Tơdrong Pơđơ̆k 21:21
“Bơngai bu chă tơdrong tơpăt păng băt ‘mêm Gô đei tơdrong arih tơpăt păng đe ư-ang.” (Tơdrog Pơđơ̆k 21:21)
Nơ̆r jet tơchĕng pơwao:
– Nơ̆r Pơđơ̆k ‘nâu tơbăt tơdrong kơkat pŭn hiôk ayơ mă bơngai arih gơh hơgei đei iŏk?
– Tơdrong hơkat pŭn hiôk ‘nâu đei gĭt thoi yơ?
– Nơ̆r Pơđơ̆k ‘nâu tơgŭm kơ bơ̆n băt tơm tơdrong arih ayơ?
Minh nơ̆r pơkă gô đei tơdrong pŭn hiôk đei pêng tơdrong Pơtao Sôlômôn đei pơma ‘bơm noh jơ̆ “tơdrong arih, tơdrong ‘lơ̆ng tơpăt, păng tơdrong pơyom”. Nơ̆r ‘Bok Kei-Dei tơbăt ‘nâu bơih dôm tơdrong gah ‘Bok Kei-Dei păng jơ̆ tơdrong Sư ăn kơ bơngai hli yom kơ Sư (Hơriso 3:1-3; 27:6; 75:4-10; Tơdrong Pơđơ̆k 8:18). Kơlih kơ thoi noh bơ̆n ưh kơ chơ chă na khan gơh đei tơdrong arih, ‘lơ̆ng tơpăt păng pơyom mălei ‘nâu bơih tơdrong đei yua kơplah bơ̆n “chă tơdrong tơpăt păng băt ‘mêm”.
“Chă” wă druh kiơ̆, chơ chă, tơ’bôh minh ‘nu bơngai ‘maih wă, chơ chă, adrin, ưh kơ pơdơh lăm tơdrong pơm kiơ̆ hloi dah mă chă minh tơdrong kiơ, păng lăm âu noh bơih “tơdrong tơpăt păng băt ‘mêm” “Tơdrong tơpăt” noh tơdrong tơpăt gah bơhngol ‘bơ̆t anăp ‘Bok Kei-Dei păng tơdrong tơpăt lăm teh đak ‘bơ̆t anăp kon bơngai. Thoi noh, chă tơdrong tơpăt wă khan chă dôm tơdrong kiơ trŏ lăm măt ‘Bok Kei-Dei, ưh kơ sĭ khan lăm măt kon bơngai đĕch ôh. Na “băt ‘mêm” wă khan ưh kơ hơlĕnh, adrin. Thoi noh, bơngai mă chă jơhngơ̆m băt ‘mêm ‘noh bơngai gơh hơgei đei yua lăm tơdrong ‘mêm, jơ̆ bơngai arih băt ‘mêm. Bơngai “chơ chă tơdrong tơpăt păng băt ‘mêm” lei na gô đei pŭn hiôk yua kơ ‘nâu bơih nơ̆r tơtă păng ‘Bok Kei-Dei wă: “Ơ kon bơngai: Tơdrong mă Kră Yang wă kơ ih pơm ‘lơ̆ng tơpăt, wă kơ đei tơdrong ‘mêm mơnat păng yak năm hăm jơhngơ̆m iơ̆m dim, pơyom kơ ‘Bok Kei-Dei ưh?” (Mika 6:8).
Đei minh tơdrong kăl, bơngai hơgei “chă tơdrong tơpăt păng băt ‘mêm”. Wă khan druh kiơ̆ tơdrong arih kiơ̆ nơ̆r Kră Yang bơtho păng ‘mêm lei na gơh đei “tơdrong arih, tơdrong tơpăt, păng pơyom”. Pơma pha ‘biơ̆, bơngai chă “tơdrong tơpăt” gô đei “tơdrong tơpăt” păng hloh kơ noh dơ̆ng, lu sư kư̆m đei iŏk “tơdrong arih …păng pơyom”. Bơngai “chă tơdrong tơpăt păng băt ‘mêm” gô chă ‘bôh lơ hloh dôm tơdrong kiơ lu sư hơpơi. Bơngai noh tơchĕng dêh gah khôi juăt Kră Yang, chă tơdrong tơpăt, tơplih, lu sư chă ‘bôh tơdrong tơpăt, hăm tơdrong ‘lơ̆ng rŏ păng tơdrong arih. Ưh kơ đei kiơ hlĭch kơplah druh kiơ̆ tơdrong tơpăt păng băt ‘mêm ba ăn dôm tơmam apah tih thoi noh yua kơ bơngai druh kiơ̆ dôm tơdrong gĭt ‘Bok Kei-Dei gô đei apah thoi nơ̆r Kră Yang pơkă: “Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” (Mathiơ 6:33).
Dang ei, Kră Yang Yêsu ăn kơ bơ̆n tơdrong tơpăt, tơdrong arih păng pơyom đơ̆ng tơdrong dŏng pơklaih, bơ̆n kăl kơ pơm tơwih hăm tơdrong tih Kră Yang ăn hăm tơdrong arih tơpăt păng băt ‘mêm.
Lu bơ̆n pôm đon lăm tơdrong krao khan,
Ơ Kră Yang, inh bơnê kơ Ih đei ăn kơ inh dôm tơdrong pŭn hiôk đơ̆ng Kră Yang Yêsu, apinh tơgŭm inh rim năr arih băt ‘mêm păng tơpăt hăm lu bơngai jum dăr kơ inh wă kơ đơ̆ng tơdrong noh na tơ’bôh tơdrong ‘lơ̆ng rŏ Sư. Krao khan yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Bơ̆n đei hlôi mơn pơkă nơ̆r gô đei pŭn hiôk ‘nâu thoi yơ?
Bu chă tơdrong tơpăt
Băt kơ ‘Bok Kei-Dei ăn pŭn hiôk, bơhngol hơdah
Chă bĕ dêh char ‘Bok Kei-Dei ling lang
Gô chơt hiôk ling lang đĭ chăl arih lăm Yang ‘Bă.
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 119:57-120
Kênh Youtube BHKTHN:
