Blŭng a 4:16-24
“Na Kain kơdŭn weh đơ̆ng Kră Yang păng oei tơ dêh Not, gah hơlĕch kơ pơgar Êđen.” (Blŭng a 4:16)
Nơ̆r jet tơchĕng pơwao:
– Đơ̆ng rŏng kơ Kră Yang tơbăt wă phak, tơdrong arih Kain thoi yơ bơih?
– Hăm đei tơdrong kiơ trŏ kơ lăng đơ̆ng adrĕch adrung sư?
– Lu bơ̆n arih ataih đơ̆ng Kră Yang đei tơbăt kiơ kơ lu bơ̆n?
Đơ̆ng rŏng kơ pŭ iŏk tơdrong phak tih tin, đơ̆ng noh Kră Yang kư̆m pơkă wă bơwei tơdrong arih, na Kain “kơdŭn weh đơ̆ng Kră Yang” (trong 16). Nơ̆r “weh đơ̆ng” ưh kơ pơma kơ tơdrong weh ataih đơ̆ng anih yua kơ Kră Yang oei jơ̆p jang anih. Mălei oei pơma ‘bơm kơ chăl arih weh đơ̆ng Kră Yang. Ưh kơ đei tơ’bưh hăm Kră Yang ôh gô thông mang huang jơ̆p kơ teh, na sư chă ‘bôh hĭ dêh Not păng arih tơ noh, pơjing arih jang sa tơ noh. Lăng gah ‘nguaih, Kain arih đei hiôk hơđơ̆ng, jang sa đei tơmam đơ̆ng jơhngơ̆m pran. Mălei tơdrong gĭt kăl hloh mă sư ưh kơ đei, noh tơdrong to’bưh hăm Kră Yang ‘Bok Kei-Dei, Tơ’ngla mă pơjing sư
Na Kain đei kon hơ’lơ̆p, đơ̆ng jơ hnơr ‘nâu pơtrơp jơ hnơr đơ̆ng rŏng kiơ̆ kơ jơ năr, adrĕch adrung sư pơjing chăl arih trŏ ‘biơ̆, đei pơjing păng bơtho tơ’bôh lơ tơdrong jang thoi lĕ: ‘Bok Jabal pơjing ‘bok kơ khul kon pơlei oei lơ anih đe rong sem dơrong (trong 20). Jabal ‘bok adrĕch kơ khul kon pơlei reh brŏ păng hlôm alal (trong 21). Gah Yilah kư̆m pơjing Tubal Kain jing bơngai hơjơ̆m lu tak đak han păng mam kong (trong 22). Mă khan lei ră, tơdrong pơm ‘lơ̆ng kon bơngai rai đunh rai jur tơpă. Lêmek đe đei tơbăt kơ sư noh minh ‘nu bơngai iŏk akăn ‘bar, năm tơplơ̆ kơ ŭnh om đơ̆ng ‘Bok Kei-Dei pơjing. Ưh kơ trŏ thoi noh đĕch, na sư jơ̆ minh ‘nu bơngai pơlôch đe ding mah sư khan hơiă dêh gah tơdrong sư pơm kơnê̆ noh păng wă kơ pơm ‘mong tơwih (trong 23-24).
Mưh weh đơ̆ng tơdrong tơ’bưh hăm Kră Yang ‘Bok Kei-Dei, tơdrong arih kon bơngai lăng gah ‘nguaih nhen lĕ hiôk hơđơ̆ng, ding mah khan wơ̆ ‘lŏ tôm tơdrong. Mă khan lei ră, ‘noh tơdrong arih kiơ̆ kơ jơhngơ̆m pran kơdih, druh kiơ̆ kơ tơdrong gĭt wă pơư kơdih akâu, hưch wă kiơ̆ kơdih, păng pơm kiơ̆ tơdrong ưh kơ trŏ wă kơ gơh đei tơdrong kơnhăm, na pơm kơ đe sơ’ngon mưh ‘bôh lơi yua kơ bơ̆n mưh tơdrong noh wă truh kơ bơ̆n. Kơlih kơ thoi noh, mă khan tơdrong arih wơ̆ tŏk thoi yơ hĭ, đei hlôh băt mălei tơdrong arih gah tơdrong pơm ‘lơ̆ng rai lŭch hloh. Lu tơdrong hơgei gah kơmăy dang ei păng dôm tơdrong dôm tơdrong hơgei lăm teh đak ưh kơ đei gơh tơplih kon bơngai bơ̆n ôh, yua kơ đơ̆ng lăm jơhngơ̆m. Tơdrong arih tơplih gơh đei kơplah kon bơngai ăn kơ Kră Yang pơgơ̆r adrol hloh “Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” (Mathiơ 6:33). Păng lăp minh trong đĕch gơh năm tơ Kră Yang ‘Bok Kei-Dei, đơ̆ng Kră Yang Yêsu Krist yua kơ Sư đei khan: “Yêsu khan: Inh boih trong iĕm năm tŏk tơ ‘Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai ‘noh ưh kơ truh tơ ‘Bă Inh ôh.” (Yôhan 14:6).
Ơ Kră Yang, apinh Ih tơgŭm inh ling lang oei lăm tơdrong tơ’bưh hăm Ih. Apinh Ih ‘nĕ ăn kơ inh jang kiơ̆ kơ kon bơngai lăng lăp mălei ‘bơ̆t anăp Ih ưh kơ ‘lơ̆ng. Apinh Ih tơgŭm inh druh kiơ̆ ih đĕch păng chă tơdrong gĭt kăl dêh char Ih tơplĕnh. Wă kơ anăn Ih đe ưang đơ̆ng chăl arih inh. Krao khan yua anăn Kră Yang Yêsu Krist, Amen.
Lu bơ̆n oei druh kiơ̆ tơdrong ala teh dah mă arih lăm Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 13
Kênh Youtube BHKTHN:
