Tơdrong Pơđơ̆k 24:28-29
“’Nĕ chă pơm tơdrong kơđei oei sa kơnê̆ hăm rông ‘bôt ih; ‘Nĕ yua ‘bơ̆r nơ̆r pơma pơhlŭ hơlĕnh?” (Tơdrong Pơđơ̆k 24:28).
Nơ̆r jet tơchĕng pơwao:
– Yua kơ kiơ bơngai lui kăl kơ pơma nơ̆r pơsĭt tơpă?
– Kră Yang Yêsu đei pơm kơmĭl kơ lu bơ̆n thoi yơ kơplah đe hiap pơtê̆, jâu tơdrong mă Sư ưh kơ pơm?
– Lu bơ̆n kăl kơ pơm thoi yơ kơplah đei bơngai pơma ưh kơ trŏ wă pơrăm bơ̆n?
Pơtao Salômôn bơtho kon sư kơ dih kăl kơ pơma mă tơpăt. Nơ̆r pơm kơdranh hơlĕnh noh jơ̆ ‘bơm kơ tơdrong juăt mă tơsĭn hăm ‘Bok Kei-Dei (Lĕch đơ̆ng Êgyptơ 20:16). Bơngai pơm kơdranh pơsĭt ‘bơ̆t anăp ‘Bok sek tơlang, ưh kơ gơh yua kơ tơdrong kiơ na pơm kơdranh hơlĕnh pơma ưh kơ tơpăt. Păng ưh kơ gơh yua kơ tơdrong ưh kơ hiôk kiơ na yua ‘bơ̆t anih sek tơlang wă pơma ưh kơ hiôk hăm bơngai mă bơ̆n hơreh. Pơtao Salômôn đei pơma pran thoi âu: ”Nĕ chă pơma: Inh gô pơm kơ sư thoi sư pơm kơ inh; Inh gô pơm ‘mong kiơ̆ tơdrong đêl sư pơm”. (trong 29) mă khan bơ̆n đơ̆ng gơ̆p pơma kơnê̆ bơ̆n lê̆ kơ pơm ‘mong kơ đe, yua kơ pơm ‘mong noh pơm ăn kơ tơdrong ưh kơ hiôk băl rai dêh. Athei lui gơnang păng pơjao kơ Kră Yang mă tơ’ngla sek tơlang tơpăt, Sư gô ling lang kơ dŏng bơngai mă gơ̆p pơm kơnê̆ (lăng Pơđơ̆k 24:15-20). Kiơ̆ kơ Tơdrong Juăt Pah so “Lex talionic” wă khan “măt ‘mong ‘măt” wă kơ pơm kiơ̆ tơdrong juăt kiơ̆ kơ lăm (Lêwi 24:19-20). Mă lei Kră Yang Yêsu đei bơtho ‘nĕ kơ yua kơ Tơdrong Juăt na wă pơm ‘mong mă lei kăl kơ đei arih ‘mêm mơnat mă khan bơngai ayăt kơbơ̆n (Mathiơ 5:38-42).
Nơ̆r pơm kơdranh hơlĕnh gô ba ăn tơdrong sek tơlang glăi. Tơdrong juăt tơdah ưh kơ đei tơpăt lei gô pơrăm bơngai iơ̆m dim, pơm tơpăt na đe sek tơlang ăn kơ lu sư ưh kơ trŏ pơm ăn kơ lu sư trŏ ră tă kơ jing pŭ iŏk tơdrong răm. Pha-ra kơ noh dơ̆ng lu bơngai mă gơh weh đơ̆ng tơdrong gơ̆p ưh kơ sek tơdrong glăI lu sư noh mă lei sư gơweh noh jing rai pơm thim tơdrong glăI mă ưh kơ hli. Kră Yang ‘Bok Kei-Dei ‘mêm păng dŏng bơngai tơpăt, mă lei gô phak bơngai bơngai hơlĕnh pơdăr. Nơ̆r Kră Yang đei khan thoi âu: “Kră Yang areh kơ lu bơngai pơma hơlĕnh pơdăr; Mă-lei Sư lăp đon kơ lu bơngai pơma tơpăt.” (Pơđơ̆k 12:22). Tơdah bơngai jih ‘ma kơ bơ̆n dah ‘nhŏng oh bơ̆n pơma glăI kơ tơdrong bơ̆n, athei pơma tơ’bưh dih băl, mă lei nĕ kơ chă wă pơrăm dih băl. ‘Bok Pêtrôs đei tơ’blŏk lu kon ‘Bok Kei-Dei păng đei tơdrong kơmĭl ‘lơ̆ng đơ̆ng Kră Yang Yêsu: “’Bok Kei-Dei krao iŏk bơ̆n wă kơ bơ̆n iŏk jơhngơ̆m đon dim gơh găt kuă ăn pơm kơnê̆ kơ đe mă khan đe pơm kơnê̆ kơ bơ̆n. Yêsu Krist đei tơdrong gleh pơmat-tat thoi noh mơ̆n sơ̆ yua wă tơgŭm bơ̆n. Mă-lei Sư ưh kơ đei pơm kơnê̆ kơ đe ôh, Sư pơm trong wă kơ bơ̆n rok kiơ̆ Sư. Sư ưh kơ đei pơm minh tơdrong yoch kiơ, păng Sư ưh kơ đei layơ hơlĕnh kơ đe. Đe pơma kơnê̆ kơ Sư, Sư ưh kơ pơma kơnê̆ kơ đe; đe pơm pơmat Sư, mă-lei Sư ưh kơ pơma tơwih kơ đe. Sư gô mơ̆ng kơ ‘Bok Kei-Dei đĕch, yua kơ Sư băt kơ ‘Bok Kei-Dei sek tơlang tơpăt.” (I Pêtrôs 2:21-23)
Lu bơ̆n kăl kơ ling lang pơma tơpăt yua kơ ‘Bă bơ̆n Tơpal Plĕnh ti Sư jơ̆ Kră Yang ‘lơ̆ng Rơgoh păng ‘lơ̆ng tơpăt. Sư wă kơ lu kon ‘Bok Kei-Dei đei chăl arih pŭn hiôk, thoi noh na dah pơma ưh kơ tơpăt, păng dah đei rong tơdrong wă pơm ‘mong dih băl đơ̆ng lăm jơhngơ̆m gô ba ăn kơ bơ̆n hiong tơdrong hơđơ̆ng hiôk păng ưh kơ đei đon lui gơnang kơ Kră Yang.
Ơ Kră Yang, Bơnê kơ Ih đei lôch tang yua kơ tơdrong yoch kon. Apinh ih tơgŭm inh ling lang kơ ‘blŏk inh jơ̆ kon Tơ’ngla ‘Lơ̆ng Rơgoh păng ‘lơ̆ng tơpăt wă kơ inh ling lang gơnang kơ Ih tơngla sek tơlang tơăat păng ling lang kơ pơma ‘lơ̆ng tơpăt.Yua anăn Kră Yang Yêsu Krist. Amen
Lu bơ̆n hăm đĭ jơhngơ̆m pơjao kơ ‘Bok Kei-Dei hăm ling lang kơ pơma tơpăt ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: II Hơ’mon 24
Kênh Youtube BHKTHN:
