Ntawv Nkauj 1:4-6
Nqe cim:
“Tus TSWV saib xyuas cov neeg ncaj ncees thiab coj lawv txoj hau kev, tiamsis cov neeg ua phem tabtom taug txojkev puastsuaj.” (Ntawv Nkauj 1:6).
Lus nug rau sawvdaws xav:
- Tus sau Ntawv Nkauj hais txog tus neeg phem yuav xaus li cas?
- Lawv yuav ntsib dab tsi rau hnub uas tus Tswv txiav txim?
- Peb tau kev qhuab ntuas li cas thaum hnov tus Tswv tej lus hais rau cov neeg phem thiab hnub txiav txim?
Ntawv Nkauj tshooj ib hais txog ob yam sib txawv ntawm tibneeg kev xaiv ua neej, yam ib yog hais txog cov neeg uas tau tus Tswv foom koob hmoov (nqe 1-3), yam ob yog hais txog cov neeg phem uas tsis tau txais tus Tswv tej koob hmoov (nqe 4-6). Vajluskub qhia meej hais tias, cov neeg phem yeej tsis tau txais lub neej zoo los ntawm tus Tswv, lawv lub neej tsis muaj qab hau thiab yuav zoo ib yam li tej npluag nplej uas raug cua ntsawj ya ri niab. Thaum nyob ntawm tus Tswv txoj cai ncaj ncees thiab Vajtswv tus dawbhuv ces cov neeg phem yuav: “cais tawm ntawm Vajtswv haivneeg” vim lawv tsis phim lossis tsis txaus peevxwm, thiab lawv yuav tsis tau nrog cov neeg ncaj ncees sawv ua ke tos txais Vajtswb koob hmoov. Thiab cov neeg phem yeej tsis tau mus rau hauv cov neeg ncaj ncees qhov chaw nyob. Nqe xaus hauv Ntawv Nkauj tshooj ib, tus sau hais tias: “tus Tswv saib xyuas” xav qhia hais tias, tus Tswv paub meej txhua tus lub siab xav thiab kev ua neej, tsis hais ua zoo lossis ua phem, tus Tswv muab nqi zog thiab rau txim ncaj ncees rau txhua tus, tsis muaj leejtwg yuav cam tau ib yam dab tsis thaum sawv ntawm Vajtswv xub ntiag. Tswv Yexus kuj siv ob yam uas yog “yaj thiab tshis” sau hauv Mathais 25:31-46 los qhia txog tus neeg ncaj ncees thiab tus neeg phem puavleej sawv ntawm rooj txiav txim, tiamsis tus neeg phem raug txim mus ibtxhis tus neeg ncaj ncees tau txais txoj sia ntev dhawv mus ibtxhis.
Peb sawvdaws yeej tsis muaj tus yuav xav kom yus plam koob hmoov, tsis muaj leejtwg yuav xav kom yus yog “neeg phem” ntawm Vajtswv xub ntiag, uas yuav txais kev txomnyem ibtxhis hauv hnub Vajtswv txiav txim. Peb yuav tau tig rov mus saib peb lub neej hauv xyoo dhau los, raws li Vajtswv tus cai ntsuas, saib peb puas yog ib tus “neeg phem” lossis yog “neeg ncaj ncees”? Nco ntsoov hais tias, tus Tswv paub meej meej peb txhua yog neeg zoo li cas; “Tsis muaj ib yam dabtsi uas neeg yuav muab ntis tau tsis pub Vajtswv pom. Ib puas tsav yam uas Vajtswv tsim los lawm Vajtswv yeej pom huv tibsi, thiab peb txhua tus nyias yuav tsum piav nyias lub neej qhia rau Vajtswv.” (Henplais 4:13). Thiab Tswv Yexus hu peb sau hauv Mathais 4:17b hais tias: “Nej cia li tso nej tej kev txhaum tseg, rau qhov Ntuj Ceebtsheej twb los ze lawm!”
Mus txais lub xyoo tshiab, rov tig saib tej xwm txheej muaj hauv xyoo dhau los zoo li, mob kis, av qeeg, dej nyab, kev tsov rog thiab kev tshaib nqhis… tsimnyog peb tsim dheev los ceevfaj thiab pab lwm tus ceevfaj, rau qhov twb yuav txog hnub kawg thiab txhua tus tsis hais ua ncaj ncees lossis ua phem puavleej yuav mus sawv ntawm Vajtswv lub rooj txiav txim. Peb lub neej qhia tshwm peb kev ntseeg, thiab peb yuav tau txhais txoj sia ibtxhis lossis raug txim mus ibtxhis yog los ntawm peb kev ua lub neej fwm Vajtswv lossis tsi fwm thaum tseem muaj sia nyob hauv ntiajteb no. Thov tus Tswv pab kom peb pheej xav txog Ntawv Nkauj tshooj ib thaum pib hauv lub xyoo tshiab kom peb paub ceevfaj ua lub neej kom zoo hauv txhua hnub.
Los ntawm Ntawv Nkauj tshooj ib, ntuas peb txog yam dab tsi ntau nyob hauv lub xyoo tshiab no?
Thov Vajtswv,
Tus Tswv, pib hauv lub xyoo tshiab, thov pab nyuam yaus ua neej nrog Koj tsis ncaim kom nyuam yaus tau txais Koj tej koob hmoov hauv lub neej tiam no thiab tiam tom ntej tau txais nqi zog ntawm Koj. Amees.
T Nyeem Vajluskub hauv peb lub xyoo: II.Xwmtxheej Vajntxwv 9
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
