Pajlug 19:8; II Timautes 3:14-15
Nqe cim:
“Tus uas muaj tswvyim kuj yog hlub nws tus kheej, tus uas khaws kev txawj ntse cia yuav vam meej” Pajlug 19:8 (Phau Txhais Tshiab)
“Cia li txaus siab rau koj thiab rau siab kawm kev txawj ntse, thiab cim ntsoov tej uas koj tau kawm lawm cia rau nruab siab koj lubneej thiaj yuav vam meej”
Lus nug rau sawvdaws xav:
- Vajntxwv Xalumoos qhia tej menyuam txog lub tswvyim thiab lawv tus kheej zoo licas?
- Yam muaj nqis uas tus muaj tswvyim yuav tau txais yog dabtsi?
- Yuav ua cas thiaj tau lub tswvyim los ntawm Vajtswv?
- Peb yuav ua licas thiaj qhia tau hais tias, peb hlub peb tus kheej?
Hauv Phau Pajlug, Vajntxwv Xalumoos hais ntau zaug txog lub tswvyim thiab tus kheej sab ntsujplig. Hais txog lub tswvyim, nws qhia txog qhov uas yuav muaj tswvyim hais tias: “Tus uas fwm tus Tswv, tus ntawd thiaj yog tus muaj kev txawj ntse” (Pajlug 1:7). Tom qab ntawd nws qhia ntxiv hais tias: “Tus uas muaj tswvyim kuj yog hlub nws tus kheej” (Pajlug 19:8). Tiamsis, “Tus uas tsis quav ntsej tej lus qhuab qhia kuj yog nws rov saib tsis taus nws… Qhov uas hwm thiab paub ntshai Yawmsaub yog qhov kawm paub tswvyim” (Pajlug 15:32-33a Phau Txhais Tshiab). Thiab hauv Pajlug 19:16, kuj qhia hais tias: “Hwm tus Tswv txoj kevcai koj thiaj yuav muaj sia ua neej nyob ntev”. Yog li ntawd, yuav yog tus muaj tswvyim tiag, tibneeg yuav tsum hwm tus Tswv thiab ua raws li Nws txoj kevcai qhia.
Vajtswv Txojlus ua rau tibneeg txawj totaub txog tus Tswv, nrhiav tau lubneej zoo thiab heev tshaj ntawd yog muaj lub tswvyim uas tus Tswv pub los txais tau kev cawmdim rau tus kheej. Lo lus “hlub tus kheej” tsis yog hais txog kev hlub pub noj pub haus xwb, tiamsis hais txog ib yam kev hlub uas nqhis nqhawv ib yam dabtsi hauv txhua hnub kom tau yam ntawd los ua nws tug. Yog li ntawd, lo lus ntawd yog hais txog tas siab ntsws siv tswvyim uas Vajtswv pub los txais yuav kev cawm tus kheej sab ntsujplig. Timthawj Paulus qhia nws tus tub Timautes hais tias: “Thiab koj yeej paub hais tias txij thaum koj tseem yau, koj yeej kawm Vajtswv Txojlus los lawm. Vajtswv Txojlus pab tau tus uas kawm muaj tswvyim, thiab yog nws los ntseeg Yexus Khetos, nws yuav dim nws lub txim” (II Timautes 3:15). Nyeem thiab kawm Vajluskub yog yam cheemtsum heev, vim yuav pab tau muaj tswvyim los ntawm Vajtswv. Thiab qhov tseemceeb yog tau Vajtswv pub tswvyim, tibneeg thiaj lees paub Vajtswv thiab tau txais kev cawmdim vim los ntseeg tus Cawmseej Yexus.
Tswvyim ntsigtxog tus kheej thiab sab ntsujplig, peb yuav tau nquag nyeem thiab kawm Vajluskub kom tau lub tswvyim uas Vajtswv pub, paub lees kev txhaum thiab tso kev txhaum tseg los lees ntseeg Tswv Yexus thiaj tau txais kev dim txim. “Yog leejtwg tau ib puas tsav yam hauv ntiajteb no los ua nws tug, tiamsis nws txojsia tu lawm, tej ntawd yuav muaj nqis dabtsi rau nws?” (Mathais 16:26). Peb yuav tsum paub hlub txog peb tus kheej, npaj peb tus kheej kom mus txog qhov chaw muaj txojsia ibtxhis, thiab kuj paub hlub cov neeg uas tabtom taug kev mus rau kev puastsuaj. Qhia txog tus Tswv txojkev cawmdim pub rau txhua tus kom lawv kuj tau txais kev cawm dim rau lawv tus kheej.
Thov Vajtswv,
Tus Tswv, nyuam yaus ua Koj tsaug uas muaj Koj txojlus niaj hnub qhia nyuam yaus. Thov pab kom nyuam yaus paub mloog thiab ua raws Koj txojlus, ua neej raws li Koj siabnyiam, saib ntsoov txog kev cawm dim rau nyuam yaus tus kheej thiab lwm tus. Amees.
Peb puas paub hlub peb tus kheej lawm tau ? Peb yuav ua cas thiaj qhia tshwm txog qhov peb hlub peb tus kheej?
Nyeem Vajluskub hauv peb lub xyoos: Exekees 33:21-34:19
Kênh Youtube BHKTHN:
