Jôsuê 1:10-18
“Ơ ‘nhŏng oh, inh wă bơtho iĕm thoi âu: Đĭ đăng kơ bơ̆n minh khul lui kơ Kră Yang Yêsu Krist, bơ̆n athei tơguăt băl minh jơhngơ̆m, pơm pôm ‘bơ̆r đon mă hơnơ̆ng wă kơ bơ̆n huay kơ tơklah băl.”
(I Kôrintô 1:10)
Nơ̆r jet tơchĕng pơwao:
– ‘Bok Jôsuê athei lu bơngai wei lăng, kon pơlei, păng khan kơ adrĕch Rubên adrĕch Gat păng minh puăt adrĕch Manase athei pơm kiơ?
– Sư tơ’bôh tơdrong pôm jơhngơ̆m đon thoi yơ?
– Tơdrong pôm jơhngơ̆m đon gĭt kăl lăm Khul Bơngai Lui thoi yơ?
Đơ̆ng rŏng kơ nơ̆r Kră Yang athei tơtă, ‘bok Jôsuê athei lu bơngai wei lăng kon pơlei, athei hơmet lê̆ tơmam sa yua kơ pă pêng năr boih lu iĕm gô yak tŏk găn kơ đak Krong Jôrđăn. Sư kư̆m pơkă kơ adrĕch Rubên, adrĕch Gat păng minh puăt adrĕch Manase, ‘nâu lu adrĕch mă ‘bok Môist ăn kơ lu sư gơh oei tơ gah hơlĕch kơ Krong Jôrđăn. Sư tơ ‘blŏk kơ đêl nơ̆r Môis, đĭch đam Kră Yang đei pơkă, sư khan: Kră Yang ‘Bok Kei-Dei gô ăn kơ lu iĕm hiôk-hian păng đei pơkă ăn boih kơ lu iĕm teh đak âu. (trong 12-15); Bơtho Khôi juăt 3:12-20). Jơ ‘nâu sư ưh kơ kuăr ti lăng ‘nhŏng oh sư yak hlôi kơ Krong jôrđăn wă năm tơblah. Yua kơ thoi noh, lu bơngai drŏnglo pran pơm linh chĕp tơmam tơblah, hơdai năm tơblah iŏk teh đak Kră Yang Pơkă. Ding truh tơ adrĕch nai kư̆m dai đei iŏk dêh char Kră Yang pơkă ăn, arih oei hloi, jang sa, arih lăm tơdrong hiôk rơngei, na bơngai khul adrĕch ‘nâu gơh đei tơmam sư kơdih.
Dôm lu nơ̆r ‘bok Jôsuê pơma tơ‘bôh kơ sư hiơ̆k dêh gah tơdrong pôm jơhngơ̆m đon lăm đĭ đăng kră kon pơlei Kră Yang. Sư wă kơ đĭ đăng lu adrĕch kư̆m dai wang tơblah dŏng tơgŭm kơnhăm wă kơ jah đei anih teh ră Yang pơkă. Tơdrong pôm jơhngơ̆m đon ưh kơ đei ‘bôh ‘bơ̆t tơduă kon pơlei Kră Yang ‘mêm băl đĕch mălei kư̆m ‘bôh lăm tơdrong tơ’bưh băl kon pơlei Kră Yang păng bơngai pơgơ̆r. Kơplah lu sư kơtơ̆ng nơ̆r Jôsuê pơma, lu bơngai wei lăng păng bơngai đơ̆ng adrĕch Rubên, Gat păng Manase đĭ đăng pôm jơhngơ̆m đon chu yom păng pơm kiơ̆ hloi hăm tơdrong lu sư pơkă dah bu ưh kơ chu kiơ̆ nơ̆r sư khan athei pơlôch sư hloi yua kơ sư pơm yoch hăm Kră Yang, thoi ‘bok Môis đei khan: “Tơdah iĕm ưh kơ pơm kiơ̆ thoi noh, lu iĕm gô pơm yoch ‘bơ̆t anăp Kră Yang , iĕm athei băt tơdrong yoch noh gô tuh tơ kơpal kơ̆l lu iĕm.” (Jô̆ bơngai 32:23). Lu sư kư̆m pơlung ‘bok Jôsuê “athei chơ̆n jơhngơ̆m nuih pran”, nhen thoi Nơ̆r Kră Yang đei pơlung sư.
Lu bơ̆n đơ̆ng nơ̆r tơtă athei đơ̆ng ‘bok Jôsuê, nơ̆r pơma păng nơ̆r pơkă pêng khul adrĕch gah hơlĕch kơ Krong Jôrđăn hăm nơ̆r pơma pơlung ‘bok Jôsuê, đĭ đăng tă kơ lĕch đơ̆ng Kră Yang păng đơ̆ng nơ̆r Sư tơtă athei, na lu sư pôm jơhngơ̆m đon lăm Kră Yang. Tơdrong pôm jơhngơ̆m đon lu Bơngai lui kơ Kră Yang dang ei kăl kơ đei lăm Bơngai Lui wă kơ gơh đei tơdrong kơnhăm kiơ̆ thoi Kră Yang wă. Lơ wơ̆t bơ̆n pơma pôm jơhngơ̆m đon mălei oei tơklah băl, tơklah thoi Khul Bơngai Lui tơ Kôrintô adrol noh, yua kơ hlôh hơwơ̆l khan pôm jơhngơ̆m đon hăm bơngai bu tơchĕng noh. Tơdrong pôm jơhngơ̆m đon ưh kơ trŏ khan tơchĕng lei lăi băl kiơ̆ kơ kon bơngai mălei ‘noh minh jơhngơ̆m đon kiơ̆ thoi Kră Yang. Tơdah rim ‘nu bơngai ‘blŏk kơ Nơ̆r Kră Yang bơtho, nơ̆r bơ̆n pơkă hăm Kră Yang, pơlung dih băl hăm Nơ̆r Kră Yang lei đĭ đăng tơchĕng tơ Kră Yang ngăl, lăng tơ anăp na kơdâu, kơplah rim ‘nu gô pôm jơhngơ̆m đon wă wang hơdai awih awăn kơ Kră Yang hăm tơdrong ‘lơ̆ng hloh.
Ơ Kră Yang, apinh Ih ăn kơ inh đei jơhngơ̆m iơ̆m dim, ‘mêm mơnat wă kơ wang pôm jơhngơ̆m đon lăm Yang Bơhngol ‘Lơ̆ng, hơdai băl bơ̆jang kơ Kră Yang lăm Khul Bơngai Lui, krao khan yua anăn Kră Yang Yêsu Krist, Amen.
Lu bơ̆n tam pôm jơhngơ̆m đon lăm Khul Bơngai Lui trŏ thoi Nơ̆r Kră Yang bơtho ưh?
Đŏk Sơ̆p Hla bơar ‘Bok Kei-Dei lăm pêng sơnăm: Ê-xê-chi-ên 22
Kênh Youtube BHKTHN:
