Prăk Mah Amâo Mâo Siap Ôh Ƀiădah Phiơr Đuĕ Jih – 26/1/2025

448

Klei Aê Diê Blŭ: Klei Bi Hriêng 23:4-5

Êlan kliăng: “Tơdah ih dlăng kơ klei mdrŏng, nĕ anei ñu đuĕ leh; kyuadah klei mdrŏng mkra siap kơ ñu pô leh anăn msĕ si tlang ñu phiơr đuĕ phă adiê” (Klei Bi Hriêng 23:5)

Klei êmuh ksiêm mĭn: Ya ngă phung ƀuôn sang Aê Diê đăm tuh êyuh čiăng jing mdrŏng ôh? Si ênoh yuôm ngăn drăp ti lăn ala jing êjai leh anăn hơăi mang? Si drei bi mĭn kơ prăk mah leh anăn si ngă yua čiăng bi mơak kơ Aê Diê?

Mtao Salômôn mtô anak dlăng prăk mah knŏng jing mnơ̆ng yua, amâo djŏ jing mta kñăm klei hdĭp anak ôh. Tơdah anak “tŭ klei suăi êmăn” amâodah “tuh êyuh ai tiê, dleh dlan”, kƀĭn ai ktang, klei mĭn hlăm bruă duah prăk mah snăn hlăk jing mdrŏng, anak srăng dưm prăk mah jing mrô sa, dlăng ngăn drăp jing mta kñăm hlăm klei hdĭp, anak nao leh hlăm êlan soh ƀiădah amâo thâo. Aê Diê mtô phung ƀuôn sang brei kriăng: “Hlei pô alah mă bruă bi ƀun ƀin ñu pô, ƀiădah kngan pô kriăng bi mdrŏng” (Klei Bi Hriêng 10:4). Wăt tơdah snăn, tơdah anak mnuih bi mĭn pô mâo prăk kyua ai tiê, klei thâo mĭn pô jing hdĭp amâo hdơr knga kơ Aê Diê, amâodah lŏ mblang jing hngah kơ Aê Diê. Hlăk anăn srăng kyua prăk mah lĕ hlăm klei soh amâodah bi luč klei đăo knang kơ Aê Diê jing ngă soh hŏng Aê Diê.

Boh blŭ “dlăng” mñă kơ klei tluh čiăng amâodah mđing tui duah. Ală lač kơ knuih leh anăn ai tiê anak mnuih, snăn bruă “dlăng kơ klei mdrŏng” brei ƀuh knuih tluh čiăng jing mdrŏng. Khădah snăn boh sĭt brei ƀuh lu phung mdrŏng rai luč pral msĕ si tlang ñu phiơr đuĕ phă adiê. Čĭm tlang phiơr pral, phiơr dlông leh anăn ktang, dleh snăk mâo hlei pô mâo mă hĕ ñu, prăk mah ăt ênưih rai luč leh anăn đuĕ lă lar msĕ snăn mơh.

Khua Yang Yêsu mñă kơ phung ƀuôn sang Ñu đăm mkăm pioh kơ diih pô ôh ngăn drăp yuôm ti lăn ala anei, anôk mâo muôr leh anăn bring bi rai, leh anăn mâo phung mnuih knĕ ƀoh mtih mŭt tlĕ, ƀiădah brei diih mkăm pioh ngăn drăp yuôm hlăm adiê. Kyuadah ti anôk mâo ngăn drăp yuôm ih, tinăn mơh ai tiê ih srăng dôk (Y‑Mathiơ 6:19-21). Prăk mah, ngăn drăp knŏng jing mnơ̆ng, ară anei dôk mgi srăng luč, phung ƀuôn sang Aê Diê đăm ôh tuh êyuh jih ai tiê mkăm pioh ngăn drăp hơăi mang, leh anăn ăt đăm dlăng ôh ngăn drăp jing rup yang đăo knang bi luč hĕ mngăt pô. Mta kñăm drei jing klei hdĭp hlŏng lar, klei mdrŏng dôk lă lar, kyua anăn brei drei akâo kơ Aê Diê đru drei thâo djŏ hnơ̆ng hlăm bruă duah prăk, amâo djŏ ôh kyua prăk mah snăn ngă soh. Tơdah Aê Diê brei kơ drei prăk mah, ngăn drăp, brei jih ai tiê bi mni kơ Aê Diê leh anăn yua ngăn drăp Aê Diê brei čiăng mguôp hlăm bruă hiu hưn Klei Mrâo Mrang Jăk, ba lu mngăt mnuih wĭt hŏng Aê Diê, mbĭt anăn ăt thâo mđing đru kơ gŏ sang leh anăn phung ayŏng amai adei mkăn dôk tuôm hŏng klei dleh dlan hlăm klei hdĭp.

Si klei mĭn drei kơ prăk mah? Si drei yua leh prăk mah kơ klei hdĭp hlŏng lar?

Wah lač: Ơ Khua Yang, kâo bi mni kơ Ih brei leh kơ kâo mâo prăk mah čiăng hdĭp mda. Akâo kơ Ih đru kâo thâo hdơr knga kơ Aê Diê leh anăn đăo knang kơ Ñu čiăng ñĕ kơ klei prăk mah mplư. Akâo kơ Ih đru kâo yua prăk mah Aê Diê brei čiăng mguôp hlăm bruă hiu hưn Klei Mrâo Mrang Jăk leh anăn kah mbha klei khăp kơ lu mnuih. Kâo wah lač hlăm Anăn Khua Yang Yêsu Krist, Amen.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Dlăng Klei Aê Diê Blŭ hlăm tlâo thŭn: II Y-Samuel 21

Kênh Youtube BHKTHN:

https://www.youtube.com/c/bhkthn

Bài trướcNyiaj Txiag Tsis Muaj Tis Ho Txawj Ya – 26/1/2025
Bài tiếp theoTiền Bạc Không Cánh Mà Bay – 26/1/2025