Galati 6:12-18
“Tơdrong kăt tơdra akar ưh kơ đei kăl kiơ ôh. Tơdrong Yang Bơhngol ‘Lơ̆ng ăn kơ bơ̆n jing bơngai ‘nao, ‘noh đĕch kăl.” (Galati 6:15)
Nơ̆r jet tơchĕng pơwao:
– Tơdrong pơtrŭt lu bơngai bơtho hơlĕnh sư pha ra kơ tơdrong pơtrŭt ‘Bok Pôl sư thoi yơ?
– ‘Bok Pôl sư pơma tơpăt tơdrong kiơ jơ̆ tơdrong kăl hloh?
– Lu bơ̆n đei tơ’blŏk tơdrong kăl hơ yơ gah chăl arih gah bơhngol lu bơ̆n?
Hơdrol kơ wă pơtôch hla ar kơ thơ đei chih ăn kơ lu bơngai lui tơ Galati, ‘Bok Pôl sư pơma wơ̆t dơ̆ng kơ tơdrong kăl tơm mă đei pơdrŭt sư chih âu. Tơdrong pơdrŭt lu bơngai bơtho hơlĕnh pơchŭt lu bơngai tơmoi tơ Galati athei kăt tơdra akar yua kơ “Wă ăn kơ đe lăp đon kơ bơ̆n”, “athei lui kơ Yêsu Krist lôch tang bơ̆n tơ ‘long pơglang đĕch” păng “wă pơang” (tr. 12-13). Pơm kơ đe lăp đon păn pơm kơ bơ̆n chơt hiôk bơyar măt (muh pông) wă pơm kơ lu bơngai nai lăng bơ̆n wang jing bơngai ưh kơ yua pơm glăi lôch bơngai .Pơang gah “sĕch akar” jơ̆ yua dôm tơdrong bơ̆n gơh ‘bôh pơtih gia thoi kăt tơdra akar, pơm ‘long thưk khan trŏ lăm tơdrong hli yom. Lu bongai thoi noh ‘Bok Pôl jô̆ khan bơngai “ ‘mêm kơ klak lu sư, rŏ kơ klak yŏng na pơm thoi noh “ (Phi lip 3:19 ). Lu sư ‘bônh kơ puh lăm hơđong kap wă tơplih kơ tơdrong sĭt tơpăt đơ̆ng Tơdrong‘Nao ‘Lơ̆ng trŏ tơpă wă chă nơ̆r pơư păng chă kiơ̆ kon bơngai lăp đon.
Tơplơ̆ dơ̆ng, ‘Bok Pôl sư đei pơdrŭt đơ̆ng lăm jơhngơ̆m pha ra tôm tơdrong: “Dang lĕ inh pơ̆ng lê̆ dôm tơdrong ala teh âu tơ’long pơglang, kư̆m dang inh lôch tơ ‘long pơglang ưh pă kiơ̆ dôm todrong ala teh âu!” (tr.14). Dôm nơ̆r pơ ư bơnê pơchê pơjăm, pơm kơnê̆ dah drơ̆ng ăn dơ̆ng lu bơngai noh hăm sư ưh kơ pơm kơ ‘bok Pôl tơchĕng tơtămtơdrong noh bơih , đĭ đăng tơdrong noh ưh kơ yua kiơ yua kơ sư jô̆ sư nhen thoi lôch dang pơ̆ng tơ’long pơglang hăm ‘Bok Krist bơih. ‘Bok Pôl pơma tơpăt lăp minh tơdrong sĭt đĕch: “Tơdrong kăt ơdra akar ưh kơ đei kăl kiơ ôh. Tơdrong Yang Bơhnol ‘Lơ̆ng ăn kơ bơ̆n jing bơngai ‘nao ‘noh đĕch kăl” ( 15 ). Dôm tơdrong bơ̆n pơm tơ’bôh lăm tơdrong lui yom ‘bôh tơ gah ‘nguaih ưh kơ kăl dang thoi Kră yang tơplih chăl arih bơ̆n gah lăm wă kơ gơh jing bơngai ‘nao. Thoi noh wă kơ bơ̆n lăn bơ̆n hăm tam tơplih ming tơpă ưh? “Lăng plei băt kơ tơm”. (Luka 6: 44). Plei âu thoi ‘Bok Pol khan tơ lăm chăl 5 păng 6, jơ̆ lăm jơhngơ̆m đei tơplih đơ̆ng Yang Bơhngol ‘Lơ̆ng, lăm chăl arih đei ‘mêm mơnat, huay kơ jô̆ yo, wang pŭ trăp hơdai păng tơgŭm bơngai nai.
Dang ei, phŏ sư Khul Bơngai Lui lăng kăl dêh gah tơdrong pơjing, tơdrong gah ‘nguaih, jang keh jing…lăng hloh kơ tơdrong jang tơ iung tơdrong lui wă kơ kon pơlei Kră Yang “jing bơngai ‘nao”. Đĭ đăng tơdrong kăl, mă lei tơdrong tơiung dih băl wă kơ jing bơngai ‘nao lăng kăl hloh kơ đĭ đăng tơdrong nai. Kră Yang Sư tơchĕng tơtăm kơ chăl arih ‘nao lăm bơ̆n (II Kôrintô 5:17). Kon pơlei Kră Yang kăl kơ tơchĕng tơtăm tơdrong âu wă kơ lu bơ̆n ưh kơ tơchĕng tơdrong jang gah ‘nguaih mă lei lăm jơhngơ̆m hoh hoy.
Ơ Kră yang, inh bơnê kơ Ih đei tơ’blŏk kơ inh gah tơdrong tơplih gah lăm kăl hloh kơ đĭ đăng tơdrong nai. Apinh tơgŭm inh lăng tơ lăm tơdrong Ih lăp đon lăm tơdrong jing bơngai ‘nao tơplih kơ tơdrong pơm gah ‘nguaih wă kơ đe lăp đon. Yua anăn Kră Yang Yêsu Krist, Amen.
Lu bơ̆n hăm dan tơdrong adrol hloh lăm tơdrong wă kơ jing bơngai ‘nao lăm Kră yang hloh kơ lu tơdrong nai?
Lăng gĭt kăl tơdrong pơm gah ‘nguaih kư̆m ‘lơ̆ng
Gah bơhngol mă ‘lơ̆ng dêh, ‘noh ‘bĕnh tơdrong pŭn hiôk
Chăl arih ‘nao tôm tơdrong
Ư-ang Anăn Kră Yang, Tơdrong ‘Nao ‘Lơ̆ng kơtơ̆ng jơ̆p jang
Đŏk Sơ̆p Hla ar ‘Bok Kei-Dei lăm pêng sơnăm: Hơri So 56-57
Kênh Youtube BHKTHN:
