II Lu Pơtao 19:14-19
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao hơdai ‘bai pơhrăm đei kơ̆l ‘bai: Pơtao Hesekia Tơ’bơ̆p Anat Anot Tih kiơ̆ kơ Sơ̆p Hla bơar ‘Bok Kei-Dei II Lu Pơtao 19:14-19.
14 Hesekia đei iŏk kơthơ đơ̆ng ti lu bơngai ăn kơ sư, na sư đŏk. Đơ̆ng noh sư năm tơ hnam akŭm kơkuh kơ Kră Yang, păng pơih kơthơ ei ‘bơ̆t anăp Kră Yang. 15 Hesekia krao khan ‘bơ̆t anăp Kră Yang khan: Ơ Kră Yang ‘Bok Kei-Dei lu bơngai Isơrael! Ih oei kơpơ̆ng lu chêrubim. Lăp minh ‘nu ih đĕch ‘Bok Kei-Dei kơ đĭ-đăng lu dêh char lăm ala teh âu. Ih bơih tơ’ngla mă pơjing plĕnh hăm teh. 16 Ơ Kră Yang apinh Ih pơđêng đon mơ̆ng bĕ. Ơ Kră Yang apinh Ih lar măt lăng nhôn, apinh Ih mơ̆ng bĕ dôm lu nơ̆r mă Senacherip pơma wă pơjăm Kră Yang ‘Bok Kei-Dei mă arih ling lang. 17 “Ơ Kră Yang! Tơpă, lu pơtao đe Asiri pơrăm đĭ lu adrĕch adrung păng pơrăm lu bri seh teh choh lu sư. 18 Klơ̆m lê̆ yang lu sư lăm ŭnh yua kơ ưh kơ trŏ kơ yang ôh, noh jơ̆ tơdrong jang đêl ti kon bơngai pơm hăm ‘long, păng pơm hăm tơmo; yua kơ thoi noh na pơrăm đĭ bơih lu sư. 19 Thoi noh na dang ei, ơ Kră Yang ‘Bok kei-Dei nhôn! Pơklaih nhôn đơ̆ng ti pơtao noh bĕ wă kơ đĭ-đăng dêh char tơ teh âu băt minh ‘nu Ih đĕch Kră Yang ‘Bok Kei-Dei.”
Trong tơm ‘bai pơhrăm ‘nâu:
“Krao apinh Inh bĕ, Inh gô tơl tơwih; Inh gô tơ’bôh ăn kơ ih tơdrong tih jrŭ păng tơnat kơ hlôh, dôm tơdrong mă ih ưh tam mă băt.” (Jêrêmi 33:3)
Nơ̆r jet tơchĕng pơwao:
– Pơtao Hesekia tơ’bơ̆p anat anot kiơ?
– Pơtao pơm liơ păng đei yua thoi yơ?
– Lu bơ̆n pơhrăm iŏk tơdrong kiơ đơ̆ng tơdrong đei jơhngơ̆m krao khan adrol kơ tơdrong anat anot truh thoi Pơtao Hesekia?
Kơkuh kơ đĭ đăng,
Đơ̆ng rŏng kơ pơtao Sôlômôn lôch, dêh char Juđê klah asong jing ‘bar. Mơjĭt adrĕch adrung gah yă nơ̆m tơklah pơjing dêh char Isơrael. ‘Bar adrĕch Juđa păng Bênjamin gah gơal pơjing dêh char Juđa. Pơtao Hesekia jơ̆ pơtao mă mơjĭt ‘bar lăm dêh char Juđa. Pơtao đei ưang khan: “Hesekia gơnang kơ Kră Yang ‘Bok Kei-Dei đe Isơrael; lei na lu pơtao đơ̆ng rŏng kơ sư, dah lăm lu pơtao adrol kơ sư, ưh kơ đei bu thoi sư. Sư oei kơjăp hăm Kră Yang, ưh kơ achăng lê̆ ôh, sư wei răk dôm nơ̆r Kră Yang tơtă ăn kơ Môis.” (II Pơtao 18:5-6). Pơtao tơ jur hŭt lê̆ đĭ lu rup yang, pơjing ming dơ̆ng tơdrong kơkuh kơ Kră Yang tơ hnam akŭm Jêrusalem.
Lăm chăl ei sơ̆, dêh char Asiri jing dêh char mơdrŏng pran, năm blah tơ gar iŏk lơ dêh char nai. Sơnăm mă 14 chăl Pơtao Hesekia, Pơtao Asiri noh jơ̆ Sanchêrip chĕp ba linh năm blah lu pơlei lăm dêh Juđa păng wang dăr pơlei Jêrusalem. Pơtao Sanchêrip chih kơ thơ ăn kơ Pơtao Hesekia athei yơ̆r ti chu thuơ, sư khan Kră Yang kư̆m nhen thoi yang lu teh đak nai, ưh kơ gơh dŏng pơklaih dêh char Juđa klaih đơ̆ng dêh char Asiri.
Dơ̆ng ‘bơ̆t anăp tơdrong anat anot tih thoi noh, Pơtao Hesekia đei pơm kiơ? Adrol hloh, pơtao wơh lu bok khan lê̆ adrol băt păng apinh Sư krao khan. Đơ̆ng noh, pơtao tŏk mơ̆t tơ lăm hnam akŭm Kră Yang bơyar kơ thơ păng krao khan apinh sư. Pơtao lui kơjăp kơ sư, jơ̆ Kră Yang ‘Bok Kei-Dei arih ling lang, Tơ’ngla pơjing đĭ đăng plĕnh teh, chĕp pơyơ̆r đĭ đăng lu yŏng, lu yŏng tơ lăm ala teh đak. Ưh kơ gơh pơtŏ pơting hăm lu rup yang ưh kơ yua kiơ mă đơ̆ng kon bơngai chă pơm. Pơtao krao khan apinh Kră Yang chro ti dŏng pơklaih wă kơ đĭ đăng lu teh đak tơ lăm ala teh đak âu băt lăp minh Kră Yang jơ̆ Kră Yang ‘Bok Kei-Dei sĭt tơpă. Lĕch yua đơ̆ng lăm măng ‘noh, minh ‘nu linh jang đơ̆ng Kră Yang pơlôch 185.000 lu linh lăm kơđông linh Asiri. Pơtao Sanchêrip pơtơm lu linh kơdŭn tơ rŏng wih brŏk. Đơ̆ng năr ‘noh, lăm chăl pơtao Hesekia lăm dêh char Juđa hiôk hian păng mơdrŏng.
Hla bơar Hơ’mon đei tơ’bôh Pơtao Hesekia đĭ chăl arih hli yom kơ Kră Yang, đĭ jơhngơ̆m kơkuh păng bơ̆jang kơ Sư. Kơplah tơ’bơ̆p anat anot tih, pơtao ưh kơ gơnang kơ dih wă pơm, mălei adrol hloh krao chă Kră Yang đơ̆ng ‘bok Êsai ‘bok khan lê̆ adrol, păng kơdih kâu pơtao mơ̆t tơ lăm hnam akŭm krao khan hăm đĭ jơhngơ̆m păng pơyơ̆r pơjao tơdrong anat ăn kơ Kră Yang. Hăm pơtao, tơdrong keh jing păng kĕ jei ưh kơ sĭ gơnang kơ jơhngơ̆m pran lu linh mălei noh đơ̆ng krao khan, kơplah “Kră Yang oei hơdai hăm pơtao, mă tơdrong kiơ pơtao pơm gô keh jing ngăl.” (II Lu pơtao 18:7 BTTHĐ). Tơdrong rih kon pơlei Kră Yang tơ lăm teh đak ưh kơ weh wer đơ̆ng tơdrong anat anot. Lu ayăt kư̆m ling lang răp wă blah lu bơ̆n. Tơdrong kĕ jei đơ̆ng pơtao Hesekia pơtrŭt lu bơ̆n wei jơhngơ̆m đon lui kơjăp lăm Kră Yang, đĭ jơhngơ̆m krao khan, arih pơm kiơ̆ thoi Kră Yang wă rim năr. Kră Yang gô blah tang ăn kơ bơ̆n.
Lu bơ̆n wang pôm đon lăm nơ̆r krao khan,
Ơ Kră Yang, apinh Ih tơgŭm inh kơkuh păng bơ̆jang kơ Ih mă tơnăp. Kơplah tơ’bơ̆p tơdrong pơlong anat anot truh, apinh tơ’bôh kơ inh đơ̆ng lăm Nơ̆r Ih păng tơgŭm inh chơ̆n jơhngơ̆m tơblah lăm tơdrong krao khan. Yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Kơplah tơ’bơ̆p anat anot lăm tơdrong arih, lu bơ̆n gơnang kơdih kâu dah pơjao tơdrong anat anot kơ Kră Yang?
Krao apinh Kră Yang gô tơl tơwih ăn
Anat anot, hli krưp, ưh kơ bơngơ̆t tơtok tơtăm
Kră Yang ăn jơhngơ̆m pran chơ̆n hơđơ̆ng
Adrin krao khan, mơsêh pran Kră Yang ăn.
Đŏk Sơ̆p Hla bơar ‘Bok Kei-Dei lăm pêng sơnăm: Êsai 63
Kênh Youtube BHKTHN:
