Klei Aê Diê Blŭ: Y -Yôsuê 1:10-18
Êlan kliăng: “Ơ phung ayŏng adei, kâo kwưh kơ diih hŏng anăn Khua Yang drei Yêsu Krist, brei jih jang diih blŭ klei msĕ, leh anăn đăm mâo klei bi kah mbha ôh hdơ̆ng diih, ƀiădah brei mâo klei bi mguôp hlăm sa klei mĭn leh anăn sa ai” (I Kôrantô 1:10)
Klei êmuh ksiêm mĭn: Ya bruă Y–Yôsuê mtă kơ phung khua ƀuôn sang, phung ƀuôn sang, leh anăn phung Ruben, kơ phung Gat, leh anăn kơ sa mkrah phung găp djuê Manasê? Si diñu bi êdah klei sa ai tiê? Si klei yuôm bhăn klei sa ai hlăm Phung Sang Aê Diê?
Tơdah mă tŭ leh klei Khua Yang mtă, Y-Yôsuê mtă kơ phung khua ƀuôn sang mtrŭn asăp kơ phung ƀuôn sang mprăp mnơ̆ng ƀơ̆ng huă čiăng kơ tlâo hruê dơ̆ng srăng găn êa krông Yurdan. Ñu ăt mtă mơh kơ phung Ruben, kơ phung Gat, leh anăn kơ sa mkrah phung găp djuê Manasê, jing dŭm phung mâo Y-Môis brei dôk ti nah ngŏ êa krông Yurdan. Ñu lŏ mñă wĭt klei Y-Môis blŭ hlăk mbha krĭng lăn anei kơ diñu (êlan 12-15; Klei Mtô Mñă Klei Bhiăn 3:12-20). Ară anei diñu amâo dưi kuăl kngan dôk dlăng ayŏng adei pô găn êa krông čiăng bi blah. Kyua anăn phung êkei jhŏng djă kdrăp mnơ̆ng bi blah mŭt kahan, hrăm mbĭt nao mă Lăn Aê Diê Ƀuăn. Truh kơ êpul mkăn ăt mâo mă krĭng lăn Khua Yang ƀuăn, hơĭt anôk dôk, mă bruă knuă, hdĭp hlăm klei êđăp ênang, snăn kơh mnuih hlăm êpul anei dưi wĭt dưn ngăn drăp pô.
Klei Y-Yôsuê blŭ brei ƀuh ñu mđing kơ klei sa ai hlăm jih jang phung ƀuôn sang Aê Diê. Ñu čiăng kơ jih jang phung hrăm mbĭt bi blah mbĭt čiăng dưi ngă klei kñăm plah mmiă krĭng lăn Aê Diê ƀuăn. Klei sa ai amâo djŏ knŏng ƀuh plah wah dŭm phung anăn ôh ƀiădah lŏ ƀuh hlăm klei bi mguôp plah wah phung ƀuôn sang leh anăn khua gĭt gai. Tơdah hmư̆ Y -Yôsuê lač, phung khua ƀuôn sang leh anăn phung Ruben, kơ phung Gat, leh anăn phung găp djuê Manasê sa ai gưt asăp leh anăn bi êdah klei sĭt suôr hŏng klei ƀuăn tơdah amâo gưt asăp ñu mtă snăn srăng tŭ klei djiê kyua diñu ngă soh hŏng Khua Yang, msĕ si klei Y-Môis lač leh: “Ƀiădah tơdah diih amâo srăng ngă snăn ôh, diih ngă soh leh hŏng Yêhôwa; leh anăn brei diih thâo sĭt klei soh diih srăng bi êdah” (Klei Yap 32:23). Diñu ăt mđĭ ai Y-Yôsuê “Knŏng brei ih jing ktang leh anăn mâo ai tiê jhŏng”, msĕ si Klei Aê Diê Blŭ mđĭ ai leh ñu.
Drei ƀuh mơ̆ng dŭm asăp Y-Yôsuê mtrŭn, klei blŭ leh anăn klei ƀuăn tlâo phung nah ngŏ êa krông Yurdan mbĭt hŏng klei diñu mđĭ ai Y-Yôsuê, jih jang kbiă hriê mơ̆ng klei Aê Diê čiăng leh anăn asăp mtă mơ̆ng Aê Diê, kyua anăn diñu mâo leh klei sa ai hrăm mbĭt hlăm klei Khua Yang čiăng. Klei sa ai jing klei phung đăo kơ Krist hruê anei brei mâo hlăm Phung Sang Aê Diê čiăng dưi mâo klei kñăm Aê Diê čiăng. Lu blư̆ drei lač sa ai ƀiădah ăt bi kah mbha, mbha êpul msĕ si Phung Sang Aê Diê Kôrantô hlăk đưm, kyua thâo săng čhuai klei sa ai jing sa ai hŏng klei čiăng kơ sa čô mnuih. Klei sa ai amâo djŏ jing sa ai mbĭt hlue si klei anak mnuih čiăng ôh ƀiădah sa ai sa klei mĭn hlue si klei Khua Yang čiăng. Tơdah grăp čô sa ai djă pioh Klei Khua Yang mtô, klei drei ƀuăn hŏng Aê Diê, bi mđĭ ai hdơ̆ng drei hŏng Klei Aê Diê Blŭ snăn jih jang mđing sơăi kơ Khua Yang, êran kñăm kơ anôk bi kčah, hlăk anăn grăp čô mđrăm mbĭt sa ai čiăng mă bruă kơ Khua Yang hŏng klei jăk hĭn.
Drei bi êdah djŏ ai tiê sa ai hlăm Phung Sang Aê Diê msĕ si Klei Aê Diê Blŭ mtô leh mơ̆ ka?
Wah lač: Ơ Khua Yang, akâo kơ Ih đru kâo mâo djăp klei luă gŭ, klei khăp čiăng hrăm mbĭt sa ai hlăm Yang Mngăt Jăk, sa ai mă bruă kơ Ih hlăm Phung Sang Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
