Klei Aê Diê Blŭ: Klei Bi Hriêng 20:16
Êlan kliăng: “Mgơ̆ng čhiăm ao tơdah ñu rơ̆ng kơ mnuih tue, brei ñu bi mâo mnơ̆ng mgơ̆ng tơdah ñu rơ̆ng kơ mniê êgar.” (Klei Bi Hriêng 20:16).
Klei êmuh ksiêm mĭn: Ya ngă brei phung anak čô Aê Diê răng kơ klei rơ̆ng? Mniê êgar ya čiăng lač? Si ih ngă čiăng bi êdah klei khăp, klei kpă ênô leh anăn klei doh jăk Aê Diê?
Klei Aê Diê Blŭ mtă kơ phung ƀuôn sang Ñu brei răng bi jăk kơ klei rơ̆ng brei nư kơ pô mkăn. Rơ̆ng nư kơ pô riêng gah srăng tuôm hŏng lu klei dleh dlan, tăp năng srăng đuôm nư, tŭ klei bi hêñ mơ̆ng pô drei rơ̆ng brei nư mơh (Klei Bi Hriêng 6:1-5), ƀai hĭn rơ̆ng nư kơ mnuih amâo thâo kral ôh. Sa cô mnuih tơdah rơ̆ng leh nư kơ pô mkăn snăn ñu pô yơh jing pô đuôm nư. Tơdah pô čan amâo lŏ dưi tla ôh, pô brei čan srăng juă nư kơ pô rơ̆ng. Čhiăm ao jing ngăn pô čan yua pioh mgơ̆ng. Kyuanăn tơdah arăng toh čhiăm ao pô čan čiăng mă nư, klei anăn čiăng lač mnuih anăn luč jih dŏ ngăn wăt knuih kơhưm mơh.
Êlan 16b blŭ djŏ kơ klei jhat hĭn mơh tơdah sa cô mnuih “rơ̆ng kơ mniê êgar”. Mniê êgar tinei čiăng lač kơ sa mnuih ti êngao, amâo djŏ găp djuê, mnuih hlăm gŏ sang, amâodah mnuih buôn sang pô ôh. Klei Bi Hriêng 27:13 jing klei mtă msĕ snăn mơh,
“Djă pioh čhiăm ao sa čô tue čiăng ngă klei rơ̆ng, leh anăn brei ñu mâo mnơ̆ng mgơ̆ng mơ̆ng pô rơ̆ng kơ mniê tue.” Snăn yơh, mniê êgar čiăng lač kơ mniê knhông mơh. Klei rơ̆ng kƀah klei răng, rơ̆ng brei amâo djŏ pô srăng bi ƀun pô rơ̆ng, tŭ klei hêñ mlâo, ktrŏ hĭn jing mâo klei soh mơh.
Aê Diê jing Pô bŏ hŏng klei khăp leh anăn pap nanao kơ phung ƀun ƀin. Klei Aê Diê Blŭ mtă kơ phung ƀuôn sang Ñu bi êdah klei khăp hdơ̆ng găp hŏng bruă ngă klă: “Tơdah ih mă čhiăm ao pô riêng gah ih hŏng klei bi kuôl kă, brei ih bi wĭt kơ gơ̆ čhiăm ao anăn êlâo kơ yang hruê lĕ; kyuadah ñu mâo knŏng čhiăm anăn čiăng guôm asei mlei ñu. Ya mnơ̆ng ñu srăng hơô êjai ñu đih? Tơdah ñu srăng ur kơ Kâo, Kâo srăng hmư̆ ñu, kyuadah Kâo thâo pap” (Klei Kbiă 22:26-27). Ƀiădah brei phung anak čô Aê Diê bi êdah klei khăp hŏng klei thâo mĭn, klei kpă ênô leh anăn klei doh jăk Aê Diê. Amâo djŏ ôh kyua klei mplư hŏng asăp êdu êun leh anăn klei mplư hŏng klei kđeh tluh mơ̆ng mniê amâodah êkei snăn “wơr bĭt jih klei ih thâo leh” (Klei Bi Hriêng 19:27), kƀah klei thâo răng hlăm klei yua prăk kăk Aê Diê brei. Brei grăp čô drei sĭt suôr hŏng Klei Aê Diê Blŭ jing Klei blŭ thâo mĭn Aê Diê brei čiăng mâo klei thâo mĭn mơ̆ng Aê Diê, klei răng mgang leh anăn klei ƀuah mơ̆ng Yang Mngăt Jăk đru drei đuĕ kbưi mơ̆ng klei mplư klei soh. Akâo kơ Khua Yang đru drei thâo răng bi jăk kơ knhuah drei dôk dơ̆ng ƀơ̆ng huă čiăng bi êdah klei khăp leh anăn klei doh jăk Aê Diê.
Ya drei ngă čiăng amâo bi mjhua ôh prăk kăk pô mkăn?
Wah lač: Ơ Aê Diê Pô doh jăk leh anăn thâo pap, đru kâo mâo klei thâo mĭn mơ̆ng Ih, thâo răng hlăm klei mĭn, bruă ngă čiăng kơ klei hdĭp kâo bi guh kơang kơ Ih nanao.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 5:17-6:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
