Tơdrong Pơđơ̆k 24:10-12
“Tơdah ih rơdu klai lăm năr đei tơdrong gleh, Noh tơdrong pran kơtang ih iĕ dêh.” (Tơdrong Pơđơ̆k 24:10)
Nơ̆r jet tơchĕng pơwao:
– Pơtao Salômôn bơtho ih athei arih thoi yơ kơ plah tơ ‘bơ̆p năr pơmat tat?
– Yua kơ kiơ kăl kơ dŏng pơklaih bơngai tơ’bơ̆p tơdrong pơmat tat?
– Lu bơ̆n đei jơhngơ̆m đon thoi yơ kơ plah bơ̆n kơ dih tơ ‘bơ̆p tơdrong pơmat tat hăm bơngai nai kŭm đei tơ’bơ̆p tơdrong pơmat tat?
Trong bơ̆n kiơ̆ Kră Yang noh jơ̆ trong pŭn hiôk. Mă lei lu bơngai lui đei tơdrong pŭn hiôk noh ưh kơ sĭ lăm tơdrong hiôk chơt đĕch mă lei kŭm dai tơ’bơ̆p tơdrong mă bơ̆n ưh kơ wă, pơmat tat. Lu kon ‘Bok Kei-Dei kăl kơ pơhrăm wă kơ dơ̆ng kơ jăp kơplah kơdih tơ’bơ̆p tơdrong pơmat tat, na kŭm đei dŏng tơgŭm bơngai mă tơ’bơ̆p tơdrong pơmat tat.
Pơtao Salômôn bơtho bơ̆n kăl kơ dơ̆ng kơjăp lăm dôm tơdrong mă truh kơ bơ̆n, tơdah jơhngơ̆m bơ̆n rơdu kơplah tơ’bơ̆p tơdrong pơmat tat, noh jơ̆ tơ’bôh ăn kơ jơhngơ̆m đon bơ̆n rơdu dêh (trong 10). Jơhngơ̆m bơ̆l hăl kơplah tơ’bơ̆p tơdrong pơmat tat noh jơ̆ tơ’bôh kơ tơdrong rơdu đơ̆ng gah jơhngơ̆m pran truh kơ gah bơhngol. Tơ’bơ̆p tơdrong pơmat tat đei truh lăm chăl arih noh jơ̆ nhen ‘bai pơthi lăm tơdrong chu kĕ ĕnh, jơhngơ̆m nuih pran ling lang. Bơ̆n kăl kơ lui gơnang kơ nơ̆r Kră Yang đei pơkă khan: “ Bơngai tơpăt gô đei dŏng pơklaih đơ̆ng tơdrong pơmat-tat; Mă-lei gô đei tơdrong pơmat-tat truh tơ lu bơngai pơm kơnê̆.” (Pơđơ̆k 11:8). Hăm tơdrong noh tơdrong hơnat pat truh kơ bơngai nai, sư athei thoi âu: “Dŏng pơklaih bĕ lu bơngai wă năm lăm trong lôch. Păng dŏng pơklaih bĕ lu bơngai mă đe ba wă pơlôch” (Pơđơ̆k 24:11). Bơ̆n nĕ kơ pơm ưh kơ băt phŏ kơnh bơ̆n gơh hơlĕnh kon bơngai mă lei ưh kơ gơh hơhlĕnh kơ ‘Bok Kei-Dei ôh, Kră Yang gô ba ăn dôm tơdrong kiơ̆ thoi bơ̆n đei pơm (trong 12). Tơdah ih đei ‘mêm mơnat kơ bơngai wă năm lăm tơdrong lôch lei ‘Bok Kei-Dei gô ‘mêm kơ ih. Kră Yang ‘Bok Kei-Dei đei ‘mêm mơnat kơ ih thoi yơ ih kŭm athei ‘mêm mơnat kơ lu nhŏng oh ih thoi noh mơ̆n.
Kơplah Kră Yang Yêsu wă lôch tơ’long pơglang, Kră Yang Yêsu đei khan kơ lu bơngai jơ̆ng ‘bang Sư thoi âu ưh kơ đei bu wă weh wer đơ̆ng tơdrong pơmat tat, mă Kră Yang athei bơ̆n gơnang kơ Sư, yua kơ jơhngơ̆m pran đơ̆ng Kră Yang na yak hlôi. Kră Yang Yêsu đei khan thoi âu: “ Inh roi kơ iĕm dôm tơdrong noh hei wă kơ iĕm chơt hiôk yua kơ iĕm gơnang kơ Inh. Tơ ala teh âu iĕm gô đei tơdrong anat anot. Mă-lei iĕm ‘nĕ kơ sơ’ngon hŏ yua kơ tôm tơdrong ala teh âu thuơ kơ Inh ngăl boih.” (Yôhan 16:33). Tơdrong hơđơ̆ng hiôk hian đơ̆ng ‘Bok Kei-Dei pơkă ăn kơ bơ̆n noh jơ̆ pŭn hiôk mă bơ̆n đei tơ’bơ̆p tơdrong pơmat tat. Lu bơ̆n kăl kơ tơgŭm bơngai mă tơ’bơ̆p tơdrong pơmat tat, lu sư bơih jơ̆ bơngai jê̆ bơ̆n kăl kơ bơ̆n dŏng tơgŭm. Kră Yang Yêsu đei bơtho khan tơdrong ‘nâu thoi âu nhen thoi bơngai Samari mă ‘lơ̆ng dêh đei dŏng tơgŭm bơngai đei tơ’bơ̆p tơdrong pơmat tat sư tơgŭm đĭ jơhngơ̆m, đơ̆ng noh Kră Yang khan kơ ‘bok bơtho khôi juăt thoi âu: “athei năm pơm kiơ̆ thoi noh” (Luka 10:25-37). Rim ‘nu kơ bơ̆n ‘mêm kơ Kră Yang đĭ jơhngơ̆m bơ̆n kŭm ‘mêm kơ bơngai mă tơ’bơ̆p tơdrong pơmat tat.
Kơkuh bơnê kơ Kră Yang, Apinh Ih tơgŭm inh đei đon lui, kơjăp, păng thim ăn kơ inh jơhngơ̆m pran wă kơ inh kĕ yak hlôi đơ̆ng tơ’bơ̆p tơdrong pơmat tat. Apinh Ih tơgŭm gŭm inh ‘mêm păng lăng hiơ̆k dŏng tơgŭm lu bơngai mă đei tơ’bơ̆p tơdrong pơmat tat. Yua anăn Kră Yang Yêsu Krist. Amen.
Lu bơ̆n hăm đei lăng hiơ̆k păng dŏng tơgŭm ‘nhŏng oh bơ̆n kơplah đei tơ’bơ̆p tơdrong pơmat tat ưh?
Đŏk Sơ̆p hla bơar nơ̆r ‘Bok Kei-Dei lăm tơpêng sơnăm: Êsai 59
Kênh Youtube BHKTHN:
