I Samuel 12:16-25
“Gah inh, inh ưh kơ pơdơh kơ krao khan kơ iĕm. Wă kơ inh huay kơ pơm yoch hăm Kră Yang.” (I Samuên 12:23a)
Nơ̆r jet tơchĕng pơwao:
– ‘Bok Samuel pơm kiơ bơih wă kơ kon pơlei ‘bôh lu sư kơdih hlôi pơm yoch tih?
– Samuel krao khan tang kon pơlei Kră Yang, sư krao khan hăm jơhngơ̆m thoi yơ?
– Bơ̆n pơhrăm iŏk tơdrong kiơ đơ̆ng kơmĭl Samuel krao khan?
‘Bok Samuel bơ̆jang kơ Kră Yang lăm kon pơlei Isơrael sư chĕp tơdrong jang pơm ‘bok soi, ‘bok khan lê̆ adrol păng ‘bok sek tơlang. Mălei kon pơlei Isơrael wă kơ đei Pơtao pơgơ̆r, sơngah kuă kơ ‘Bok Kei-Dei bơih, pơtao lu sư mă tih hloh. Samuel tơbăt kơ lu sư “đei pơm yoch tih” yua kơ đei apinh ăn minh ‘nu pơtao. ‘Bơ̆t anăp kon pơlei, Samuel krao khan apinh Kră Yang păng sư ăn ‘mi grơ̆m glaih lăm bơyan kĕch yuă. “Đĭ đăng kon pơlei hli tơrơ dêh kơ Kră Yang păng Samuel”. Lu sư athei Samuel krao khan apinh Kră Yang ‘Bok Kei-Dei mơnat ăn kơ tơdrong yoch lu sư wă kơ lu sư huay kơ lôch. Minh ‘măng dơ̆ng, Samuel pơjao kon pơlei Isơrael kơ Kră Yang athei kon pơlei lăng tơ Kră Yang, bơtho lu sư ‘nĕ kơ achăng Kră Yang păng đĭ jơhngơ̆m bơ̆jang kơ sư. Sư tơ’blŏk dơ̆ng kơ kon pơlei Kră Yang thoi âu, Kră Yang ‘Bok Kei-Dei bơih rơih iŏk lu sư pơm kon pơlei Kră Yang lei na Kră Yang ưh kơ đei achăng tŭk lu sư, dah lu sư ưh kơ đei achăng lê̆ Kră Yang.
Pơtrơp dơ̆ng, Samuel khan tơbăt kơ kon pơlei gah jơhngơ̆m tơnăp păng jơhngơ̆m sư adrin krao khan tang lu sư. Mă khan lu sư pơm yoch hăm Kră Yang, sư kư̆m ưh kơ pơdơh krao khan tang lu sư yua kơ noh tơdrong jang Kră Yang pơjao kơ sư. Sư kư̆m bơtho kơ kon pơlei băt “trong ‘lơ̆ng păng tơpăt” wă kơ lu sư hli yom kơ Kră Yang ling lang gô pơm kơ kon pơlei sư. Na tơplơ̆ dơ̆ng, dah lu sư ayăt plơ̆ kơ Kră Yang păng pơm tơdrong kơnê̆ lei na lu sư păng pơtao lu sư gô răm.
Mă khan Samuel ưh kơ drơ̆ng lăp đon hăm tơdrong kon pơlei Isơrael apinh wă kơ đei minh ‘nu pơtao mălei sư oei krao khan tang păng oei bơtho kơ lu sư hơnơ̆ng đĕch. Sư tơnăp tơpă lăm tơdrong jang Kră Yang krao păng pơjao kơ sư, mă khan kon pơlei thoi yơ hĭ. Kră Yang kư̆m wă kơ bơ̆n tơnăp păng adrin krao khan tang bơngai nai (Êphêsô 6:18), păng yua nơ̆r Kră Yang tơgŭm dih băl yak kiơ̆ trong ‘lơ̆ng tơpăt Kră Yang.
Samuel bơih minh ‘nu ‘bok khan lê̆ adrol gah tơdrong krao khan tang kon pơlei Kră Yang. Bơngai chih hla bơar Hơriso kư̆m chih hơđăl sư bơih bơngai krao khan apinh ‘Bok Kei-Dei tang kon pơlei sư (Hơriso 99:6). Mă khan lăm tơdrong arih pơm kơ sư ưh pă ‘maih krao khan tang kơ kon pơlei Kră Yang dơ̆ng, mălei sư oei adrin tơnăp krao khan tang lu sư. Sư ưh kơ đei lăng đơ̆ng kon bơngai dah mă đơ̆ng tơdrong arih na pơm yoch ưh kơ tơnăp hăm Kră Yang lăm tơdrong krao khan. ‘Nâu bơih kơmĭl ‘lơ̆ng wă kơ bơ̆n rok kiơ̆. Kră Yang bơtho kơ bơ̆n athei “krao khan tang kơ lu bơngai mă pơm kơnê̆ kơ bơ̆n” (Mathiơ 5:44). Na lu bơ̆n ‘nhŏng oh lăm hnam dơnŏ Kră Yang tăm, mă khan bơ̆n ưh kơ pôm đon mălei bơ̆n ‘nĕ kơ pơdơh krao khan tơgŭm dih băl.
Kơkuh kơ Kră Yang, kơmĭl đơ̆ng Samuel krao khan đei pơlung kơ inh lăm tơdrong krao khan kơdih păng krao khan tang bơngai nai. Apinh Ih tơgŭm ăn kơ inh adrin tơnăp krao khan tang kơ lu ‘nhŏng mai oh lăm đon lui wă kơ đĭ đăng kơ nhôn wang yak kiơ̆ trong ‘lơ̆ng tơpăt păng bơ̆jang kơ sư. Yua anăn Kră Yang Yêsu Krist, Amen!
Lu bơ̆n hăm đei layơ pơdơh kơ krao khan tang lu ‘nhŏng oh bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 7
Kênh Youtube BHKTHN:
