I Timôthê 4:6
“Dah ih bơtho lu bơngai lui tơdrong Yêsu Krist kiơ̆ thoi inh pơkă, lei đe băt kơ tơdrong jang ih âu ‘lơ̆ng dêh păng đe băt kơ ih lui kơjăp tơdrong ‘Bok Kei-Dei khŏm khŏm kư̆m thoi ih lui đơ̆ng blŭng sơ̆ khơ̆ dang ei.” (I Timôthê 4:6)
Nơ̆r jet tơchĕng pơwao:
– ‘Bok Pôl bơtho Timôthê ‘Bok bơtho oei moh tơdrong kiơ?
– Bơ̆n bơngai kon hơ’lơ̆p, lu bơ̆n hŏk iŏk tơdrong kiơ đơ̆ng jơhnơr hơdrol?
– Bơ̆n bơngai ‘bă, lu bơ̆n kăl kơ pơm kiơ wă kơ pơtrơp dơ̆ng lu jơhnơr đơ̆ng rŏng?
Lăm trong Sơ̆p Hla ar ‘Bok Kei-Dei âu, ‘Bok Pôl botho pơtrŭt ‘bok Timôthê, minh ‘nu ‘bok bơtho oei moh, athei mă tơnăp bơtho nơ̆r sĭt tơpăt mă sư đei mơ̆ng păng sơng iŏk bơih. ‘Bok bơtho Timôthê dơ̆ng sơlam ‘bar jơhnơr. Adrol sơ̆, sư đei pơhrăm đơ̆ng ‘Bok pôl, păng dang ei sư pŭ iŏk athei bơtho dơ̆ng kơ bơngai nai. Tơdrong jang ‘bok Timôthê thoi lĕ kơ gơng pơtrơp sơlam đon lui adrol sơ̆ păng tơdrong hơmĕng tơ ning mônh.
‘Bok pôl bơtho pơtrŭt ‘Bok bơtho Timôthê athei “bơtho tơ’bôh tơdrong ‘noh kơ lu ‘nhŏng oh”, wă khan bơtho tơdrong lui trŏ wă kơ bơngai lui băt bơ̆n lui tơdrong kiơ păng gô brŏk tơ yơ, wă kơ kon pơlei Kră Yangwă huay kơ puh kiơ̆ tơdrong lui ưh kơ trŏ jing jrok trong. Tơpă chăl arih ‘bok Timmôrhê păng lu bơngai lui ‘me rong hăm Nơ̆r Kră Yang (trong 6b) păng bơtho dơ̆ng Nơ̆r Kră Yang kơ lu chăl đơ̆ng rŏng. Tơdrong arih rim năr tơchĕng hơlen “tơdrong trŏ ‘lơ̆ng” păng tơchĕng pơwao Nơ̆r kră Yang gô tơgŭm kon pơlei Kră Yang wơ̆ ‘lŏ lăm đon lui păng hlôh băt kơ Kră Yang. ‘Bok Pôl bơtho kon gah bơhngol sư athei “tơgŭm tơdrong jang pơm ‘lơ̆ng” bơtho Nơ̆r mă sư đei pơhrăm bơih rim năr păng hloh kơ ‘noh dơ̆ng athei pơm kiơ̆ hloi Nơ̆r noh.
Dang ei, lăm lơ hnam dơnŏ păng Khul Bơngai Lui tơdrong tơ’bưh sơlam lu jơhnơr rai nhen hloh; phara lăm tơdrong tơchĕng, tơdrong arih dah tơdrong hơpơi wă. Mălei ‘bok Pôl tơ’blŏk kơ lu bơ̆n pôm jơhngơ̆m đon ưh kơsĭ đơ̆ng tơdrong phara băl, mă-lei đơ̆ng tơnăp hăm Nơ̆r Kră Yang. Kơplah lu bơngai pơm ‘bă ‘lŏ kră pơm kơmĭl gah tơdrong ‘lơ̆ng tơpăt, lui yom păng pơm ‘lơ̆ng; păng kơplah lu bơngai oei moh pơm tơ’bôh tơdrong iŏk đon ala păng pơyom, lei na lăm hnam dơnŏ gơh tơklep kơjăp, Khul Lui jing anih kơ rim jơhnơr tơgŭm băl păng tơiung dih băl, đơ̆ng jơhnơr âu truh tơ jơhnơr nai dơ̆ng dĭng truh tơ năr Kră Yang jur.
Rim ‘nu lu bơ̆n mă khan bơ̆n ‘bă pơjing, dah ‘bă gah bơhngol, bơngai chông anhăk, dah bơngai pơgơ̆r, Kră Yang krao lu bơ̆n bơngai mă dơ̆ng sơlam kơ rim jơhnơr. Kră Yang krao lu bơ̆n wă kơ wei rong bơ̆n kơdih hăm Nơ̆r sĭt tơpăt Sư păng bơtho nơ̆r ‘noh hăm tơdrong iŏk đon ala, ‘mêm mơnat păng pơm kơmĭl ‘lơ̆ng. Lăm tơdrong chơchă trong wă kơ rai tơjê̆ hloh tơ lu jơhnơr, tơpă lu bơ̆n jơ̆ bơngai pơm ‘bă, athei pơm kiơ̆ dôm tơdrong kiơ mă lu bơ̆n đei bơtho păng rim năr rai adrin hloh wă kơ tơdrong arih lu bơ̆n trŏ ‘blep hăm tơdrong lui. Apinh Kră Yang ăn kơ lu bơ̆n chu iŏk, ‘me rong đon lui păng pơsư̆ ăn dơ̆ng tơmam gĭt gah bơhngol kơ jơhnơr đơ̆ng rŏng.
Ơ Kră Yang ‘Bă kơpal plĕnh, inh bơnê kơ Ih yua kơ lu bơngai pơm ‘bă pơm ‘bok, pơm thây, bơngai chông anhăk păng bơngai pơgơ̆r gah bơhngol đei chông anhăk inh lăm trong ‘lơ̆ng tơpăt. Apinh tơgŭm inh Ih ‘me rong hăm Nơ̆r Ih păng tơgŭm inh tơnăp bơtho ăn dơ̆ng kơ jơhnơr đơ̆ng rŏng. Yua anăn kră Yang Yêsu Krist, Amen.
Lu bơ̆n hăm đei pơkăm pơkă thoi gơng roh tơ’bưh ‘bar pah, bơtho tơgŭm tơdrong lui, lu ‘bai pơhrăm Nơ̆r Kră Yang đei bơtho păng pơm kơmĭl kơ lu jơhnơr pơtrơp đơ̆ng rŏng dơ̆ng ưh?
Đŏk Hla ar ‘Bok Kei-Dei lăm pêng sơnăm: Hơriso 105.
Kênh Youtube BHKTHN:
https://www.youtube.com/c/bhkthn
