Tơdrong Pơđơ̆k 26:20-22
“Pŭn dêh lu bơngai gơh pơm sơlam kơ đe wă kơ lu sư tơhiôk băl, đe gô jô̆ sư kon ‘Bok Kei-Dei.” (Mathiơ 5:9)
Nơ̆r jet tơchĕng pơwao:
– Lĕch đơ̆ng nơ̆r pơma kơnê̆ gô thoi yơ?
– Bơngai juăt kơ tơ hil, bơngai mă juăt kơ pơma nơ̆r pơma sa kơnê̆ băl gô pơrăm kiơ?
– Bơ̆n kăl kơ pơm kiơ ba ăn tơdrong hiôk hơiă dih băl?
Pơtao Sôlômôn tơlĕch nơ̆r bơtho jrŭ ‘biơ̆: Sư yua nơ̆r thoi tơkuh ‘long lăm ŭnh wă kơ ŭnh jing ngŭr dah thoi iŏk đak chruh lê̆ wă kơ ŭnh păt, kơlih kơ thoi noh rim ‘nu athei hiơ̆k lăm tơdrong yua nơ̆r pơma păng jơhngơ̆m hăm dôm nơ̆r pơma sa kơnê̆ băl.
Mă mônh, dah ưh kơ đei roi sơlam lei tơdrong tơhil pơjah gô pơdơh (trong 20). Ŭnh ưh kơ gơh tơdah ưh kơ đei ‘long ŭnh, tơhil pơjah ưh kơ jah pơdơh tơdah ưh kơ đei bơngai roi sơlam, roi dôm nơ̆r pơma mă tơklah băl. Lăm âu, “Bơngai roi sơlam” ‘noh thoi bơngai tơkuh ŭnh kơ tơdrong ưh kơ hiôk, tơhil pơjah băl. Kơlih kơ thoi noh, trŏ kơ jơ ưh kơ wă pơma noh bơih minh tơdrong gơh hơgei.
Mă ‘bar, bơngai mă juăt kơ chă tơhil băl thoi ‘long ŭnh tơkuh lăm ŭnh jing khơ̆ng (trong 21). Đei bơngai ưh kơ sĭ đe wă tơhil băl đĕch na kư̆m pơrơ̆ng chă tơdrong wă kơ jing tơhil băl. Lu sư ưh kơ ngôi đĕch ôh dah ưh kơ tơhil pơjah băl; lu sư gơh chă tơdrong ưh kơ hiôk đơ̆ng lăp minh ‘bar nơ̆r tơhil, jô̆ jâu dah teh tôn băl. Pơtao Sôlômôn roi kơ lu bơngai ‘nâu nhen thoi ngar soh lăm ŭnh sa jing ngŭr, pơm kơ tơdrong rai tơ tŏ hloh, rai trăp hloh. Tơdrong trŏ kơ krăng ‘noh ưh kơ sĭ dôm tơdrong ưh kơ lăp ‘noh đei kơdih ôh, na noh đơ̆ng kon bơngai chă tơdrong. Minh nơ̆r pơma ưh kơ pơrơ̆ng, lăng ưh kơ trŏ, dah mă chơ chă tơdrong kư̆m gơh jing tơdrong tơhil pơjah băl dah đei “ngar ŭnh” noh lu nơ̆r tơhil păng lu bơngai ưh kơ wei nơ̆r pơma.
Tuch luch, tơdrong pơrăm đơ̆ng nơ̆r pơma sa kơnê̆ băl (trong 22). Minh tơdrong ưh kơ drơ̆ng lăp đon noh nơ̆r pơma sa kơnê̆ băl mơ̆ng hiôk hơiă dêh ră, nhen thoi “tơmam sa ‘lơ̆ng”, jơ̆ tơdrong kon bơngai ‘bônh kơ hyŭr jơhgơ̆m păng ‘bônh kơ lui hloi. Mălei tơdrong hli krê ‘noh dôm lu nơ̆r noh ưh kơ đei kơtơ̆ng păng đon đĕch, na “mơ̆t jrŭ truh tơ klơm klak hloi”, đei ‘bơm kơ tơdrong tơchĕng, jơhngơ̆m mơn păng tơdrong pơm hloi đơ̆ng kon bơngai.
Lăm teh đak kơtơ̆ng đe roi tơdrong jĭ kơ̆l wing măt, păng nơ̆r đe chrih ‘bônh dêh jing kơ̆l tơm kơ tơdrong, bơngai mă băt kơ dơ̆ng hloi ‘bơ̆t doh, wei ‘bơ̆r hơpiĕt ‘noh bơngai mă ba ăn tơdrong hiôk hơiă dih băl. Minh nơ̆r pơma kơnê̆ kơ bơngai bu ‘nei mă khan iĕ ră, gơh jing ưh kơ ngeh, hiong jơhngơ̆m lui ngeh dah mă rai ataih. Đei lơ tơdrong tơ’bưh băl Bơngai Lui, hnam dơnŏ, dah mă khul tơpôl pơm pơchah lê̆ yua kơ đơ̆ng pơma pơ’ngam mălei ‘noh bơih pơrăm. Apinh Kră Yang tơgŭm kơ bơ̆n kơchăng hăm dôm tơdrong “mơ̆ng hiôk hơiă mălei ưh kơ trŏ”. Kăl kơ apinh adrol kơ wă mơ̆ng: “Inh hăm kăl kơ mơ̆ng tơdrong ‘nâu ưh? Tơdrong ‘nâu hăm đei tơgŭm đei yua kơ inh ưh?” athei pơ’lơ̆ng nơ̆r bơ̆n pơma, athei pơma nơ̆r ‘mêm mơnat, ưh kơ mơ̆ng nơ̆r pơma sa kơnê̆ băl păng krao khan apinh Kră Yang ăn kơ bơ̆n jing bơngai “pĭt lê̆ ŭnh” tơplih kơ “soh ŭnh”.
Ơ Kră Yang, apinh Ih ăn kơ inh bơwei ‘bơ̆r hơpiĕt wă kơ inh huay kơ đei nơ̆r pơma pơm kơ bơngai nai ưh kơ hiôk dah soh chhông thim tơdrong ưh kơ hiôk noh. Apinh Ih ăn kơ inh ngăn hreh ưh kơ pơma ‘bơ̆t jơ ưh kơ trŏ kơ pơma, pơ̆n nuih pơma tơdrong trŏ lăm tơdrong ‘mêm. Hơpơi kơ nơ̆r inh pơma ba ăn tơdrong hơđơ̆ng, tơiung păng Anăn Kră Yang gơh ưang. Krao khan yua Anăn Kră Yang Yêsu Krist, Amen.
Bơ̆n oei pơm sơlam kơ đe hiôk hơiă dih băl dah pơm kơ đe jing tơhil băl?
Đŏk Sơ̆p Hla bơar ‘Bok Kei-Dei lăm pêng sơnăm: Thi Thiên 90-91
Kênh Youtube BHKTHN:
