Yausuas 1:6-9
Nqe cim:
“Thaum sawvdaws tuaj ua ke pehawm kuv, yuav tsum muaj neeg nyeem kuv phau Kevcai rau sawvdaws mloog. Koj yuav tsum niaj hnub niaj hmo kawm thiab ua raws li tej lus ntawd, koj tes haujlwm thiaj yuav tiav thiab vammeej” (Yausuas 1:8)
Lus nug xav:
– Yausuas tau tus Tswv txhawb zog yam dabtsi?
– Yausuas yuav tsum ua dabtsi kom tau tej koob hmoov tus Tswv coglus?
– Peb cheemtsum ua dabtsi kom ncaj ncees rau qhov nyeem thiab kawm Vajtswv Txojlus txhua hnub?
Vajtswv paub Yausuas tabtom ntsib ntau yam kev sim siab, txomnyem thaum coj cov neeg Yixalayees mus rau lub tebchaws coglus tseg, yog li cheemtsum muaj tus Tswv txhawb zog. Tus Tswv txhawb Yausuas lub zog hais tias “Koj ua siab tawv qhawv tsis txhob ntshai”. Lo lus txhawb zog no hais mus hais los peb zaug (nqe 6-9). “Ua siab tawv qhawv tsis txhob ntshai” hais qhov muaj zog thiab ua tau siab tawv uas Yausuas yuav tsum muaj. “Ua siab tawv qhawv tsis txhob ntshai” kuj hais txog qhov uas Yausuas yuav tsum ua neeg mloog Vajtswv lus heev dua (nqe 7). Yausuas yuav tau cuab zog khov kho, ua siab tawv qhawv thiab rau siab ntso vim nws yog tus uas Vajtswv siv los coj tus Tswv haivneeg mus nyob lub tebchaws coglus tseg.
Thaum nqua hu Yausuas kom ua siab tawv qhawv tsis txhob ntshai, tus Tswv kuj coglus yuav nrog nraim Yausuas nyob ib yam li uas nrog Mauxes nyob. Tus Tswv twb coglus pub tebchaws thiab txhawb zog. Tiamsis xav kom tej lus uas tus cogtseg muaj tiav, Yausuas yuav tsum mloog tus Tswv lus los ntawm qhov “coj raws li tej kevcai uas kuv tus tubtxib Mauxes muab rau koj lawm” (nqe 7). Yausuas yuav tsum sawv khov kho thiab rau siab ua raws li tej kevcai, tsis tso ib nqe li, tsis txhob mus rau sablaug lossis sabxis, txawm yog yuav mus rau qhov twg los yeej yuav vammeej xwb. Tej lus hais hauv phau kevcai yuav niaj hnub nyeem, kawm thiab ua raws li ntawd (nqe 8).
Ua tib zoo kawm Vajtswv Txojlus txhua hnub yuav ua rau peb paub mloog Nws lus. Thiab thaum ua raws li Nws Txojlus qhia ces kuj yuav tsum muaj qhov rau siab ua txhua yam. Tsis tshawb, tsis kawm tus Tswv Txojlus txhua hnub ces yuav ua li cas paub ua raws! Lub neej sab ntsujplig yog tsis muaj Vajtswv Txojlus ua tej zaub mov yug ces yuav tsis paub hlub Vajtswv thiab tsis xav ua li Nws tej lus qhia.
Tej lus samhwm yuav kawm thiab ua raws li Vajtswv Txojlus tsis yog hais rau Yausuas thiab cov neeg Yixalayees xwb, kuj yog hais rau peb cov ntseeg nimno thiab. Qhov no kuj yog yam uas Vajntxwv Daviv qhia rau nws cov menyuam yuav tsum ua, kom ua tiav feem xyuam tswj teb kav chaw (I Xwmtxheej Vajntxwv 22:13). Phau Ntawv Nkauj 1:1-3 qhia rau peb paub “Cov neeg uas tau koob hmoov yog cov uas… hwm tus Tswv txoj Kevcai thiab kawm txoj kevcai ntawd nruab hnub hmo ntuj… txhua yam uas lawv ua puavleej tiav”. Lub neej haum Vajtswv siab yuav tsum yog lub neej ua raws li Vajtswv Txojlus qhia, nquag kawm thiab nyiam Nws Txojlus. Qhov no yuav ua rau vammeej sab ntsujplig, “tes haujlwm thiaj yuav tiav thiab vammeej” (nqe 8), ua tau tiav raws li qhov uas Vajtswv xav hauv txhua yam haujlwm.
Thov Vajtswv,
Vajtswv, thov Koj pub kom nyuam yaus ncaj ncees, rau siab kawm Vajtswv Txojlus txhua hnub thiab ua raws li Nws Txojlus kom paub ua neej muaj nuj nqis rau tus Tswv thiab ua tiav txhua tes haujlwm, vammeej hauv lub neej nrog tus Tswv mus. Nyuam yaus tuav Tswv Yexus lub npe thov, Amees.
Peb puas ncaj ncees rau kev kawm thiab ua raws li Vajtswv Txojlus hauv peb ua neej txhua hnub?
Nyeem Vajluskub hauv peb lub xyoos: Exekees 21
Kênh Youtube BHKTHN:
