Klei Aê Diê Blŭ: Klei Bi Hriêng 4:3-4
Êlan kliăng: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn” (Klei Bi Hriêng 22:6).
Klei êmuh ksiêm mĭn: Hlei jing pô mtô mjuăt leh mtao Y-Salômôn leh anăn mtô mơ̆ng hbĭl? Ya jing bruă klam kơ amĭ leh anăn ama hlăm bruă mtô mjuăt anak? Si dưi djă pioh leh anăn čuê nanao kơ ênuk êdei anăp klei sĭt suôr mtô mjuăt anak čô? Si klei drei bi êdah klei khăp hlăm bruă mtô mjuăt anak čô drei?
Lu phung amĭ ama kyua kpăk gun đei kơ klei duah prăk kăk mnơ̆ng ƀơ̆ng huă snăn yơh amâo lŏ mđing mĭn ôh klei mtô lač kơ anak. Ƀiădah mtao Y-Salômôn, sa čô thâo mĭn hĭn kơ jih jang (I Bruă Mtao 3:12), yap yuôm êdimi bruă mtô Klei Aê Diê Blŭ hlăm gŏ sang. Ñu lač, dơ̆ng mơ̆ng êjai hđeh êlăk ñu mă tŭ leh klei mtô bi hriăm mơ̆ng ama wăt mơ̆ng amĭ ñu. Mơ̆ng ama jing bhiăn yơh, bi phung mniê ênuk anăn lĕ, amâo dưi hriăm hră mơar ôh leh anăn arăng dlăng kơ digơ̆ hơăi mang mơh, khă snăn dưn amâo djŏ ôh jing klei mơal kơ phung amĭ weh đue ̆ hĕ mơ̆ng bruă klam mtô mjuăt anak ñu. Blŭ mdê, amâo mâo ôh ya mta phŭn knhal dưi mgang hĕ kơ ama leh anăn amĭ hngah kơ bruă klam mtô mjuăt phung anak ñu.
Amĭ ama brei yŏng yưl klei mtô mjuăt anak hŏng klei sĭt suôr leh anăn brei kčưm dơ̆ng mơ̆ng êjai anak adôk hđeh êlăk. Kyuadah klei mtô mjuăt djŏ, srăng bi hmăi hlŏng kơ jih hruê adôk hlăm klei hdĭp phung anak (Klei Bi Hriêng 22:6), leh anăn kyuadah klei mtô bi hriăm Klei Aê Diê Blŭ brei anak “srăng hdĭp” (êlan 4). Mâo 2 boh blŭ brei drei mđing hlăm êlan 3b. Tal êlâo jing “knŏng hjăn sa čô anak.” Mtao Y-Đawit leh anănH’Batsua mâo pă čô anak êkei (I Bruă Mtao 3:5), ƀiădah tinei mtao Y-Salômôn lač ñu jing “hjăn sa čô anak”. Boh nik gơ̆, khă mâo lu anak dưn ƀiădah hlăm ală phung amĭ grăp čô anak ăt jing “hjăn sa čô anak” mơh. Boh blŭ tal dua jing “khăp hơiêng”. Hlăm klei mblang boh blŭ phŭn jing “êdu awăt”. Blŭ mdê, kyua klei khăp, amĭ ama dlăng kơ phung anak ñu adôk êdu awăt nanao năng răng mgang leh anăn khăp hơiêng yơh. Leh anăn klei amĭ ama khăp kơ anak bi êdah jăk hĭn hŏng klei mđing uêñ, sĭt suôr mtô mjuăt anak pô.
Lu phung amĭ ama ênuk anei hmăng kơ duah prăk kăk kyua mĭndah prăk kăk yơh dưi đru rơ̆ng klei hdĭp phung anak hruê êdei anăp. Ƀiădah lĕ, prăk kăk jing mnơ̆ng hruê anei adôk mgi luč mliêt, leh anăn kăn mâo pô dưi thâo rei hruê êdei anăp si srăng jing tơdah knang kơ prăk mah, ƀiădah tơdah sĭt suôr mtô bi hriăm anak Klei Aê Diê Blŭ, atăt ba anak kơ klei thâo săng leh anăn kkuh mpŭ kơ Aê Diê, jing klei arăng amâo dưi plah mă mơ̆ng phung anak drei ôh. Êngao kơ anăn, klei đăo djă pioh ăt lŏ čuê nanao hlŏng kơ ênuk êdei, ba klei bi hmăi prŏng prĭn, msĕ si kơ klei hdĭp Y-Timôthê, khua ƀĭng kna Y-Pôl lač leh: “Kâo hdơr kơ klei ih đăo sĭt suôr. Klei đăo anăn hdĭp leh êlâo hlăm aduôn ih H’Lôis, leh anăn hlăm amĭ ih H’Ônis, leh anăn kâo thâo sĭt ară anei klei đăo anăn ăt hdĭp hlăm ih.” (II Y-Timôthê 1:5). Anăn yơh jing klei rơ̆ng kjăp phĭt kơ phung anak drei “dưi hdĭp” amâo djŏ knŏng êjai ti lăn ala anei ôh ƀiădah wăt kơ ênuk hlŏng lar.
Si ngă drei sĭt suôr hlăm klei mtô mjuăt anak čô mơ̆ng êjai diñu hđeh êlăk mơ̆?
Ơ Khua Yang, akâo kơ Ih đru kâo thâo kral ênoh yuôm mơ̆ng klei bi hriăm Klei Aê Diê Blŭ, leh anăn mkŏ mdơ̆ng klei hdĭp mngăt myang kơ phung anak jing prŏng êdimima, čiăng kơ kâo dôk sĭt suôr wah lač, mtô lač Klei Aê Diê Blŭ, leh anăn hdĭp bi hmô kơ phung anak.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 15:20-16:4
Kênh Youtube BHKTHN:
