâo brei anak êkei amâo lŏ jing mta phŭn kơ H’An ôh, ƀiădah jing klei đăo knang kluôm dhuôm kơ hdră jăk Aê Diê.
Ya klei hriăm kơ drei mơ̆ng klei H’An bi hmô wah lač myơr jih?
Wah lač: Ơ Khua Yang, bi hriăm kâo leh anăn brei kơ kâo sa klei đăo kjăp ktang, sa klei mĭn đup gưt, tui duah nanao klei Khua Yang čiăng kơ klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
