II Hơ’mon 31:4-10
“Mă-lei inh bu, păng kon pơlei inh kiơ, na mă gơh đei jơhngơ̆m pơyơ̆r thoi noh? Đĭ đăng dôm tơmam tă kơ đơ̆ng Ih ăn ngăl păng dôm tơmam mă lu nhôn pơyơ̆r ăn kơ Ih noh tă kơ lĕch đơ̆ng ti Ih ngăl.” (I Hơ’mon 29:14)
Nơ̆r jet tơchĕng pơwao:
– Pơtao Hesekia bơtho kơ kon pơlei athei pơm kiơ?
– Kon pơlei pơm kiơ̆ thoi yơ?
– Lu bơ̆n oei pơyơ̆r hăm jơhngơ̆m păng đon tơchĕng thoi yơ?
Đơ̆ng rŏng kơ pơjing ming tơdrong jang hơrĭ hơrĭ lăm lu bơngai awih awăn lăm Hnam Akŭm, pơtao Hesekia pơjing ming tơdrong pơyơ̆r păng tơgŭm ăn tơ lăm Hnam Akŭm. Kơplah pơtao bơtho tơ’bôh kơ kon pơlei tơ pơlei Jêrusalem pơyơ̆r ăn kơ lu ‘bok soi păng lu bơngai Lêwi đĭ jơhngơ̆m bơ̆jang kơ Kră Yang na đei ‘bar khul bơngai pơm hloi. Khul mă minh ‘noh lu “bơngai Isơrael” lăm noh đei lu mơ’nah đơ̆ng gah yă nơ̆m, chĕp ba lu tơmam plei blŭng a, păng tơmam minh lăm mơjĭt lăm tôm tơdrong tơmam “lơ dêh tơpă”. Khul mă ‘bar noh “lu bơngai Isơrael păng bơngai Juđa oei lăm dêh Juđê.” Lu sư pơyơ̆r minh lăm mơjĭt noh jơ̆ lu sem dơrong ‘noh jơ̆ tơmam ‘măn ăn ‘lơ̆ng rơgoh (Jô̆ bơngai 18:19). Kơplah pơma gah tơdrong pơyơ̆r lu đe Isơrael hăm lu kon pơlei Juđa, hla bơar Hơ’mon wă pơma kơ minh jơhngơ̆m đon đĭ đăng kon pơlei Kră Yang. Lu sư pơm đon lăm tơdrong akŭm ‘blŏk Giĕng Năm Brih, jơ âu lu sư minh jơhngơ̆m pơyơ̆r wă ăn kơ lu bơngai awih awăn lăm Hnam Akŭm. Lu sư pơyơ̆r ưh kơ sĭ yua đơ̆ng nơ̆r Kră Yang athei (Lêwi 27:30-32). Mă noh yua kơ lu sư băt bơnê kơ Kră Yang jơ̆ tơm tơdrong pŭn hiôk.
Tơdrong pơyơ̆r đunh ‘biơ̆ mơ̆n đơ̆ng khei mă pêng truh tơ khei mă tơpơh, jơ̆ khei ‘năr ‘bar bơyan đei kĕch yuă iŏk, đơ̆ng rŏng kơ Giĕng Năm Brih tơmam đei pơyơ̆r lơ dêh truh tơ mah proh hơmet minh anih tih dêh. Tơdrong ‘bôh thoi noh, pơtao păng ‘bok soi kuan tih đei nơ̆r kơkuh bơnê kơ Kră Yang ăng sơkat ăn pŭn hiôk kơ kon pơlei. Lu sư kơkuh bơnê kơ Kră Yang yua kơ lu sư băt kơ Kră Yang ăn kơ lu sư na lu sư gơh đei tôm tơdrong thoi noh (I Hơ’mon 29:14). Lu sư sơkat ăn pŭn hiôk kơ kon pơlei wă kơ apinh Kră Yang ling lang ăn pŭn hiôk kơ kon pơlei Kră Yang. ‘Bok soi Asaria roi kơ pơtao khan đơ̆ng năr kon pơlei chĕp ba tơmam tơ Hnam Akŭm na lu ‘bok soi păng bơngai Lêwi đei tôm mah păng oei rơkah rơkai, păng lu sư băt kơ Kră Yang ăn pŭn hiôk kơ kon pơlei Sư na lu sư gơh đei pơyơ̆r lơ thoi noh.
Kon pơlei chăl pơtao Hesekia đei pơyơ̆r lơ dêh tơpă wă yua lăm tơdrong jang Kră Yang yua kơ lu sư băt bơnê kơ Kră Yang. Đunh sơnăm kơkuh kơ rup yang, dang ei wih brŏk tơ Kră Yang păng Kră Yang mơnat ăn, oei hơdai lu sư. Lu sư chơt hiôk dêh păng băt bơnê kơ Kră Yang na pơyơ̆r hăm tơdrong hơmrah. Lu bơ̆n dang ei kư̆m băt bơnê kơ Kră Yang yua kơ Kră Yang mơnat ăn yoch, gơh klaih, păng tôm tơdrong lu bơ̆n đei ‘noh đơ̆ng Kră Yang ăn. Rim ‘nu lu bơ̆n pơhrăm rok kơmĭl tơdrong pơyơ̆r hơmrah đơ̆ng kon pơlei Kră Yang chăl pơtao Hesekia, đĭ jơhngơ̆m pơyơ̆r hơmrah yua kơ băt bơnê kơ Kră Yang lăm tôm tơdrong lu bơ̆n đei thoi kơ jơhngơ̆m pran, jên tơmam… tă kơ đơ̆ng Kră Yang ăn ngăl.
Ơ Kră Yang, bơnê kơ Ih yua kơ Ih ‘mêm dêh kơ inh, dŏng pơklaih inh, păng ăn kơ inh tôm tơdrong. Apinh Ih ăn kơ inh đei jơhngơ̆m wă lăp đon păng tơnăp pơyơ̆r kơ tơdrong jang Ih mă hơmrah păng đei jơhngơ̆m hiôk păng băt bơnê kơ Ih. Yua anăn Kră Yang Yêsu Krist, Amen.
Lu bơ̆n hăm tơnăp pơyơ̆r hơmrah yua băt bơnê kơ Kră Yang ưh?
Đọc Kinh Thánh trong ba năm: Ê-sai 44
Kênh Youtube BHKTHN:
