Êsai 5:20-21
“Răm-‘băm dêh kơ bơngai bu lăng kơdih akâu sư khan hơgei, pôk kơdih akâu sư khan bơngai hlôh wao!” (Êsai 5:21)
Nơ̆r jet tơchĕng pơwao:
– Yua kơ kiơ Kră Yang hiap pơtê̆ trăp dêh kơ kon pơlei Isơrael?
– Đơ̆ng noh, kon pơlei ‘bôh Kră Yang ‘mêm kơ lu sư thoi yơ?
– Bơ̆n yua iŏk ‘bai pơhrăm ‘nâu kơ bơ̆n dang ei thoi yơ?
Êsai ‘bok khan lê̆ adrol ‘Bok Kei-Dei wơh sư năm khan tơbăt kơ kon pơlei Isơrael yua kơ tơdrong lu sư ưh kơ chu păng tơdrong lui lu sư rơdu. Êsai chăl 5 chih dôm nơ̆r hiap pơtê̆ “răm ‘băm” ‘măn kơ lu kon pơlei Kră Yang jơ̆ lu bơngai ưh kơ chu pơm kiơ̆ tơdrong lui kiơ̆ kơ Kră Yang bơtho, ưh kơ băt tơdrong ayơ ‘lơ̆ng păng tơdrong ayơ kơnê̆, ‘lơ̆ng păng kơnê̆, trŏ păng glăi. Lăm ‘bar trong 20 păng 21, chih roi kơ nơ̆r hiap pơtê̆ lu bơngai arih hăm jơhngơ̆m đon lui rơdu păng pơang.
Kră Yang bơih Tơ’ngla tơpăt, Sư ưh kơ lăp đon ôh dôm tơdrong kiơ mă pơma pơjăm ‘bơm tơdrong ‘lơ̆ng rơgoh Sư. Đei bơtho kơ kon pơlei Kră Yang gah tơdrong pơm kiơ̆ tơdrong lui đơ̆ng ‘Bok Kei-Dei ăn lăm Mơjĭt khôi juăt hơđăl tơpă păng tôm. Tơ’ngla tơpăt ưh kơ đei layơ pơm tơplơ̆ kơ tơdrong pơm kiơ̆ tơdrong lui: “Răm-‘băm dêh kơ bơngai bu khan pơm kơnê̆ noh ‘lơ̆ng, khan pơm ‘lơ̆ng noh kơnê̆; khan măng mu noh hơdah, hơdah noh khan măng mu; tơmam tăng khan ‘ngam, tơmam ‘ngam khan tăng.” (trong 20). Kon pơlei hơlĕnh kơdih, “lăng kơdih akâu sư khan hơgei.” Kơdih pơm ‘bok sek tơlang păng ling lang khan kơdih trŏ (trong 21). Arih thoi noh pơang tơpă yua kơ kon pơlei Kră Yang achăng lê̆ nơ̆r Kră Yang ‘Bok Kei-Dei na iŏk kơdih akâu pơm tơm. ‘Noh bơih tơdrong yua kơ kiơ Tơ’ngla tơpăt wơh Êsai ‘bok khan lê̆ adrol năm roi khan dôm nơ̆r hiap pơtê̆ trăp “răm ‘băm dêh”.
Mă khan lei ră, đơ̆ng dôm nơ̆r trăp noh, kon pơlei kư̆m ‘bôh ‘Bok Kei-Dei ‘mêm kơ kon pơlei Sư kơ băt dang yơ! Dah Kră Yang phak hloi lei kon pơlei Kră Yang rŏ lăng ưh kơ đei bu arih, mălei Sư wơh bơngai khan lê̆ adrol pơma re thoi teng neng wă kơ kon pơlei băt krăng băt dôm tơdrong glăi lăm tơdrong arih lu sư păng tơbral wih brŏk hăm pơm kiơ̆ dôm tơdrong lui Kră Yang. Bơnê kơ Kră Yang yua kơ Sư bơih Tơ’ngla tơpăt mălei kư̆m Kră Yang ‘Bok Kei-Dei ‘bĕnh tơdrong ‘mêm.
Dang ei, bơ̆n oei arih lăm jơhnơr lăm tơdrong jang chih roi gơh hơgei wơ̆ ‘net ‘net, jum dăr kơ bơ̆n đei dôm tơdrong arih chih roi ưh kơ trŏ, pơrăm pơm kơ kon pơlei Kră Yang ‘bônh dêh puh kiơ̆ tơdrong lăm teh đak, măt huŏng kơ dôm nơ̆r pơma hơlĕnh khan ‘lơ̆ng dêh. Dôm tơdrong arih ưh kơ trŏ thoi tơdrong lui đơ̆ng kon bơngai mălei ôn kơ’nơp thoi lăm ao klơ̆p bơ̆n dang ei, trŏ kơ jơhnơr… pơm kơ bơ̆n hŭt tŭk lê̆ tơdrong lui kơ Kră Yang lăm Sơ̆p Hla bơar nơ̆r Sư. Bơ̆n kăl kơ ‘blŏk Tơ’ngla tơpăt ưh kơ đei layơ lê̆ ôh dôm tơdrong arih ưh kơ trŏ noh. Nơ̆r Sư tơbăt tơgŭm kơ bơ̆n wih arih pơm kiơ̆ tơdrong lui kơ Kră Yang wă pơm thoi ‘boh kơ teh, hơdah kơ kon bơngai. Apinh Kră Yang tơgŭm kơ bơ̆n rôp kơjăp nơ̆r Kră Yang păng arih trŏ thoi tơdrog lui lăm Sơ̆p hla bơar ‘Bok Kei-Dei wă pơchrang hơdah Anăn Kră Yang kơ rim bơngai.
Kơkuh kơ Kră Yang, bơnê kơ Ih đei ăn nơ̆r pơm hơgăt kơ tơdrong lui inh. Apinh ăn kơ inh ling lang jê̆ hăm nơ̆r Ih, iŏk đon ala arih kiơ̆ tơdrong lui lăm nơ̆r Ih wă kơ lơ bơngai ‘bôh Ih đơ̆ng tơdrong arih inh. Krao khan yua anăn Kră Yang Yêsu Krist, Amen.
Bơ̆n kăl kơ pơm kiơ wă kơ huay kơ druh kiơ̆ đơ̆ng dôm tơdrong ưh kơ trŏ lăm teh đak âu?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 8
Kênh Youtube BHKTHN:
