Mathiơ 24:32-35
“Na dôm tơdrong Inh roi kơ iĕm noh hei kư̆m lei-lăi. Ning-mônh lăp iĕm ‘bôh dôm tơdrong Inh roi kơ iĕm noh, iĕm băt Inh Kon Bơngai wă jê̆ jur boih. ‘Noh dang lĕ kiơ̆ ‘măng dur boih.” (Mathiơ 24:33)
Nơ̆r jet tơchĕng pơwao:
– Kră Yang Yêsu yua rup ayơ pơting hăm năr Sư jur dơ̆ng?
– Kră Yang wă kơ lu bơngai pơhrăm kiơ̆ Sư noh ling-lang tơchĕng kơ tơdrong kiơ?
– Bơ̆n kăl kơ pơm kiơ kơplah chang gô Kră Yang jur dơ̆ng?
Kră Yang yua ‘long hơra păng bơyan phang wă jê̆ bơyan ‘mi wă pơting hăm tơdrong Sư wă jur dơ̆ng. Mưh ‘long hơra bluh tơ’biĕng ‘lơ̆p, păng bluh hla plơ̆ng noh tơdra tơbăt bơyan ‘mi wă truh bơih. Kư̆m lei lăi thoi noh mơ̆n, mưh bơ̆n lăng ‘bôh dôm lu tơdra mă Kră Yang hlôi pơma khan lăm Hla bơar Mathiơ 24 noh, bơ̆n băt kơnăl kơ jơ năr Kră Yang Yêsu jur dơ̆ng ‘nei wă jê̆ ngơ ngei bơih. Nơ̆r “băt” lăm trong 32-33, wă khan hlôh kơnăl dôm tơdrong Kră Yang bơtho, hlôh tơpă tơdrong ‘Bok Kei-Dei wă noh. Bơ̆n ưh kơ pôm băt lăm kơ̆l ‘ngok dah mă băt lăm tơdrong bơ̆n hŏk gơh noh đĕch ôh, mă-lei yua iŏk lăm chăl arih hloi đơ̆ng bơ̆n hlôh nơ̆r Kră Yang, păng dang ei hloi, bơ̆n hơtai arih pơ’lơ̆ng kiơ̆ nơ̆r Kră Yang wă răp gô năr Kră Yang Yêsu jur dơ̆ng.
Kră Yang wă kơ lu bơngai pơhrăm kiơ̆ Sư noh ling-lang tơchĕng mưh đei lu tơdra đe bơtho hơlĕnh, tơdrong truh tih kiơ kiơ, tơdrong jĭ hơbuh, tơblah wang, tơdrong đe pơm kơnê̆ kơ tơdrong lui kơ Kră Yang, păng lu tơdrong đe achăng tơdrong lui… lei athei băt noh Kră Yang Yêsu “wă jê̆ jur bơih”, Sư tŏk-bŏk oei dơ̆ng “‘bơ̆t ‘măng” (trong 33). Lu kon pơlei Kră Yang noh bơih pơm kơdranh ăn dôm lu nơ̆r đei khan lê̆ hơdrol gah Kră Yang jur dơ̆ng. Yua kơ kơplah Kră Yang Yêsu jur oei hlơp wă sơng iŏk Khul Lui, kơplah ‘nei bơih giĕng mă tơpơh jĭt noh ‘nao pơtơm. Kră Yang chơ̆m lu tơdra lu nơ̆r mă Sư bơtho hăm nơ̆r tơbăt: “Plĕnh teh gô hiong tôch, mă-lei nơ̆r Inh pơma ưh kơ đei layơ tôch hiong” (tr.35).’Nâu nơ̆r pơma kơjăp đơ̆ng ‘Bok Kei-Dei Tơ’ngla pơkă sĭt khan đĭ-đăng dôm lu nơ̆r khan lê̆ hơdrol gah tơdrong Yêsu wă jur dŏng păng năr tôch noh gô pơkeh tôm ‘blep ngăl thoi khan lê̆ hơdrol.
Kơplah bơ̆n lăng ‘bôh tơdrong sơ’ngon truh rơhu rơhau lăm teh đak âu mă kon bơngai hơtai oei pŭ dang ei rai dêh, trăp sư noh trăp ngơngei hloi bơih, lơ sư noh kơbăt dôm yơ, noh bơ̆n kư̆m băt kơnăl kơ Kră Yang Yêsu wă jê̆ jur bơih. Tơdrong plĕnh ‘mi tŏ kư̆m tơplih pha bơih, đei tơdrong truh răm lơ, phang ang, đak lơ̆p tơ lơ anih, jĭ hơbuh hơpoh jơ̆p kơ teh đak, đei tơdrong tơhil tơblah char ‘nâu char to, adrĕch ‘nâu blah adrĕch to hơnơ̆ng hơnong rai dêh hloh dơ̆ng. Kăl hloh kơ đĭ-đăng, bơ̆n kăl kơ băt kơ Kră Yang mă tơpă, păng wei tơdrong tơ’bưh hlom jrŭ hăm Sư, ‘nĕ kơ kiơ̆ Kră Yang thoi tơdrong juăt đĕch, dah mă wei tơdrong juăt lăm tơdrong lui đĕch, ưh kơ đei thoi ei ôh, mă-lei pơgơ̆p kơjăp hăm Kră Yang, kơjăp hăm nơ̆r Sư, mă loi sư, kơplah jơ năr hơtuch ‘nâu bơih. Kră Yang hlôi hil tơbăt khul lui pơlei Lao di sê lăm Hla bơar Tơdrong tơ’bôh 3:20 “Dang ei Inh oei dơ̆ng tơ ‘ngoaih ‘măng wă krao iĕm. Bu kơtơ̆ng ‘bơ̆r Inh krao na pơih kơ Inh ‘măng, bơngai noh Inh wă mơ̆t oei hăm sư, sŏng sa hơdai sư.” Bơ̆n kăl kơ pơđêng đon mơ̆ng nơ̆r Kră Yang mă hơlen, mă nhen, ling-lang lui ngeh kơ nơ̆r Kră Yang, păng ling-lang oei lăm tơdrong tơ’bưh ‘lơ̆ng kơjăp hăm Sư, ‘nĕ kơ lăp mơ̆ng kơtơ̆ng đe bơtho minh giĕng minh wơ̆t khan tôm bơih, ưh ôh, mă-lei athei hưch hanh ‘maih đŏk, hŏk pơhrăm nơ̆r Kră Yang rim năr wă kơ tơdrong lui bơ̆n wơ̆ ‘lŏ, păng wă băt kơ Kră Yang jrŭ hlom hloh dơ̆ng.
Ơ Kră Yang Tơ’ngla ‘mêm mơnat, inh chang gô năr Ih jur dơ̆ng, apinh Ih tơgŭm inh wei tơdrong tơ’bưh kơjăp hăm Ih wă kơ inh huay kơ achăng lê̆ lu tơdra tơbăt kơ inh năr wă tôch noh.Inh krao khan yua Anăn Kră Yang Yêsu Krist, Amen!
Bơ̆n hăm đei hơmet jơhngơ̆m wă sơng Kră Yang jur dang ei ưh?
Đŏk Sơ̆p Hla bơar ‘Bok Kei-Dei lăm pêng sơnăm: Esơra 4.
Kênh Youtube BHKTHN:
