Blŭng a 3:1-5
“Bơ̆n athei chơ̆n jơhngơ̆m păng kơchăng kơdih, yua kơ yŏng pơgơ̆r yang kơnê̆ mă ayăt kơ bơ̆n, sư nơnăm jơ̆p-jang arum thoi kiĕk wă rôp sa bơ̆n.” (I Pêtrôs 5:8)
Nơ̆r jet tơchĕng pơwao:
– Tơdrong pơhlŭ truh kơ kon bơngai thoi yơ?
– Sa-tan đei yua tơdrong kiơ pơhlŭ kon bơngai?
– Pơm thoi yơ wă kơ bơ̆n kĕ jei đơ̆ng yang kơnê̆ pơhlŭ?
Lăm pơgar Ê-đen tôch kơ ‘lơ̆ng, ‘bih đei năm pơma dơnuh hăm bơngai drŏ kăn. Yă Ê-wơ sư lăng ngheh kơ ‘noh nhen sem dơrong hmă đĕch, mă lei nơ̆r ‘Bok Kei-Dei tơbăt lăm Tơ’bôh 12:9 noh jơ̆ “..Prao noh boih ‘bih so sơ̆ mă đe anăn yŏng yang sơmăt păng yang Satan. Sư pơhlŭ đe jơ̆p kơ teh đak”. Ưh kơ trŏ kơ ‘bih đĕch mă lei Sa-tan năm tơ yă Ê-wơ. lu bơ̆n ưh kơ băt Sa-tan jing ‘bih dah sư dơ̆ng đơ̆ng rŏng kơ ‘bih, bơ̆n băt Sa-tan bơih pơtơm tơdrong pơhlŭ yă Ê-wơ wă kơ kon bơngai pơ̆k huŏng. ‘noh jơ̆ tơdrong Sa-tan juăt kơ pơhlŭ, hŭI kơ Sư iŏk rup hli krưp wă năm pơhlŭ, mă lei sư iŏk nhen thoi “linh jang ‘lơ̆ng hơdah hơdong” pơm ăn kơ kon bơngai hiôk, ‘net ‘net ba ăn lăm tơdrong hơlĕnh na pơ̆k huŏng.
Tơdrong pơhlŭ blŭng a đơ̆ng Sa-tan noh jơ̆ pơma dơnuh hăm kon bơngai hăm nơ̆r ‘Bok Kei-Dei. “Kră Yang ‘Bok Kei-Dei đei khan tơtă ưh kơ ăn kơ măr iĕm sa plei ‘long lăm pơgar âu dah kiơ?” (trong 1b). Sư dan tơdrong apinh wă pơm kơ kon bơngai ưh kơ ngeh kơ nơ̆r ‘Bok Kei-Dei.
“Măr iĕm huay kơ lôch; Mă-lei Kră Yang ‘Bok Kei-Dei băt layơ măr iĕm sa plei ‘long noh, măr iĕm gô hlôh thoi Kră Yang ‘Bok Kei-Dei, băt tơdrong ‘lơ̆ng păng tơdrong kơnê̆.” (trong 4-5) Satan hơrĭ hơrĭ roi ưh kơ tơpă lăm tơdrong kơnhăm ‘lơ̆ng rŏ đơ̆ng ‘Bok Kei-Dei. Sư pơhlŭ kon bơngai đei tơdrong mă Kră Yang khă kuă ăn sa “plei mă kâ̆m” khan Kră Yang hli kơ kon bơngai sa na khan gô jing nhen thoi Kră Yang ‘Bok Kei-Dei, hơtŏ hăm ‘Bok Kei-Dei; đơ̆ng noh ba ăn tơdrong pơ-ang kon bơngai. Satan kŭm ưh kơ roi kơ măr sư lăm tơdrong răm ‘băm kơ tơdrong yoch păng khan kơ bre sư khan ‘măr iĕm huei kơ lôch ôh”, pơm ăn kơ kon bơngai ngeh kơ pơm yoch pơm ưh kơ trŏ hăm tơdrong ‘Bok Kei-Dei wă kư̆m hoei mơ̆n.
Satan dang ei oei pơhlŭ kon bơngai bơ̆n hăm tơdrong lei lăI thoi noh. Sư chop lu bơ̆n păng ba lu bơ̆n lăm tơdrong yoch (lăng lăm I Pêtrôs 5:8). Thoi noh lu bơ̆n kăl kơ krăng kơ chăng păng lăng băt kơ tơdrong kơnê̆ wă pơhlŭ. Apinh gơnang kơ Kră Yang păng apinh sư tơgŭm “Apinh Ih ‘nĕ ăn kơ nhôn lui kơ đe pơhlŭ pơlung. Apinh Ih dŏng pơklaih nhôn đơ̆ng tơdrong kơnê̆” (Mathiơ 6:13). Kơplah jê̆ Kră Yang, păng gơnang kơ Sư, lu bơ̆n gô ‘bôh lu bơ̆n wă lei lăI thoi Kră Yang rim năr. Đei tơdrong noh yua kơ bơ̆n đei tơdrong tơbưh hăm Kră Yang ưh kơ trŏ tơdrong bơ̆n hơdrin kơdih. Đơ̆ng noh bơ̆n gô ‘bôh dôm tơdrong hơlĕnh đơ̆ng Sa-tan na bơ̆n weh kơchăng.
Kơkuh bơnê kơ Ih Kră Yang, yang kơnê̆ ling lang kơ chop păng wă dui ba inh hơtaih đơ̆ng Ih hăm tơdrong Ih ‘măn lê̆ tơdrong ‘lơ̆ng kơ inh. Apinh Ih tơgŭm inh băt krăng kơ chăng kơnăl kơ tơdrong pơhlŭ đơ̆ng yang kơnê̆, wă kơ ling lang chĕp kơjăp lăm Ih păng lui ngeh kơ Ih ling lang. Apinh Ih ‘nĕ ăn kơ inh pơ̆k huŏng lăm tơdrong yoch, mă lei dŏng inh hlôi đơ̆ng dôm tơdrong kơnê̆, yua kơ tơdrong ‘lơ̆ng rŏ Ih. Yua anăn Kră Yang Yêsu Krist. Amen
Hnam dơnŏ bơ̆n dang ei dah tơ hơnăp hăm trŏ thoi tơdrong mă Kră Yang đei pre hơmet lê̆ ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 69.
Kênh Youtube BHKTHN:
