Nkauj Quaj Ntsuag 3:31-38
Nqe cim:
“Tus Tswv yog tus muaj kev hlub thiab nws yuav tsis tso peb tseg mus ibtxhis. Txawm yog nws ua rau peb raug kev ntxhov siab los nws yeej hlub peb raws li nws txojkev hlub uas ruaj khov.” (Nkauj Quaj Ntsuag 3:31-32)
Lus nug rau sawvdaws xav:
– Lub hauvpaus kev cia siab ntawm cov Yixalayees yog dabtsi?
– Tus Cevlus Yelemis qhia tus Tswv haivneeg rov nco txog yam dabtsi ntawm tus Tswv kom lawv muaj kev cia siab rau Nws?
– Peb lub hauvpaus kev cia siab thaum ntsib kev txomnyem yog dabtsi?
Tus Cevlus Yelemis rov nqua hu tus Tswv haivneeg cia li vamkhom tus Tswv. Nws sau tawm tej kev cia siab kom tus Tswv haivneeg ntsia pom thiab muaj kev cia siab rau tus Tswv. Tej lus nqua hu no muaj kev txhawb zog kawg li. Tej lus ntawd yog, “Tus Tswv yog tus muaj kev hlub thiab nws yuav tsis tso peb tseg mus ibtxhis”, “Nws yeej hlub peb raws li nws txojkev hlub uas ruaj khov”,… Tej lus no qhia rau tus Tswv haivneeg pom tias kev cia siab tseem kaj lam lug txawm lawv tabtom nyob rau lub tsamthawj cuag li tsaus ntuj nti.
Yam xubthawj, tus Cevlus Yelemis qhia rau sawvdaws nco ntsoov hais tias, “Tus Tswv yog tus muaj kev hlub thiab nws yuav tsis tso peb tseg mus ibtxhis” (nqe 31). Ntawd yog tus Tswv lo lus cogtseg tseemceeb heev pub rau Nws haivneeg, kuj yog lub hauvpaus kev cia siab ruaj khov kom lawv muaj kev cia siab ntsoov rau tus Tswv txojkev pab cawm thiab rov txhim kho lawv raws li tus Tswv hais tias: “Kuv tso koj tseg ib nyuag ntu xwb, vim kuv hlub koj heev, kuv yuav coj koj rov los” (Yaxayas 54:7). Yam txuas ntxiv, vim hlub tshua tus Tswv haivneeg, Nws rau txim rau lawv tej kev txhaum kom lawv tso kev txhaum tseg. Ntawd yog yam yuav tsum ua vim tus Tswv yog tus muaj kev hlub tiamsis Nws kuj yog Tus dawbhuv, ncaj ncees. Nws ua rau lawv nyuaj siab txhawj ntsai, tiamsis Nws txojkev hlub pub rau lawv loj kawg nkaus li, Nws yeej tseem hlub tshua, pab cawm thiab yuav rov txhim kho lawv. Tus Cevlus Yelemis qhia rau tus Tswv haivneeg paub hais tias qhov uas lawv tiv kev txomnyem zoo li ntawd tsis yog vim tus Tswv muaj pluaj siab xav cia lawv raug tej ntawd. Tiamsis yog vim thaum pom tej kev ua tsis ncaj, txiav txim tsis ncaj ncees, raug lwm tus caij tsuj, ces Vajtswv tsis txaus siab (nqe 34-36). Vajtswv tsis zoo siab thaum pom kev tsis ncaj ncees tshwmsim hauv lub qab ntuj. Nws yog tus tswjkav txhua yam tabtom tshwm sim, vim “kev zoo thiab kev phem los ib yam nkaus, puavleej yog tus Tswv uas muaj hwjchim loj kawg nkaus hais thiaj li muaj”, thiab “tsuas yog tej uas haum tus Tswv siab xwb thiaj li ua tau” (nqe 37-38). Tej lus no tsis muaj lub ntsiab hais tias tus Tswv txaus siab cia Nws haivneeg tiv tej kev tsis ncaj ncees nyob lwm haivneeg tebchaws thaum lawv ua tsis ncaj ncees rau Nws haivneeg, tiamsis ntawd yog yam Vajtswv cia tshwm muaj vim yog Nws haivneeg tej kev txhaum.
Nyob hauv lubneej txawm yuav ntsib kev tau zoo lossis txomnyem, yam nplig tus Tswv cov menyuam siab yog tus Tswv yeej yuav hlub tshua thiab nrog nraim peb txhua hnub. Tsis txhob saib ntsoov mus rau tej teebmeem peb raug ua rau peb poob siab, qaug zog, tiamsis yuav tsum tsa muag saib mus rau tus Tswv txojkev ua ncaj thiab txojkev hlub. Tus Tswv yog tus rau txim ncajncees tiamsis Nws tsis tso ib tug twg tseg ibtxhis. Thov tus Tswv pab peb niaj hnub ruaj siab nrog Nws mus txog thaum kawg.
Thov Vajtswv,
Tus Tswv, thov ua Koj tsaug vim Koj txojkev hlub loj thiab npluamias niaj hnub nrog nraim nyuam yaus, Koj tsis tso nyuam yaus tseg txawm yog nyuam yaus yuav raug tej kev txomnyem, sim siab. Thov pab nyuam yaus ruaj siab nrog Koj mus txog tom kawg. Nyuam yaus tuav Yexus Khetos lub npe thov, Amees.
Yam dabtsi pab peb ruaj siab nrog tus Tswv mus txog tom kawg?
Nyeem Vajluskub hauv peb lub xyoos: II Kevcai 28
Kênh Youtube BHKTHN:
