Klei Aê Diê Blŭ: Y-Yôsuê 1:6-9
Êlan kliăng: “Hdruôm hră klei bhiăn anei đăm bi đuĕ kbưi mơ̆ng ƀăng êgei ih ôh, brei ih ksiêm dlăng hruê mlam, snăn kơh ih dưi răng čiăng ngă tui hlue jih klei čih leh hlăm anăn. Snăn ih srăng čăt jing hlăm êlan ih, leh anăn ih srăng mâo klei dưi sĭt” (Y-Yôsuê 1:8)
Klei êmuh ksiêm mĭn: Ya klei Aê Diê bi mđĭ ai Y-Yôsuê? Ya ñu srăng ngă čiăng kơ jih jang klei jăk jĭn Aê Diê ƀuăn leh srăng jing sĭt? Ya drei srăng ngă čiăng kơ drei sĭt suôr dlăng leh anăn hriăm Klei Aê Diê Blŭ grăp hruê?
Aê Diê thâo kơ Y-Yôsuê dôk bi tlă anăp hŏng lu klei dleh dlan, dleh dlan tơdah srăng atăt ba phung Israel mŭt hlăm čar Aê Diê ƀuăn kyuanăn gơ̆ čiăng snăk mâo klei bi mđĭ ai mơ̆ng Ñu. Aê Diê bi mđĭ ai Y-Yôsuê “brei ih jing ktang leh anăn mâo ai tiê jhŏng”. Klei blŭ bi mđĭ ai anei mñă truh kơ tlâo blư̆ (êlan 6-7). “Jing ktang leh anăn mâo ai tiê jhŏng” čiăng lač kơ klei brei Y-Yôsuê mâo klei ktang leh anăn jhŏng. “Jing ktang leh anăn mâo ai tiê jhŏng” ăt blŭ djŏ kơ klei brei ñu gưt kơ Klei Aê Diê Blŭ mơh (êlan 7). Y-Yôsuê srăng jing ktang, mâo klei jhŏng leh anăn ktưn kyuadah ñu jing pô Aê Diê yua čiăng atăt ba phung ƀuôn sang Aê Diê mă dưn Lăn Aê Diê Ƀuăn.
Tơdah mtă brei Y-Yôsuê jing ktang, mâo ai tiê jhŏng, amâo mâo huĭ ôh, Aê Diê ƀuăn srăng dôk mbĭt hŏng ñu msĕ si dôk mbĭt leh hŏng Y-Môis mơh. Aê Diê ƀuăn kơ klei srăng dưn lăn leh anăn klei bi mđĭ ai. Ƀiădah lĕ, čiăng kơ klei Aê Diê ƀuăn srăng jing sĭt, Y-Yôsuê srăng gưt asăp kơ Aê Diê hŏng klei “êjai răng čiăng ngă tui hlue jih jang klei bhiăn Y-Môis dĭng buăl Kâo mtă leh kơ ih” (êlan 7). Y-Yôsuê srăng jing ktang leh anăn răng hŏng jih ai tiê gưt jih kơ klei bhiăn Aê Diê, amâo lui sa klei bhiăn ôh, amâo dưi weh phă hnuă amâodah phă điâo, čiăng kơ grăp anôk ñu nao ñu mâo klei dưi nanao. Jih klei čih hlăm hdruôm hră klei bhiăn srăng dôk hlăm ƀăng êgei ñu, ksiêm mĭn hlăm klei mĭn ñu, leh anăn răng čiăng tui hlue ngă jih klei čih leh hlăm anăn (êlan 8).
Hŏng klei răng ksiêm mĭn Klei Aê Diê Blŭ grăp hruê srăng atăt truh kơ klei gưt kơ Klei Ñu Blŭ. Leh anăn tơdah ngă tui si Klei Aê Diê Blŭ snăn brei mâo klei ktưn mơh čiăng ngă hlue jih jang klei. Tơdah amâo mâo ksiêm leh anăn dlăng Klei Aê Diê Blŭ grăp hruê ôh si dưi răng čiăng tui hlue ngă. Sa čô amâo čiêm rông mngăt ñu pô hŏng Klei Aê Diê Blŭ amâo srăng khăp kơ Khua Yang ôh, kăn čiăng tui hlue ngă Klei Ñu Blŭ rei.
Klei mtă brei ksiêm mĭn leh anăn ngă tui hlue Klei Aê Diê Blŭ amâo djŏ mtă knŏng hjăn kơ Y-Yôsuê ôh ƀiădah mtă wăt kơ phung Israel leh anăn kơ phung đăo drei hruê anei msĕ mơh. Anei mơh jing klei Mtao Đawit bi hriăm brei anak ñu ngă čiăng mâo klei čăt jing hlăm bruă kiă kriê lăn čar (I Klei Yăl Dliê 22:13). Klei Mmuñ Hđăp 1:1-3 brei drei thâo “jăk mơak yơh kơ mnuih…mơak hlăm klei bhiăn Yêhôwa leh anăn dôk mĭn kơ klei bhiăn anăn hruê mlam…, jih klei ñu ngă srăng jing.” Klei hdĭp bi mơak kơ Khua Yang jing klei hdĭp ngă tui si Klei Khua Yang Blŭ hŏng klei hur har ksiêm mĭn, hriăm leh anăn khăp kơ Klei Ñu Blŭ. Hŏng klei anăn srăng mâo klei čăt jing myang, “ih srăng čăt jing hlăm êlan ih, leh anăn ih srăng mâo klei dưi sĭt” (êlan 8), leh anăn jih jang bruă drei ngă srăng jing tui si klei Aê Diê dlăng.
Si ngă drei sĭt suôr hriăm leh anăn ngă tui hlue Klei Aê Diê Blŭ hlăm klei hdĭp grăp hruê mơ̆?
Wah lač: Ơ Khua Yang, đru kâo mâo klei sĭt suôr, ktưn leh anăn hur har hriăm Klei Ih Blŭ grăp hruê leh anăn ngă tui hlue Klei Ih Blŭ čiăng kơ kâo hdĭp mâo klei tŭ dưn kơ Ih, leh anăn mâo klei čăt jing hlăm klei hdĭp tui hlue Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
