Rôm 14:1-12
“Gah lu bơngai lui mă ưh tam mă hlôh tôm tơdrong, bơ̆n athei ‘mêm kơ sư mơ̆n. Bơ̆n ‘nĕ kơ pơjah pơjăng tơdrong sư ưh tam mă hlôh noh.” (Rôm 14:1)
Nơ̆r jet tơchĕng pơwao:
– ‘Bok Pôl tơbăt tơdrong đei tơpă liơ lăm Khul bơngai lui?
– Sư krao pơtơm lu sư athei đei jơhngơ̆m đon athei arih sa thoi yơ hăm lu bơngai phara ‘biơ̆ ưh kơ gan kăl?
– Băt kơdih akâu gô dơ̆ng ‘bơ̆t anih sek tơlang gô apoh ‘bơm tơdrong kiơ hăm tơdrong arih bơ̆n?
Lăm Khul Bơngai Lui kơplah ‘noh sơ̆ đei lu bơngai đon lui rơdu, păng kư̆m đei bơngai pơma pơjah pơjăng lăm tơdrong tơchĕng phara ưh kơ ‘bơm tơdrong dŏng pơklaih. ‘Bok Pôl đei tơbăt ăn ‘bai pơtih gia: Mă mônh, gah tơmam sa, bơngai âu khan gơh sa tôm tơdrong, bơngai rơdu đon lui, sa pôm ‘nhot đĕch. Bơngai sa pơma pơdê bơngai ưh kơ sa, bơngai ưh kơ sa sek tơlang bơngai sa (trong 2-3). Mă ‘bar, gah năr; đei bơngai khan năr ‘nâu gĭt hloh kơ năr nai, kư̆m đei bơngai nai khan rim năr lei lăi đĕch (trong 5). Bơngai Juđê oei tơ dêh char Rôm, lu sư oei bơwei khôi juăt kiơ̆ kơ bơngai Juđê lui lăm tơdrong sŏng sa, wei răk năr Sa’bat păng lăm dôm tơdrong pơm giĕng lăm rim sơnăm. Lăm kơplah ‘noh Khul Bơngai Lui tơm sư lui bơngai tơmoi gơh sŏng sa tôm tơdrong tơmam, kư̆m sa dôm lu sem dơrong ưh kơ rơgoh, păng sư khan năr ayơ kư̆m kăl lei lăi thoi lu năr ayơ. Tơdrong ‘noh ưh kơsĭ kơ tơmam sa đĕch ôh, năr ayơ thoi năr ayơ, mălei đei tơdrong pơjah pơjăng dêh, pơdê dih băl, sek tơlang dih băl, jing tơklah ưh pă minh akâu lăm Kră Yang.
‘Bok Pôl bơtho pơlung tơ pôl Khul Bơngai Lui wă kơ hlôh băt gah tơm hmơm păng sơng iŏk dôm tơdrong phara băl hăm tơdrong pơjah pơjăng gah dôm tơdrong phara dih băl (trong 1). “Kơlih kơ thoi noh na iĕm ‘nĕ kơ chu kiơ̆ tơdrong giĕng kon bơngai, mă lu sư hil, lu sư sek tơlang tơdrong iĕm sa et tôm tơdrong tơmam, dah hil kơ iĕm ưh kơ chu oei kiơ̆ tơdrong giĕng lu sư; lê̆ lu sư hil kư̆m bưh, mă giĕng tơdrong kiơ, bơyan kiơ, khei ‘năr kiơ, lu bơ̆n ưh kơ kăl oei kiơ̆ ôh” (Kôlôsse 2:16). Rim ‘nu bơngai kiơ̆ kơ tơdrong tơchĕng phara, kiơ̆ kơ đon lui bơ̆n kơdih păng bơ̆n pơm thoi yơ wă kơ anăn Kră Yang gơh ư-ang (trong 5-8). Lu bơ̆n ưh kơ kăl kơ pôm đon hăm tơdrong hlôh băt bơngai nai, mălei athei pơm tơ’bôh tơdrong ‘mêm păng tơdrong hlôh băt lu bơ̆n hăm lu ‘nhŏng oh bơ̆n đei đon lui rơdu. Rim ‘nu lu bơ̆n ‘nĕ kơ pơm hloi kiơ̆ tơdrong tơchĕng lu bơ̆n. Wă kơ đe nai pơm kiơ̆, mălei athei tơgŭm lu sư wă kơ hlôh băt tơdrong Kră Yang.
Lu bơ̆n ngăl ‘bônh kơ sek tơlang dih băl, mălei lăp minh Kră Yang đĕch sek tơlang. Tơdah Kră Yang ‘lơ̆ng rơgoh ‘bĕnh tơdrong ‘mêm mơnat đei sơng iŏk lu bơ̆n, bơngai yoch yua kơ đon lui lăm Kră Yang Yêsu păng ăn kơ lu sư lui kơjăp lei lu bơ̆n ‘noh bu mă pơ̆n tơplih tang kơ Kră Yang na sek tơlang lu ‘nhŏng oh bơ̆n (trong 3-4). Lu bơ̆n jơ̆ đĭch đam Kră Yang lei lăi băl ngăl. Kăl kơ ‘blŏk, rim ‘nu lu bơ̆n gô dơ̆ng ‘bơ̆t anăp Kră Yang na roi pơdah dôm tơdrong đêl bơ̆n pơm (trong 10-12). Thoi noh rim ‘nu athei gơnang kơ Kră Yang, athei hiơ̆t tơtăm dôm tơdrong kiơ athei pơm wă huay pơjah pơjăm hăm đe nai, păng sek tơlang lu sư.
Ơ Kră Yang! Inh âu bơngai yoch Ih đei sơng iŏk. Apinh Ih tơgŭm inh băt tơchĕng tơdrong tơ’bưh kơjăp hăm Ih, pơih jơhngơ̆m sơng iŏk lu ‘nhŏng oh mă lăm tơdrong tơchĕng phara dih băl, wă kơ pơm keh tơdrong jang mă Ih đei pơjao. Wă kơ anăn Ih jing ưang. Yua anăn Kră Yang Yêsu Krist, Amen.
Lu bơ̆n hăm đei pơgŏ đe nai pơm kiơ̆ kơ bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 8
Kênh Youtube BHKTHN:
