Rôm 16:21-24
“Timôthê, sư bơngai jang hơdai inh, sư kư̆m đei nơ̆r jet gia iĕm mơ̆n. Na lu đe âu dơ̆ng kư̆m lei-lăi: Lusiu, Jason, Sôssi, lu sư ‘nhŏng oh inh ngăl kư̆m hơdai jet gia iĕm mơ̆n.” (Rôm 16:21)
Nơ̆r jet tơchĕng pơwao:
– Bơngai bu đei chih nơ̆r kơkuh apinh jet gia tuch luch kơ thơ Rôm âu?
– Lu bơ̆n hăm đei ‘bôh tơdrong kiơ đơ̆ng lăm tơdă bơngai đei nơ̆r kơkuh jet gia noh?
– Lu bơ̆n yua iŏk đơ̆ng ‘bai pơhrăm âu thoi yơ lăm tơdrong bơ̆jang kơ ‘Bok Kei-Dei?
‘Bok Pôl chih kơ thơ âu kơplah sư oei tơ minh pôm pơlei lăm dêh Grĕk anăn pơlei noh Kôrintô. Đang kơ bơtho dôm tơdrong lăm tơdrong gĭt kăl lăm tơdrong lui, kơplah wă jê̆ đĭ kơ thơ sư đei chih dơ̆ng, ‘Bok Pôl ‘măn kơ lu bơngai bơ̆jang hơdai hăm sư iŏk nơ̆r noh đei chih pơtruh kơ lu kon Kră Yang tơ pơlei Rôm. Đei tơhngam (8) ‘nu đei chih roi măt thoi âu, Timôthê, Lusiu, Jason, Sôssi,Terruis, Guơs, Êrat păng Kuat.
Đơ̆ng anăn lu bơngai mă Pôl đei nơ̆r kơkuh jet gia wă jê̆ đĭ kơ thơ, lu bơ̆n đei băt bơngai bơ̆jang hơdai Pôl jê̆ lơ bơngai tơpă lu bơngai mă bơ̆n băt yua kơ đei lăm nơ̆r ‘Bok Kei-Dei đei chih mă lei mơnah lu bơ̆n kư̆m ưh kơ băt yua kơ ưh kơ đei chih roi lăm rim kơ thơ ‘bok Pôl. Mă lei lu sư jing bơngai mă đei jơhngơ̆m bơ̆jang jang tơgŭm ‘bok Pôl. Tơhngam ‘nu bơngai mă đei pao roi lăm âu đei pha ra đơ̆ng pơlei lu sư, sơnăm, tơdrong gơh hơgei, tơdrong jang lăm kon pơlei, sơnăm lăm tơdrong lui, lu mơ’nah ‘nhŏng oh hăm Pôl, lu mơ’nah nhen thoi kon lăm tơdrong lui păng mơnah jơ̆ buŏl juăt …Mă lei tơdrong lu sư minh jơhngơ̆m đon tơpă. Lu sư jơ̆ lu bơngai ‘mêm kơ Kră Yang, đei jơhngơ̆m đon ‘maih bơ̆jang kơ Kră Yang, kŭm đei tơdrong tơdŏng tơgŭm kơ Pôl lăm tơdrong ră roi tơdrong ‘Bok Kei-Dei păng pơih dêh char ‘Bok Kei-Dei rai đunh rai să kơ lu bơngai nguaih kơ lu bơngai Israel. Thoi noh, ‘Bok Pôl wă roi biơ̆ kơ anăn lu sư păng đei tơdrong bơnê kơ lu sư yua kơ lu sư adrin bơ̆jang hơdai lăm tơdrong jang Kră Yang.
Lăm tơdrong tơpôl Khul Bơngai Lui dang ei, ưh kơ đei bơngai bu mă bơ̆jang kơ Kră Yang minh ‘nu minh drô̆ na đei tơdrong ‘lơ̆ng hloh gloh loi ôh. Kră Yang dan bơ̆n lăm tơpôl khŭl bơngai lui lăm noh đei pha ra băl lăm lơ tơdrong jang. Kră Yang wă kơ lu bơ̆n năm hơdai lăm tơdrong lui kiơ̆ Sư, păng đei minh jơhngơ̆m đon hơdai lăm tơdrong bơ̆jang kơ Kră Yang, đĭ jơhngơ̆m tơdŏng dih băl kiơ̆ kơ tơdrong gơh hơgei đơ̆ng Kră Yang ăn. Wă kơ gơh pơm tơdrong âu, lu bơ̆n nĕ kơ lăm păng wă pơting dih băl, tơgar dih băl, pơhloh dih băl, mă lei kăl kơ đie minh jơhngơ̆m hơdai lăm minh tơdrong kơnhăm noh jơ̆ bơ̆jang kơ Kră Yang păng dŏng tơgŭm ‘nhŏng oh lăm tơdrong lui. Rim ‘nu kăl kơ gĭt dih băl, chu yom păng băt bơnê dih băl wă kơ Tơpôl Khŭl Bơngai Lui, Lăm rim hnam akŭm, lu grŭp tŏ sĕt păng rim kơ hnam dơnŏ đei tơdrong tŏk wơ̆.
Ơ Kră Yang, Inh bơnê kơ Ih yua kơ Ih đei dan lu bơngai bơ̆jang hơdai hăm inh. Apinh Ih ăn kơ đĭ jơhngơ̆m ‘mêm kơ Ih păng đei nơ̆r pơlung pơ-ư kơ lu bơngai mă bơ̆jang hơdai. Apinh Ih ăn kơ Inh đei minh jơhngơ̆m pôm đon, iŏk đon ala, gĭt dih băl wă hơdai kiơ̆ Kră Yang păng bơ̆jang kơ Kră Yang đei yua. Yua anăn Kră Yang Yêsu Krist, Amen.
Kră Yang đei dan lu bơngai bu lăm chăl arih bơ̆n kiơ̆ Kră Yang păng bơ̆jang kơ Sư? Lu bơ̆n kăl kơ tơplih lăm tơdrong kiơ wă kơ bơ̆jang kơ Kră Yang đei yua hloh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: II Hơ’mon 28
Kênh Youtube BHKTHN:
