Hơriso 116:12-14
“Inh gô iŏk kiơ wă ‘mong kơ Kră Yang. Gah dôm tơdrong ‘lơ̆ng mă Sư đei pơm kơ inh?”
(Hơriso 116:12)
Nơ̆r jet tơchĕng pơwao:
– Băt bơnê kơ Kră Yang ăn kơ bơ̆n bơngai chih đei jơhngơ̆m thoi yơ?
– Sư tơlĕch ‘bar tơdrong hơđăl ayơ wă tơ’bôh jơhngơ̆m băt bơnê kơ Kră Yang?
– Bơ̆n yua iŏk lu tơdrong âu thoi yơ?
Băt tơdrong hiôk ‘lơ̆ng đơ̆ng Kră Yang ăn, bơngai chih ‘bôh kăl kơ “iŏk kiơ wă ‘mong ăn kơ Kră Yang. Gah dôm tơdrong ‘lơ̆ng mă Sư đei pơm ăn kơ inh”. Tơpă mă bơngai chih dah mă bu bu kư̆m ưh kơ layơ gơh wă ‘mong… gah dôm tơdrong ‘lơ̆ng mă Sư đei pơm kơ inh”, mălei đơ̆ng băt ‘nâu na bơngai chih đei jơhngơ̆m bơnê kơ Kră Yang, păng đơ̆ng lăm jơhngơ̆m băt bơnê kơ Kră Yang jrŭ să, bu lăm bơ̆n kư̆m đei nơ̆r jet thoi noh. Sư tơbăt dôm tơdrong mă gơh pơm wă tơ’bôh jơhngơ̆m băt bơnê.
Mă mônh, tơ’bôh jơhngơ̆m bơnê hăm trong ră roi tơdrong Kră Yang bơih ‘Bok Dŏng Pơklaih. Rup pơtih gia “Pơnhan” lăm trong 13 jơ̆ nơ̆r lăm Pah so juăt kơ yua wă pơma kơ tơdrong ‘bĕnh blai rơkah rơkai, thoi Hơriso 23:5 “Kơchŏk inh ‘bĕnh blai”. “Kơchŏk” bơngai chih chĕp ‘noh “pơnhan dŏng pơklaih”, lăm sơ̆p hla bơar ‘Bok Kei-Dei nơ̆r Hêbrơ noh kơsô̆ lơ “lu tơdrong dŏng pơklaih”, păng hlôh trŏ ‘noh “lu tơdrong dŏng pơklaih”. Đơ̆ng noh, trong 13 gơh hlôh noh: Lăm Anăn Kră Yang ‘Bok Kei-Dei inh gô roi pơdah tơdrong dŏng pơklaih đơ̆ng Kră Yang.
Tơdrong blŭng a tơ’bôh kơ minh ‘nu bơngai băt bơnê kơ Kră Yang noh ră roi Tơdrong ‘Nao ‘Lơ̆ng, pơm kơdranh gah dôm tơdrong pŭn hiôk đơ̆ng Kră Yang, păng roi kơ đe băt gah ‘Bok Kei-Dei ‘lơ̆ng rŏ. Lăm Markôs 4:20-21 pơma kơ minh ‘nu bơngai sơng iŏk Tơdrong ‘Nao ‘Lơ̆ng tơpă gô đei plei noh “Mơ’nah 30, mơ’nah 60, mơ’nah đei plei trem truh tơ 100”, păng Kră Yang Yêsu khan dơ̆ng “bơ̆n tơ̆k ŭnh kơđeng wă kơ hơdah; bơ̆n ưh kơ iŏk rĕo klơ̆p lê̆ dah ‘măn ala rim rôm giơng wă kơ măng mu ôh. Bơ̆n iŏk ŭnh kơ đeng noh tơ’băk tơ jrăng”. Tơdrong bơtho ‘nâu đei ‘bar tơdrong gĭt kăl: Mă mônh, bơ̆n gơh klaih ‘noh wă tơ̆k hơdah păng jing bơngai pơm kơdranh kơ Kră Yang, păng mă ‘bar, roi tơ’bôh Tơdrong ‘Nao ‘Lơ̆ng păng pơm kơdranh gah Kră Yang ‘noh tơbăt minh ‘nu bơngai đei tơdrong dŏng pơklaih tơpă. Bơ̆n ngăl kơ pơma bơ̆n ‘mêm kơ Kră Yang păng băt bơnê kơ Sư, mălei wơ̆t tuch luch bơ̆n roi gah Kră Yang kơ bơngai nai, wơ̆t tuch luch bơ̆n pơm kơdranh gah tơdrong ‘lơ̆ng Kră Yang pơm kơ bơ̆n ‘noh kơplah ayơ? Athei tơ’bôh jơhngơ̆m bơnê hăm tơdrong jang adrin ră roi tơdrong jang Kră Yang Yêsu jơ̆ ‘Bok Dŏng Pơlaih păng pơ̆n nuih pơm kơdranh gah tơdrong pŭn hiôk ‘lơ̆ng rŏ đơ̆ng Kră Yang.
Mă ‘bar, bơngai chih tơ’bôh jơhngơ̆m bơnê hăm trong “Inh gô pơkeh ăn đĭ kơ Kră Yang dôm tơdrong đêl nơ̆r inh pơkă” (trong 14). Kiơ̆ kơ sơ̆p hla bơar ‘Bok Kei-Dei, pơkă hăm Kră Yang ‘noh pơm tơ’bôh tơdrong kơkuh, păng dah băt Tơ’ngla mă bơ̆n kơkuh jơ̆ Yang oei pơgơ̆r tôm tơdrong, Yang sek tơlang tơpăt lei na bơ̆n athei pơ’lơ̆ng hăm tơdrong pơkă. Hăm đei lu nơ̆r pơkă ayơ mă bơ̆n hiơt? Thoi pơkă lăm tơdrong ŭnh om, klo-akăn hli yom kơ Kră Yang păng ‘măn adrol hloh lăm tơdrong pơjing tơdrong arih gah bơhngol ưh? Dah mă nơ̆r pơkă kơplah pơyơ̆r nge, klo-akăn hăm hiơ̆k tơdrong arih gah bơhngol kon hơ’lơ̆p ưh?.v.v…
Kơkuh kơ Ih Kră Yang, apinh Ih tơgŭm kơ inh ling lang ‘blŏk kơ tơdrong pŭn hiôk ‘lơ̆ng mă Kră Yang ăn kơ inh, wă kơ inh băt inh gơh klaih wă pơm kơdranh ăn kơ Kră Yang păng wă kơ inh tơnăp hăm dôm lu nơ̆r đei pơkă. Krao khan yua anăn Kră Yang Yêsu Krist, Amen.
Tơdrong kiơ tơ’bôh bơ̆n ling lang băt bơnê kơ Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 24
Kênh Youtube BHKTHN:
