Mathiơ 5:23-25
“iĕm ‘măn lê̆ tơmam lăm noh, lĕch kơdâu năm pơlung sư ‘mơ̆i, na mơ̆t pơyơ̆r tơmam iĕm noh.” (Mathiơ 5:24)
Nơ̆r jet tơchĕng pơwao:
– Kră Yang Yêsu bơtho tơdrong kiơ gah tơdrong pơhiôk dih băl adrol kơ pơyơ̆r tơmam?
– Tơdrong âu wă tơ’bôh kơ bơ̆n tơdrong kăl tơm tơdrong pơhiôk dih băl ‘noh kiơ?
– Lu bơ̆n gô thoi yơ tơdah lu bơ̆n oei wei rong tơdrong kơnê̆ hăm lu ‘nhŏng oh lu bơ̆n?
Kră Yang bơtho lu kon pơlei Sư athei đĭ jơhngơ̆m adrin pơhiôk hăm bơngai nai adrol kơ bơ̆n wă pơm kiơ, jang kiơ lăm tơdrong lui. Hăm lu bơngai Juđê, tơdrong jang pơyơ̆r tơmam soi tơ kơpal chang nang soi noh jơ̆ minh tơdrong kăl dêh. Mălei kơplah ‘nâu, Kră Yang Yêsu pơma gah tơdrong pơyơ̆r tơmam kăl kơ pơdơh yua kơ pơm adrol hloh noh athei pơhiôk hăm ‘nhŏng oh bơ̆n, athei tĕnh jah hơmet tơdrong đei hơtŭt băl adrol kơ wă pơyơ̆r tơdrong hiôk hian kơ Kră Yang. Tơdah ưh kơ hiôk ‘lơ̆ng hăm đe nai, na liơ khan hiôk ‘lơ̆ng hăm Kră Yang lĕ. Kră Yang Yêsu bơtho ‘lơ̆ng hloh athei jah pơhiôk dih băl hloi dah đei tơdrong glăi yoch athei jah hơdrĭ hloi păng hiôk ‘lơ̆ng păng bơngai mă bơ̆n pơm ưh kơ hiôk hăm sư, kơnh hli kơ lu sư roi tơdrong yoch bơ̆n, ba lu bơ̆n tơ kră sek tơlang păng kơnh lu bơ̆n đe tah tơ hnam phak (trong 25).
Lu bơ̆n ưh kơ gơh rơih pơyơ̆r tơmam kơ Kră Yang na ưh kơ hŭt lê̆ tơdrong ưh kơ hiôk hăm đe nai. Wă kơ oei bơwei hăm Kră Yang, lu bơ̆n kư̆m kăl kơ hơmet tơdrong tơ’bưh hăm bôl buăl mơ̆n. Kon pơlei Kră Yang athei adrin đĭ jơhngơ̆m wă kơ pơhiôk dih băl mă layơ tơdah đei tơdrong ưh kơ hiôk truh lăm tơdrong tơ’bưh thoi yơ, mă kăl dêh noh hăm lu bơngai đei đon lui. ‘Bok Pôl krao pơtơm lăm Hla bơar: “Bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ đăng bơngai.” (Rôm 12:18).
Tơdrong pơhiôk dih băl noh sư hlôi pah to kơ tơdrong mơnat ăn tơdrong yoch. Pơhiôk dih băl pơm ăn jing oei hiôk hian dih băl păng arih hiôk hơiă hăm bơngai nai. Khul bơngai lui athei chĕp wei tơdrong hiôk hian, ‘mêm mơnat păng huay kơ jô̆ yo lăm tôm tơdrong tơ’bưh bơ̆n hăm lu bơngai mă đei đon lui, mă khan đei tơdrong phara ră. ‘Nâu jơ̆ minh tơdrong lăm tơdrong pơlôch gah sĕch akar kơplah lu bơ̆n wei rong tơdrong ưh kơ hiôk hăm bơngai nai, tơdrong noh thoi tơmam bơnhŭl lăm bơ̆n. Tơdrong yoch ba ăn tơdrong pơrăm, mălei kơplah lu bơ̆n chu yom nơ̆r Kră Yang ba ăn tơdrong arih pran kơtang. ‘Bok Pôl bơtho “Thoi noh dang ei bơ̆n ‘nĕ pă jô̆ yo kơ sư, iĕm athei dah pơlung sư đĕch hli kơ sư sơ’ngon rai dêh. Inh bơtho iĕm thoi noh wă kơ sư ‘brơ̆k mơnat băt kơ iĕm ‘mêm kơ sư.” (II Kôrintô 2:7-8 BTTHĐ).
Lu bơ̆n ưh kơ trŏ tơ’bưh hăm Kră Yang kơplah oei wei rong tơdrong ưh kơ hiôk hăm bơngai nai lăm Kră Yang. Tơdrong ‘mêm mơnat păng huay kơ jô̆ yo ‘lơ̆ng hloh kơ tơmam soi. Dôm tơdrong bơ̆n adrin, chu iŏk đon ala wă kơ pơhiôk dih băl ‘noh tơmam soi ‘bâu phu pơyơ̆r kơ Kră Yang. Kră Yang wă kơ lu bơ̆n jing bơngai huay kơ ‘bônh kơ blĕk, jah mơnat ăn tơdrong yoch păng adrin pơhiôk hăm bơngai nai. Athei pơsĭt lăm dôm tơdrong tơ’bưh wă kơ gơh hơmet adrol kơ wă năm ‘bơ̆t anăp Kră Yang wă kơkuh kơ Sư.
Ơ Kră Yang, apinh Ih ‘nĕ jô̆ yo tơdrong yoch inh, yua kơ inh ưh tam mă adrin arih hiôk hơiă hăm bơngai nai. Tơdah inh đei tơdrong ưh kơ hiôk hăm bu ‘noh, apinh Ih tơgŭm inh băt ‘mêm mơnat, pơ̆n nuih gơh pơhiôk hloi hăm đe nai, wă kơ inh gơh năm ‘bơ̆t anăp Ih wă kơkuh kơ Ih. Krao khan Yua anăn Yêsu Krsit, Amen.
Lu bơ̆n hăm oei wei rong tơdrong ưh kơ hiôk hăm bơngai nai ưh? Lu bơ̆n athei jah hơmet thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 24
Kênh Youtube BHKTHN:
