II-Kauleethaus 1:8-11
Nqe cim:
“Kuv muab siab npuab Vajtswv tib leeg xwb, nws thiaj yog tus uas kuv cia siab” (Phau Ntawv Nkauj 62:5).
Lus nug rau sawvdaws xav:
- Timthawj Paulus hais txog tej kev txomnyem uas nws ntsib zoo licas?
- Nyob rau lub tsamthawj zoo li ntawd Paulus cia siab rau qhovtwg?
- Vim licas Paulus caw cov ntseeg thov Vajtswv pab nws?
- Peb cia siab rau tus Tswv ntawm tej lub tsamthawj zoo licas?
Ib tsoom cov mloog txhua tus,
Cov lus qhib thawj hauv tsab ntawv II-Kauleethaus, Timthawj Paulus tsis hais meej txog nws tabtom raug yam kev txomnyem twg, tiamsis peb paub hais yog ib yam kev txomnyem kawg nkaus uas Paulus raug thaum nws nyob pem lub xeev Axias, nws hais tias “tiv yuav luag tsis dhau”, nws “xav hais tias peb yeej yuav tuag xwb” (nqe 8). Paulus raug txomnyem hnyav kawg tiv yuav luag tsis dhau, nws yuav luag tuag zoo ib yam li tus neeg uas raug txim tuag uas tsis muaj ib txojkev vam nyob qhov twg. Thiab Paulus hais txog qhov uas nws ntsib hais tias, thaum nyob lub tsamthawj yuav tuag zoo li ntawd, nws tsis muaj kev vam siab rau tus kheej lawm. Timthawj Paulus qhia paub hais tias lub sijhawm ntawd nws tsuas cia siab rau Vajtswv tus muaj hwjchim paub nws txojsia thiab txojkev tuag thiaj yuav cawm tau nws xwb. Tsis yog nyob lub tsamthawj zoo li ntawd Paulus thiaj vamkhom Vajtswv, hais txog Vajtswv hais tias, “Nws tseem yuav pab peb mus lawm yav tom ntej” (nqe 10), txhais tau hais tias Paulus tseem cia siab rau Vajtswv ntxiv mus lawm yav tom ntej kom nws tau txais tus Tswv txojkev pab. Yog li ntawd, Paulus nqua hu Vajtswv cov menyuam hauv Pawg Ntseeg Kauleethaus pab nws los ntawm kev thov Vajtswv pab, vim Paulus ntseeg hais tias coob leej thov Vajtswv pab, nws yuav tau txais kev tau zoo thiab coob leej yuav ua Vajtswv tsaug thaum Vajtswv teb lawv tej lus thov (nqe 11).
Vajtswv Txojlus qhia hais tias “cia li muab nej tej kev nyuaj siab huv tibsi tso plhuav rau Vajtswv” (I Petus 5:7). “Tej kev nyuaj siab”, tsis hais yam ntawd yuav loj thiab me los xij. Tig rov los ua tib zoo saib peb lub neej, peb yuav tsum lees paub hais tias, muaj ntau zaus peb tsuas cia siab rau Vajtswv thaum peb siv zog ua tas zog tsis tau lawm xwb. Txawm li ntawd los, Vajtswv Leej Txiv tus uas muaj lub siab ntev Nws xav kom peb los cuag Nws, cia siab rau Nws thaum peb ntsib kev nyuaj siab ib yam li tus menyuam paub los vamkhom nws leej txiv. Vim txojkev vam khom tus Tswv thiab los ntawm cov ntseeg tej lus thov, tus Tswv yuav pab peb txawm yog peb yuav raug tej kev txomnyem loj thiab me.
Yam uas peb pheej nyiam ua yog thaum tau zoo noj tau zoo nyob yog sijhawm xav ua ywj siab, thaum raug kev txomnyem nyuaj siab yog sijhawm peb los vamkhom Vajtswv uas yog lub chaw cia siab. Peb tsis txhob los cuag tus Tswv thaum peb ntsib tws kev xwb, tiamsis yuav tsum niaj hnub cia siab rau Vajtswv thiab ib leeg thov Vajtswv pab rau ib leeg kawg siab kawg ntsws kom peb niaj hnub nyob hauv tus Tswv thiab Nws nyob hauv peb. Tus Tswv uas cawm peb Nws kuj yuav niaj hnub yuav cawm peb thaum peb ua neej nrog Nws.
Thov Vajtswv,
Vajtswv tus muaj hwjchim! Thov Koj pab kom nyuam yaus niaj hnub cia siab ntsoov rau Koj thiab paub thov Koj pab rau cov kwvtij ntseeg, kom txhua tus tau txais Koj txojkev pab thaum ntsib kev txomnyem nyuaj siab. Amees.
Ib tsoom cov mloog uas hmov thiab tshua,
Peb puas cia siab rau Vajtswv ntawm txhua lub sijhawm?
Nyeem Vajluskub hauv peb lub xyoo: Exethaws 2
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
