I Kôrintô 5:1-8
“Ơ lu ‘nhŏng oh, bơ̆n băt boih ‘Bok Kei-Dei ‘mêm kơ bơ̆n tôch bơneh dang noh, na bơ̆n athei pơjao akâu bơ̆n kơ Sư, ‘nĕ pă pơm yoch, pơm kiơ̆ kơ Sư đĕch, noh na Sư lăp đon kơ bơ̆n.” (Rôm 12:1)
Nơ̆r jet tơchĕng pơwao:
– Tơdrong tih krưp ayơ đei truh tơ chăl arih lu bơngai lui tơ pơlei Kôrintô?
– Yua kơ kiơ tơdrong yoch ‘nâu kăl kơ “pơjao kơ yang satan”?
– Nơ̆r Kră Yang lăm năr ‘nâu đei bơtho chrih păng tơ’blŏk kơ bơ̆n tơdrong kiơ?
Đei minh tơdrong yoch krưp truh lăm Khul Bơngai Lui tơ pơlei Kôrintô noh tơdrong pơm pơyô kư̆kă. Tơdrong rơđah hơđăl lăm âu minh ‘nu oei kơduch mă đêl oei kơ ‘bă sư (trong 1). Iŏk akăn mă đêl oei kơ ‘bă sư ưh kơ sĭ pơm yoch trăp tih gah tơdrong arih pơm ‘lơ̆ng đĕch ôh pơma kơ tơdrong tơchĕng. tơdrong hơgăt tơ ala teh âu kư̆m ưh kơ đei drơ̆ng ôh. ‘Nâu bơih tơdrong juăt Kră Yang rơđah đei khă găn (Lêwi 18:8). Kơplah khan “Mă khan bơngai ưh kơ lui ưh kơ đei pơm thoi noh ôh” ‘Bok Pôl ‘bôh hlĭch dêh păng sơ’ngon dêh kơplah ‘bôh tơdrong yoch kơnê̆ truh lăm Khul Bơngai Lui, păng đơ̆ng tơdrong yoch noh pơm pơ’mê̆ anăn Kră Yang. Nơ̆r “Wă phak” mă ‘bok Pôl yua wă tơbăt ‘nâu bơih tơdrong tơpă minh tơdrong yoch trăp tih (trong 4). Păng pơjuăt bơngai pơm yoch kơnê̆ trŏ kơ pŭ iŏk “pơjao kơ yang satan” ăn tơdrong gleh kơ bơngai pơm yoch noh, pơdơh kơ huch sa wă kơnhăm ăn kơ bơngai pơm yoch noh tơbral kơdih tơdrong yoch wă kơ ‘Bok Kei-Dei iŏk sư kơplah năr Yêsu Krist jur ning mônh (trong 5).
Phŏ lơ wơ̆t bơ̆n khan tơdrong yoch kơnê̆ âu ưh kơ đei ‘bơm kơ lu bơ̆n ôh, yua kơ lu bơ̆n ưh kơ layơ tơchĕng wă pơm tơdrong yoch thoi ‘nâu. Apinh Kră Yang ăn kơ rim ‘nu lu bơ̆n ‘blŏk nơ̆r Kră Yang đei pơma lăm Mathiơ 5:28, “Na Inh bơtho iĕm dang ei thoi âu: Bơngai bu ‘bôh drŏ-kăn, rŏ kơ ngôi hăm sư, bơngai ‘noh yoch boih, bơngai ‘noh dang lĕ pơm kư̆ kă hăm drŏ-kăn boih.”. Kiơ̆ kơ Kră Yang hơgăt pơm pơyô kư̆kă lăm đon tơchĕng păng lăm jơhngơ̆m ‘maih wă ưh kơ ngê̆ kơ pơm tơ’bôh hloi ôh. Yua kơ thoi noh, na lu bơ̆n đei arih kơnê̆ dêh kơplah bơ̆n pơih lăng điên thoăi păng chă lăng lu rup tơ’bôh akâu hoh, lu phim đe pơdah tơngôi băl, lăng lu phim kư̆ kă pơm kơ bơ̆n ngơ̆i ngơ̆i păng nŏng kơ tơchĕng kơ sư noh.
Ưh kơ ‘bônh ôh yak kiơ̆ tơdrong hơgăt ‘lơ̆ng tơpăt Kră Yang kơplah arih lăm jơ hnơr ahrei pơm pơyô kư̆ kă mơ̆ng kơ wă, rơngei tơpă na kiơ̆ kơ tơdrong juăt lăm nơ̆r Kră Yang đe khan ưh pă trŏ bơih. Dah bơ̆n ưh kơchăng, lei lu bơ̆n kư̆m dai khan dôm tơdrong yoch pơm pơyô kư̆ kă adrol kơ tơ oei băl, dah tơ oei băl tơduă drŏnglo dah tơduă drŏkăn bơ̆n lăng hmă đĕch hăm tơdrong mă “pơm liơ tơ ‘mêm băl tơduă jê̆ huay bơih”, nhen thoi lu bơngai ưh kơ lui khan thoi noh.
Athei băt hơđăl, adrol kơ lui kơ Kră Yang, đei lơ bơngai pơm kơ akâu sư lăm tơdrong kư̆ kă, ‘bok Pôl bơtho bơngai lui tơ pơlei Rôm “pơyơ̆r akâu bơ̆n pơm tơmam soi arih păng rơgoh.” Đơ̆ng lăm tơdrong tơplih đon tơchĕng hăm tơdrong pơm ‘lơ̆ng dôm tơdrong kiơ bơ̆n đei lăm đon tơchĕng bơ̆n dah đei tơdrong kơnê̆ ưh kơ ‘lơ̆ng kiơ lăm đon tơchĕng, lăm chăl arih ŭnh om lu bơ̆n. Apinh Kră Yang ăn kơ lu bơ̆n jơhngơ̆m pơ̆n nuih ‘nĕ pă pơm hŭt đĭ.
Ơ Kră Yang, apinh Ih tơgŭm inh tơplih jơhngơ̆m đon tơchĕng rim năr hăm tơdrong ’blŏk răk nơ̆r Ih păng pơm ‘lơ̆ng rơgoh, ‘lơ̆ng hơiă lăm Ih. Apinh Ih tơgŭm inh arih ‘lơ̆ng rơgoh mă đơ̆ng lăm đon tơchĕng păng pơm tơ’bôh. Krao khan yua anăn Kră Yang Yêsu Krist, Amen.
Rim năr, lu bơ̆n wei rong đon tơchĕng bơ̆n hăm nơ̆r Kră Yang dah mă đơ̆ng lăm mang Internet teh đak?
Đŏk sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 19
Kênh Youtube BHKTHN:
