Rôm 11:25-36
“’Bok Kei-Dei jô̆ đĭ đăng bơngai yoch ngăl, na Sư ‘mêm Sư wă tơgŭm đĭ rim khŭl kon bơngai.” (Rôm 11:32)
Nơ̆t jet tơchĕng pơwao:
– ‘Bok Pôl đei roi tơdrong hlơp gah lăm tơdrong dŏng pơklaih đơ̆ng ‘Bok Kei-Dei ăn kơ kon pơlei mă Sư đei rơih hăm bơngai ưh kơ lu bơngai Israel noh thoi yơ?
– Lu bơ̆n đei pơhrăm tơdrong kiơ lăm tơdrong Kră Yang mă ‘mêm kơ bơ̆n tih dêh?
– Lu bơ̆n đei pơhrăm thoi yơ kơ plah yak năm rim năr lăm tơdrong bơwei tơdrong lui?
‘Bok Pôl đei Yang Bơhngol ‘Lơ̆ng tơ’bôh ăn tơdrong kơnhăm wă dŏng pơklaih kơ lu bơngai Israel hăm bơngai ‘nguaih. Na lăm jơphŭt ‘nâu, yua kơ đei mơ‘nah bơngai Israel oei arăng kơ̆l na ‘Bok Kei-Dei ba ăn tơdrong dŏng pơklaih kơ lu bơngai ‘nguaih (trong 25). Tơdrong ‘nâu bơ̆n băt lăm hơmon đei roi ‘bơ̆t Kră Yang Yêsu đei sŏng sa tih đei chih lăm Sơ̆p hla bơar Luka 14:15-24. Kră Yang ‘Bok Kei-Dei tơ’ngla băt tôm tơdrong, sư đei ‘bôh tôm tơdrong gô truh. Kră Yang đei ‘bôh minh jơ’nei kơnh lu bơngai nguaih tôm kơ kơsô̆ mă đei măt lăm hla bơar tơdrong arih. Na ‘Bok Kei-Dei gô ba ăn tơdrong dŏng pơklaih Sư kơ lu bơngai Israel, jơ noh kơnh “đĭ đăng kơ lu bơngai Israel gô klaih” (trong 26). “Đĭ lu bơngai Israel” noh jơ̆ đe bu? Lu bơngai rơgei đei tơlang đei pêng tơdrong thoi âu: Mă 1, đĭ đăng bơngai Israel ‘nâu wă khan đĭ đăng kơ lu bơngai lui kơ Kră Yang Yêsu jơ̆p kơ teh đak. Mă 2: Đĭ đăng bơngai mă ‘Bok Kei-Dei đei rơih lăm khul bơngai Israel đơ̆ng sơ̆ truh kơ jơ noh kơnh. Mă 3: Gô đei tơdrong râu tơiung tih tuch luch lăm lu bơngai Israel lui kơ Kră Yang Yêsu.
Lu bơ̆n lui ngeh Kră Yang gô pơm tơdrong mă kon bơngai bơ̆n ưh kơ gơh tơchĕng lê̆ hơdrol. Tơpă Kră Yang gô “iŏk lê̆ tơdrong ưh kơ ngheh đơ̆ng adrĕch Jakôp”. Kră Yang ưh kơ tơplih , dôm tơdrong mă ‘Bok Kei-Dei đei pơkă lăm lu ƀok yă lu bơngai Israel gô jing tơpă (trong 27)
Đei minh tơdrong hơdai băl noh jơ̆ mă khan lu bơngai Israel hăm bơngai nguaih tă kơ arăng kơ̆l ngăl păng ayăt kơ Kră Yang ‘Bok Kei-Dei, Kră Yang ưh pă lăng lu sư, lê̆ lu sư pơm yoch kiơ̆ kơ sĕch akar lu sư wă kơ dih păng pŭ iŏk tơdrong răm ƀăm kơ lu sư. Mă lei truh kơ năr Kră Yang đei agăt, Kră Yang yơ̆r ti sơng iŏk lu bơngai nguaih, đơ̆ng noh kŭm song iŏk lu bơngai Israel. Tơdrong dŏng pơklaih mă bơ̆n đei song iŏk ưh kơ trŏ đơ̆ng bơ̆n kơ dih ôh mă lei jơ̆ tơdrong mơnat đơ̆ng tơdrong mơnat tih tin lăm Kră Yang ‘Bok Kei-Dei Ƀă bơ̆n tơ plĕnh ti (trong 28-32).
Tơdrong hơmet lê̆ lăm tơdrong dŏng pơklaih đơ̆ng ‘Bok Kei-Dei noh jơ̆ tơdrong hlơp tih kơ jung dêh kon bơngai bơ̆n ưh kơ kĕ hlôh ƀôh nhen wă tơblang ăn rơđah ôh! Thoi kơ Pôl, lu bơ̆n athei pôk pơ ư ang kơ kơ Kră Yang: “Bok Kei-Dei pơm thoi noh bơ̆n băt kơ Sư ‘mêm kơ bơ̆n tơpă păng bơ̆n kư̆m băt kơ Sư hơgei dêh. Na bơ̆n kon bơngai ưh kơ băt ôh tơdrong tơchĕng Sư thoi yơ.” (trong 33), lu bơ̆n kăl kơ kŭp kơ̆l păng jơhngơ̆m bơ̆n kơ kuh kơ Sư lăm tơdrong mơnat tih Sư, lu bơ̆n đei song iŏk tơdrong dŏng pơklaih noh jơ̆ đơ̆ng Sư ăn đĕch păng noh tơdrong jang Sư pơm ăn wă kơ dôm tơdrong ư ang kơ Sư.
Ơ Kră Yang! Yua kơ tơdrong mơnat tih Ih na inh bơngai yoch hoei pă đei tơdrong lôch na gơh jing kon Ih mă ‘mêm kơ eng! Apinh đĭ chăl arih inh băt bơnê kơ Ih, ư-ang kơ anăn Ih, ră roi tơdrong ‘nao ‘lơ̆ng Ih kơ lơ bơngai oei wơ̆l jrok. Yua anăn Kră Yang Yêsu Krist, Amen!
Lu bơ̆n hăm đei băt kơ Kră Yang đei jơhngơ̆m ‘mêm tih tin jrŭ să ăn kơ lu bơ̆n dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 10
Kênh Youtube BHKTHN:
