Klei Aê Diê Blŭ: Y-Êsai 5:20-21
Êlan kliăng: “Knap mñai yơh kơ phung yap mă diñu pô jing phung thâo mĭn, leh anăn yap mă diñu pô thâo săng.” (Y-Êsai 5:21)
Klei êmuh ksiêm mĭn: Ya ngă Khua Yang tăm pah phung ƀuôn sang Israel ktang tĭt? Mơ̆ng klei anăn, si phung ƀuôn sang Aê Diê ƀuh klei Aê Diê khăp kơ diñu? Si drei mă yua klei hriăm anei kơ drei hruê anei?
Aê Diê tiŏ nao Khua pô hưn êlâo Y-Êsai blŭ klei hưn êlâo kơ phung ƀuôn sang Israel kyua klei diñu bi kdơ̆ng leh anăn klei kpă ênuah hroh trŭn. Y-Êsai kdrêč 5 čih wĭt klei tăm pah “knap mñai yơh” pioh kơ phung ƀuôn sang Aê Diê jing phung gao klei bhiăn hnơ̆ng čuăn klei kpă ênuah Khua Yang mtô, amâo bi kah klă klei jăk hŏng klei ƀai, klei jăk hŏng klei jhat, klei djŏ hŏng klei soh. Hlăm dua êlan 20 leh anăn 21, čih wĭt klei tăm pah kơ phung dôk hdĭp hlăm klei mĭn kpă ênuah hroh trŭn leh anăn mgao.
Aê Diê jing Pô kpă ênô, Ñu amâo dưi tŭ ôh klei bi jhat kơ knuih doh jăk Ñu. Phung ƀuôn sang mâo klei bi hriăm kơ hnơ̆ng čuăn klei kpă ênuah mơ̆ng Aê Diê hlăm Pluh Mta Klei Bhiăn klă mngač leh anăn kluôm ênŭm. Pô kpă ênô amâo dưi mbliư̆ hnơ̆ng čuăn klei kpă ênuah ôh, “Knap mñai yơh kơ phung pia klei jhat jing jăk, leh anăn klei jăk jing jhat, phung yap klei mmăt hrô kơ klei mngač, leh anăn klei mngač hrô kơ klei mmăt, phung brei klei phĭ hrô kơ klei mmih, leh anăn klei mmih hrô kơ klei phĭ.” (êlan 20). Phung ƀuôn sang Aê Diê dôk mplư diñu pô, čŏng “yap mă diñu pô jing phung thâo mĭn”, ngă khua phat kđi kơ diñu pô leh anăn yap diñu pô yơh jing djŏ nanao (êlan 21). Dôk hdĭp msĕ snăn jing klei mgao êdimi kyuadah phung ƀuôn sang Aê Diê gao lui leh Klei Aê Diê Blŭ, ƀiădah mă diñu pô yơh jing phŭn. Anăn yơh jing mta phŭn kơ klei Pô kpă ênô tiŏ nao Khua pô hưn êlâo Y-Êsai hiu hưn klei tăm pah ktang tĭt, “knap mñai yơh”!
Ƀiădah lĕ, mơ̆ng klei blŭ ktang tĭt anăn, phung ƀuôn sang Israel ăt ƀuh mơh klei Aê Diê khăp êdimi kơ phung ƀuôn sang Ñu! Tơdah Khua Yang ƀuah bi kmhal hlăk anăn mtam snăn sĭt yơh amâo mâo pô dưi adôk hdĭp ôh, ƀiădah Ñu tiŏ nao khua pô hưn êlâo Ñu tông tiêng liêng bi mdih êrâo, hưn êlâo brei răng čiăng kơ phung ƀuôn sang Aê Diê thâo kral klei soh wê hlăm klei hdĭp diñu, leh anăn thâo kmhal lŏ wĭt kơ hnơ̆ng čuăn kpă ênuah Khua Yang. bi mni kơ Khua Yang kyuadah Ñu jing Pô kpă ênô wăt Ñu jing Aê Diê bŏ hŏng klei khăp mơh.
Hruê anei, drei dôk hdĭp hlăm ênuk knơ̆ng bruă klei mđung bi lar klei blŭ hưn knhâo knhăk đĭ kyar, jŭm dar drei amâo kƀah ôh klei hưn soh wê, bi jhat, ngă kơ phung anak ƀuôn sang Aê Diê ênưih hlue tui klei jing hlăm ƀuôn sang, kmlăi ală mta ti anăp klei blŭ mčeh luar bi msiam ti êngao, knhuah dôk hdĭp soh hŏng hnơ̆ng čuăn klei kpă ênuah anak mnuih bi hgăm hŏng čhiăm ao knhâo mbruă, djŏ guôp hŏng wưng ênuk hdĭp… ngă kơ drei gao lui hĕ hnơ̆ng čuăn kpă ênuah Khua Yang mơ̆ng Klei Aê Diê Blŭ. Brei drei hdơr Pô kpă ênô amâo tuôm gao lui ôh knhuah hdĭp soh wê anăn, klei Ñu hưn êlâo brei răng đru kơ drei lŏ wĭt hŏng ênoh yuôm klei kpă ênuah Khua Yang, čiăng jing hra kơ lăn, klei mngač kơ lăn ala. Akâo Khua Yang brei drei djă păn kjăp Klei Blŭ mơ̆ng Khua Yang leh anăn dôk hdĭp tui si hnơ̆ng čuăn klei kpă ênuah hlăm Klei Aê Diê Blŭ, čiăng mtrang mngač Anăn Khua Yang kơ jih jang mnuih.
Ya klei brei drei ngă čiăng đăm tui hlue ôh klei soh wê mơ̆ng ƀuôn sang?
Wah lač: Ơ Khua Yang, bi mni lač jăk kơ Khua Yang brei leh Klei Blŭ Ih jing hnơ̆ng čuăn klei kpă ênuah kơ klei hdĭp kâo. Brei kâo djă păn kjăp Klei Ih Blŭ, luă gŭ dôk hdĭp gưt hlue hnơ̆ng čuăn klei kpă ênuah mơ̆ng Klei Blŭ Ih, čiăng kơ lu mnuih dưi ƀuh Khua Yang mơ̆ng klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
