Galati 5:19-21
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao hơdai ‘bai pơhăm đei kơ̆l ‘bai: Pơm Kiơ̆ Kơ Sĕch Akar Wă Rơđah Dêh! Kiơ̆ kơ Sơ̆p Hla bơar ‘Bok Kei-Dei Galati 5:19-21.
19 Lu bơngai mă tơchĕng kiơ̆ kơ jơhngơ̆m đon sư kơdih, lu sư pơm tôm tơdrong thoi lu tơ ala âu: Sư ngôi pơyô kư̆ kă, sư ưh kơ gơh wei jơ̆ng ti kơdih; 20 sư oei kơkuh kơ yang so, sư pơm pơjâu chă sol đe; sư kơnam băl tơdrong, sư tôn teh băl, sư tơgar băl, sư hil kơ đe, sư kret, sư kuă kơ jang hơdai đe, sư wă tơklah kiơ̆ tơdrong sư kơdih, 21 sư ‘nhĕng kơ đe, sư suai sik pơm kư̆ kă, sư pơm lơ tơdrong kơnê̆, lơ tơdrong noh nai dơ̆ng. Inh wă pơma dơ̆ng kơ iĕm thoi inh roi boih kơ iĕm sơ̆: Dôm lu bơngai pơm thoi noh ưh kơ gơh oei hơdai tơ dêh char ‘Bok Kei-Dei ôh ning-mônh.
Trong tơm ‘bai pơhrăm ‘nâu:
“Lu bơngai mă tơchĕng kiơ̆ kơ jơhngơ̆m đon sư kơdih, lu sư pơm tôm tơdrong thoi lu tơ ala âu: Sư ngôi pơyô kư̆ kă, sư ưh kơ gơh wei jơ̆ng ti kơdih” (Galati 5:19)
Nơ̆r jet tơchĕng pơwao:
– ‘Bok Pôl chih roi dôm tơdrong kiơ kiơ̆ kơ jơhngơ̆m đon kơdih?
– Yua kơ kiơ sư khan dôm tơdrong pơm âu rơđah dêh?
– Bơ̆n kăl kơ pơm kiơ wă huay kơ huŏng lăm dôm tơdrong kiơ̆ kơ jơhngơ̆m đon kơdih?
Kơkuh kơ đĭ đăng,
Đơ̆ng rŏng kơ pơma gah trong kon bơngai bơ̆n yua iŏk tơdrong rơngei mă bơ̆n đei bơih. ‘Bok Pôl chih roi đei dôm tơdrong ‘bôh hơđăl kiơ̆ kơ jơhngơ̆m đon kơdih. Tơdrong blŭng a, arih kiơ̆ kơ sĕch akar noh jơ̆ druh kiơ̆ kơ jơhngơ̆m ‘maih wă kơdih. Ngôi pơyô kư̆ kă, ưh kơ gơh wei jơ̆ng ti kơdih. Ưh kơ thoi kon bơngai chăl sơ̆ khan gơh pơm kư̆ kă, ‘bok Pôl bơtho khan ngôi pơyô kư̆ kă jơ̆ yoch tih, arih ‘lơ̆ng rơgoh noh jơ̆ tơdrong kơkuh mă Kră Yang lăp đon (Rôm 12:1).
Tơdrong pơm kiơ̆ kơ sĕch akar mă ‘bar noh pơma ‘bơm gah tơdrong kơkuh: Kơkuh kơ yang so, pơm pơjâu chă sol đe. Kơkuh kơ rup yang wă pơma kơkuh kơ dôm tơmam đơ̆ng ‘Bok Kei-Dei pơjing, mă ưh kơkuh kơ Tơ’ngla pơjing. Mă trŏ sư athei kơkuh kơ ‘Bok Kei-Dei păng lăng dôm tơmam noh jơ̆ bơ̆n kăl yua đĕch. Lơ bơngai ưh kơ kơkuh kơ ‘Bok Kei-Dei mălei kơkuh kơ tơmam.
Tơdrong pơm kiơ̆ kơ sĕch akar mă pêng noh pơma ‘bơm gah tơdrong arih bơ̆n hăm bơngai nai: Kơnam băl tơdrong, tôn teh băl, tơgar băl, hil kơ đe, kret, kuă kơ jang hơdai đe, wă tơklah kiơ̆ tơdrong kơdih. ‘Nâu jơ̆ dôm tơdrong pơm mă khôi juăt ưh kơ đei khă, thoi noh bơ̆n ‘bônh kơ lăng hơi. Tuch luch gô ba ăn kơ bơ̆n răm lăm hnam dơnŏ păng khul bơngai lui wă tơklah kiơ̆ trong kơdih, kuă kơ jang hơdai đe! ‘Bok Pôl jô̆ dôm tơdrong noh jơ̆ oei pơm kiơ̆ kơ sĕch akar đơ̆ng rŏng kơ tơdrong yoch kơkuh kơ rup yang.
Tơdrong pơm kiơ̆ kơ sĕch akar mă puăn noh pơma ‘bơm gah tơdrong gơh gơ̆t: Suai sik pơm kư̆ kă, sa dư, suai sik ling lang jơ̆ tơdrong nơ̆r ‘Bok Kei-Dei pơma (Tơdrong Pơđơ̆k 20:1; 23:29-35; Êsai 28:7; Hôsia 4:11). ‘Bok Pôl bơtho: “Bơ̆n ‘nĕ kơ et sik suai hli kơ bơ̆n jing bơngai kư̆ kă… (Êphêsô 5:18). Tơmam sa kăl ăn kơ tơdrong arih, păng jơ̆ tơmam đơ̆ng Kră Yang ăn kơ bơ̆n yua wă kơ bơ̆n hiôk chơt (‘Bok bơtho 5:18). Mălei, sa et hloh kơ ai jơ̆ pơm kiơ̆ kơ jơhngơ̆m đon kơdih đĕch. Mưh hloh kơ ai, mă dôm tơdrong ưh kơ đei khă kư̆m jing yoch mơ̆n.
‘Bok Pôl khan “Lu bơngai mă tơchĕng kiơ̆ kơ jơhngơ̆m đon sư kơdih jơ̆ rơđah dêh” na sư chih roi dôm tơdrong yoch đei pơm, đơ̆ng noh sư pơma dơ̆ng “pơm lơ tơdrong kơnê̆, lơ tơdrong noh nai dơ̆ng.” (trong 21). Mưh bơngai bu yak kiơ̆ Yang Bơhngol ‘Lơ̆ng păng tơchĕng kơ dôm tơdrong Yang Bơhngol ‘Lơ̆ng lăp đon lei bơngai noh gô băt mơn dôm tơdrong mă Yang Bơhngol ‘Lơ̆ng ưh kơ lăp đon. Tơdrong tơ’bưh hăm Kră Yang jơ̆ kăl tơm wă kơ bơ̆n huay kơ arih kiơ̆ kơ jơhngơ̆m đon kơdih.
Tuch luch trong 21, ‘bok Pôl khan bơngai bu pơm thoi noh ưh kơ gơh oei hơdai tơ dêh char ‘Bok Kei-Dei ôh ning mônh. Nơ̆r “Pơm” lăm nơ̆r tơm wă pơma gah tơdrong juăt kơ pơm bơih. Thoi noh, lăm âu sư ưh kơ pơma kơ pơm glăi minh ‘bar ‘măng đĕch ôh, mălei wă pơma kơ tơdrong juăt kơ pơm bơih dôm tơdrong kiơ̆ kơ jơhngơ̆m đon kơdih noh pơm kiơ̆ kơ bơngai so, tam mă tơpŭ ming ‘nao păng ưh kơ tơbral. Apinh Kră Yang tơplih tơdrong arih rim ‘nu lu bơ̆n huay pơm kiơ̆ kơ sĕch akar.
Bơ̆n pôm jơhngơ̆m đon lăm nơ̆r krao khan,
Ơ Yang Bơhngol ‘Lơ̆ng, inh băt kơdih inh rơdu tơrăn, ưh kơ kĕ. Apinh Ih tơgŭm inh yak kiơ̆ Kră Yang rim năr kĕ tŭk lê̆ dôm tơdrong pơm kiơ̆ kơ jơhngơ̆m đon kơdih, ling lang arih kiơ̆ Kră Yang lăp đon. Yua anăn Kră Yang Yêsu Krist, Amen.
Ơ lu bơngai mơ̆ng mă ‘mêm kơeng,
Bơ̆n kăl kơ đei Yang Bơhngol ‘Lơ̆ng tơgŭm bơ̆n tŭk lê̆ dôm tơdrong kiơ mă oei kiơ̆ kơ sĕch akar?
Inh rơdu tơrăn, ưh kơ kĕ
Dah ưh kơ đei Kră Yang, ‘bônh kơ glăi
Đi chăl arih wă yak kiơ̆ Sư
Đei Kră Yang ming hơmet, rim năr ‘lơ̆ng hloh.
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 9
Kênh Youtube BHKTHN:
