II Kauleethaus 2:5-11
Nqe cim
“Yog li ntawd, nej yuav tsum zam txim rau tus ntawd thiab ua tib zoo ntuas nws, nyob tsam nws tej kev nyuaj siab ntawd ua rau nws tso Vajtswv tseg. Yog li ntawd, kuv thov nej ua tib zoo hais rau nws paub hais tias nej hlub nws.” (II Kauleethaus 2:7-8).
Lus nug rau sawvdaws xav:
- Timthawj Paulus ntuas cov ntseeg nyob hauv Pawg Ntseeg Kauleethaus yuav tsum ua dabtsi rau cov neeg uas tau ua txhaum?
- Vim licas nws qhuab ntuas li ntawd ?
- Peb siv zaj kawm no licas rau hauv Pawg Ntseeg?
Timthawj Paulus tau cem cov ntseeg hauv Kauleethaus nyob hauv tsab ntawv xubthawj uas nws sau rau lawv vim lawv tsis paub nyuaj siab thaum pom lwm tus ntseeg ua tej kev txhaum uas loj (I Kauleethaus 5:2). Txog sijhawm no, tej zaum nws pom txog kev tawg paj txi txiv ntawm nws tej lus qhuab ntuas thaum uas cov ntseeg tsis paub nyuaj siab rau cov uas ua txhaum. Timthawj Paulus hais tias tej kev txhaum uas ib txhia ntseeg tau ua tsis yog tsuas ua rau nws nyuaj siab xwb, tiamsis ib feem twg kuj yog ua rau cov ntseeg txhua tus nyuaj siab thiab. Timthawj Paulus hais tias “…Yog leejtwg ua rau ib tug twg nyuaj siab, tsis yog nws ua rau kuv xwb, tiamsis yog nws ua rau nej thiab, qhov uas kuv hais tias leejtwg, twb yog kuv tsis xav hais hnyav rau tus ntawd.” (nqe 5) Timthawj Paulus hais li ntawd vim nws tsis xav kom txhua yam ntxhov dhau.
Nimno, Timthawj Paulus ntuas cov ntseeg txhob poob sijhawm los mus rau txim rau cov uas ua txhaum ntxiv, vim lawv twb paub tseeb thiab nyuaj siab heev rau lawv tej kev txhaum lawm. Tshaj qhov ntawd, nws hais tias “nej cov uas rau txim rau tus ntawd nej twb rau txaus lawm.” (nqe 6). Yam uas cov ntseeg hauv Kauleethaus yuav tsum ua lub sijhawm no yog siv txojkev hlub los zam txim thiab nplig cov uas ua txhaum lub siab, vim “…nyob tsam nws tej kev nyuaj siab ntawd ua rau nws tso Vajtswv tseg” (nqe 7). Qhov tseemceeb yog pab kom tus ua txhaum tig los rau Pawg Ntseeg xwb tsis yog thawb kom tawm hauv Pawg Ntseeg mus. Yog cov ntseeg hauv Kauleethaus tsis ua raws li Timthawj Paulus tej lus qhuab ntuas ces lawv yoojyim poob mus rau dab Ntxwgnyoog lub voj hluas.
Tus Tswv Pawg Ntseeg tsis npog kev txhaum cia. Kev rau txim hauv Pawg Ntseeg yog pab rau kom Pawg Ntseeg dawbhuv thiab pab kom cov neeg ua txhaum paub tig rov qab los. Tiamsis, yog rau txim uas tsis muaj kev zam txim los ntawm txojkev hlub ces yuav ua rau Pawg Ntseeg raug teebmeem, tej zaum yuav ua rau cov uas mus rau txim poob mus rau kev khavtheeb txog lawv lubneej dawbhuv (Kalatias 6:1), thiab tej zaum yuav ua rau tus uas raug txim ntawd nyuaj siab dhau thiab tso tus Tswv tseg. Kev rau txim hauv Pawg Ntseeg yog yam uas cheemtsum tiamsis yuav tsum ua los ntawm lub homphiaj uas yog pab cov ua txhaum rov los sib raug zoo nrog Pawg Ntseeg, tsis yog ua kom lawv khiav tawm hauv Pawg Ntseeg mus. Twb yog vim li ntawd, ua raws li Timthawj Paulus tej lus qhia rau Pawg Ntseeg Kauleethaus thaum ub, tus Tswv Pawg Ntseeg niaj hnub nimno thiab peb txhua tus, yuav tsum sib zam txim hauv txojkev hlub kom peb rov tau peb cov kwvtij thiab tsis raug poob rau dab Ntxwgnyoog lub voj hluas.
Peb puas tau ua qhov uas zam txim rau lwm tus los ntawm txojkev hlub lawm tau?
Thov Vajtswv
Vajtswv! Nyuam yaus ua Koj tsaug vim Koj Txojlus tau ci pom kev, qhuab ntuas nyuam yaus txog kev sib hlub thiab sib zam txim hauv tus Tswv kev hlub kom nyuam yaus lub tsev neeg muaj kev zoo siab txaus nkaus. Amees.
Nyeem Vajluskub peb lub xyoos: Ntawv Nkauj 36:1-37:20
Tshooj Youtube BHKTHN: https://www.youtube.com/c/bhkthn
