Klei Aê Diê Blŭ: Klei Čŏk Hia 3:31-38
Êlan kliăng: “Kyuadah Yêhôwa amâo srăng hngah nanao ôh, wăt tơdah Ñu bi truh klei ênguôt, Ñu srăng pap brei tui si klei khăp sĭt suôr Ñu êbeh dlai” (Klei Čŏk Hia 3:31-32)
Klei êmuh ksiêm mĭn: Ya phŭn đăo knang kơ phung ƀuôn sang Israel? Khua pô hưn êlâo Y-Yêrêmi mñă kơ phung ƀuôn sang Aê Diê hdơr ya klei kơ Aê Diê čiăng kơ diñu kjăp ai tiê đăo knang kơ Ñu? Kơ drei knang tơdah tuôm hŏng klei dleh dlan?
Khua pô hưn êlâo Y-Yêrêmi lŏ dơ̆ng iêô phung ƀuôn sang Aê Diê brei knang kơ Yêhôwa. Ñu ktrâo kơ digơ̆ lu klei čang hmăng čiăng kơ phung ƀuôn sang Aê Diê dưi thâo ƀuh leh anăn lŏ dơ̆ng dưm klei čang hmăng hlăm Aê Diê. Boh blŭ yua hlăm klei iêô mthưr anei bŏ hŏng klei mđĭ ai, anăn jing “Yêhôwa amâo srăng hngah nanao ôh”, Ñu “srăng pap brei”, “klei khăp” sĭt suôr ñu êbeh dlai… Klei anei bi êdah kơ phung ƀuôn sang Aê Diê ƀuh klei čang hmăng ăt adôk mâo wăt tơdah boh klei diñu dôk tuôm msĕ si bŏ hŏng mmăt tĭt.
Êlâo hĭn, ñu mñă kơ grăp čô hdơr, “Kyuadah Yêhôwa amâo srăng hngah nanao ôh” (êlan 31). Anei jing klei ƀuăn bŏ hŏng yuôm bhăn Yêhôwa brei kơ phung ƀuôn sang Ñu, ăt jing phŭn đăo knang kjăp čiăng kơ diñu lŏ dơ̆ng čang hmăng klei bi mtlaih leh anăn klei bi mrâo mơ̆ng Aê Diê: “Kâo lui ih leh bhiâo, ƀiădah hŏng klei pap prŏng kâo srăng lŏ iêô ih” (Y-Êsai 54:7). Leh anăn, kyua khăp kơ phung ƀuôn sang Aê Diê anăn Ñu bi kmhal diñu čiăng diñu kmhal klei ngă soh. Anei jing klei brei ngă kyua Aê Diê bŏ hŏng klei khăp ƀiădah Ñu ăt jing Pô doh jăk, kpă ênô. Ñu ngă kơ digơ̆ ênguôt hnĭng ƀiădah klei Ñu pap srăng ăt dôk êbeh dlai hŏng digơ̆, Ñu ăt khăp, đru leh anăn bi mrâo digơ̆. Khua pô hưn êlâo Y-Yêrêmi brei phung ƀuôn sang Ñu thâo bruă diñu tŭ klei dleh dlan snăn amâo djŏ kyua Ñu čiăng ôh, Kyua tơdah ƀuh arăng bi wê klei kpă ênô, phat kđi amâo mtăp mđơr, phung ktang ktư̆ kjuă phung awăt, snăn Aê Diê amâo tŭ ôh (êlan 34-36). Aê Diê amâo mơak ôh ƀuh klei amâo mtăp mđơr anei ti dlông lăn. Ñu kiă kriê nanao djăp mta klei dôk mâo, kyua “Amâo djŏ hĕ mơ̆ng ƀăng êgei Pô Ti Dlông Hĭn kbiă hriê klei jăk leh anăn klei jhat”, Aê Diê mtrŭn asăp, klei anăn srăng jing sĭt (êlan 37-38). Klei anei amâo djŏ jing Ñu tŭ ư čiăng kơ phung ƀuôn sang Aê Diê tŭ klei amâo mtăp mđơr mâo ti lăn ala tač êngao ôh tơdah arăng ngă jhat kơ phung ƀuôn sang Ñu, ƀiădah anăn jing bruă Aê Diê brei truh kyua klei soh phung ƀuôn sang Ñu.
Hlăm klei hdĭp wăt tuôm hŏng klei jăk amâodah dleh dlan, klei bi juh phung ƀuôn sang Aê Diê jing Ama khăp hơiêng ăt hrăm mbĭt hŏng drei grăp hruê. Đăm dlăng ôh kơ klei truh leh anăn êdu ai, lĕ hlăm klei soh, ƀiădah brei kngưr ală dlăng kơ klei sĭt suôr, klei pap Aê Diê. Pô kpă ênô bi kmhal ƀiădah Ñu amâo lui hlei pô lă lar ôh. Akâo kơ Aê Diê brei kơ drei kjăp ai tiê êbat hŏng Khua Yang truh knhal tuč.
Ya klei đru drei kjăp ai tiê tui hlue Khua Yang truh knhal tuč?
Wah lač: Ơ Khua Yang, bi mni kơ Ih kyua klei khăp êbeh dlai leh anăn klei pap prŏng prĭn Ih dôk mbĭt hlăm klei hdĭp kâo, Ih amâo tuôm lui kâo ôh wăt tơdah kâo dôk hlăm klei truh, lông dlăng. Akâo kơ Ih đru kâo kjăp ai tiê tui hlue Khua Yang truh knhal tuč.. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
