I Pêtrôs 4:15-19
“Mă-lei dah bu đei tơdrong gleh yua kơ sư kiơ̆ Yêsu Krist, bơngai noh thoi lĕ kơ pŭn, bơngai noh hiôk, sư huay kơ mơlâu kơ đe ôh. Sư athei adrin ră-roi pơư pơang kơ đe tơdrong Yêsu Krist hăm ‘Bok Kei-Dei rai pran hloh.” (I Pêtrôs 4:16)
Nơ̆r jet tơchĕng pơwao:
– Bơngai Lui gơh đei tơ’bơ̆p hăm tơdrong mơlâu ayơ păng yua kơ kiơ?
– Tơdrong kơdơ̆ mơlâu noh ba truh tơdrong kiơ?
– Yua kơ kiơ Bơngai Lui ưh kơ kơdơ̆ mơlâu yua kơ anăn Kră Yang?
– Lu bơ̆n gô arih thoi yơ wă kơ huay kơ kơdơ̆ mơlâu yua kơ anăn Kră Yang?
Lơ bơngai chă đon tôm tơdrong wă kơ wer weh đơ̆ng tơdrong pơmat tat, kư̆m đei bơngai kơplah đei tơdrong mă lei athei rơih iŏk, kư̆m đei bơngai sơngah tơdrong lui. Mă-lei kư̆m đei bơngai kơplah đei pơmat tat đei kơdơ̆ mơlâu yua kơ anăn Kră Yang, lu sư pơma jŏk, “Trŏ kơ inh chu iŏk pơmat tat yua kơ inh Bơngai Lui”. Mă-lei tơpă sư, tơm sư lăm tơdrong arih sa lu sư noh tơm kăl sư ba truh kơ tơdrong pơmat tat mă lu sư đei tơ’bơ̆p. Yua thoi noh, ‘Bok Pêtrôs pơlung Bơngai Lui, “Thoi noh na bơ̆n ‘nĕ kơ pơlôch đe, ‘nĕ kơ tơtông, ‘nĕ kơ pơm kơnê̆, ‘nĕ kơ pơm pơhloh kơ tơdrong jang đe” (trong 15). Bơngai chu iŏk pơmat tat yua kơ pơm dôm tơdrong glăi sư kơdih lei ưh kơ đei ư-ang anăn Kră Yang păng kơdih kâu sư đe gô pơma pơjăm. Lăm chăl ‘Bok Pêtrôs chih kơthơ âu, đei lơ bơngai pơm đĭch, đei bơngai dơnuh hin pơmat tat păng lơ bơngai Juđê wih lui kơ Kră Yang Yêsu. Lu sư chu iŏk đe pơm kơnê̆, pơma pơjăm pơjuă đơ̆ng lu bơngai Rôm kơplah lu sư “jing bơngai lui kơ Yêsu Krist” wă khan jing Bơngai Lui tơpă kơ Yêsu Krist. Chăl ei sơ̆, krao minh ‘nu khan Bơngai Lui kơ Yêsu Krist noh wă khan wă pơjăm bơngai ‘noh. ‘Bok Pôl pơlung lu ‘nhŏng oh mă’mêm kơeng ‘nĕ kơdơ̆ mơlâu yua kơ anăn Kră Yang, mă-lei athei ư-ang kơ ‘Bok Kei-Dei “na lu jơ̆ng ‘bang Yêsu lĕch đơ̆ng hnam sek tơlang ei, lu sư hiôk jơhngơ̆m yua kơ ‘Bok Kei-Dei ăn kơ lu sư pŭ anat yua kơ anăn Yêsu” (Tơdrong Jang 5:41). ‘Bok Pôl đei pơma tơpă, sư ưh kơ mơlâu kơ đe yua kơ bơtho Todrong ‘Nao ‘Lơ̆ng “Tơdrong ‘noh tơbăt ăn kơ bơ̆n ‘Bok Kei-Dei mơsêh mơyang tơpă pơklaih bơ̆n đơ̆ng tơdrong yoch” (Rôm 1:16). Noh nai dơ̆ng, tơdrong mă Kră Yang wă kơ kon pơlei Sưchu iŏk pơmat tat tơ ala teh âu wă kơ ôp rơgoh lăm chăl arih păng wă kơ hơmet tơdrong lui rim ‘nu Bơngai Lui, ‘noh jơ̆ lu bơngai mă oei lăm Hnam Kră Yang ‘Bok Kei-Dei wă khan Khul Bơngai Lui kơ Sư. Yua kơ chăl sek tơlang gô truh, tơdrong Kră Yang ‘Bok Kei-Dei sek tơlang lăm năr ei kơnh, hăm tơdrong gô tuh ăn tơdrong hil mĭl krưp dêh kơ lu bơngai sơngah kơ Tơdrong ‘Nao ‘Lơ̆ng Sư ( trong 17).
Wă huay kơ mơlâu yua kơ Anăn Kră Yang, rim ‘nu Bơngai Lui kăl kơ gơnang kơ jơhngơ̆m pran đơ̆ng Kră Yang weh ataih đơ̆ng tơdrong yoch, ưh kơ wă pơm dôm tơdrong yoch glăi. Rim năr krao chă kiơ̆ thoi Kră Yang wă đơ̆ng lăm Sơ̆p Hla ar ‘Bok Kei-Dei wă kơ arih pơm kiơ̆ Nơ̆r Kră Yang bơtho, wei kơjăp đon lui, kĕ hlôi đơ̆ng tơdrong pơlong, anat anot. Tơplih kơ pơma chrih jŏk kơ Kră Yang, lu bơ̆n kăl kơ băt kơ chu iŏk pơmat yua kơ Anăn Kră Yang păng Kră Yang gô apah bơnê kơ lu bơngai chu pơmat tat yua kơ Anăn Sư.
Ơ Kră Yang, inh bơnê ư-ang kơ Ih ling-lang ưh kơ layơ tôch, apinh Ih thim jơhngơ̆m pran păng tơgŭm inh băt kơ Ih ăn tơdrong pơlong, anat anot truh wă ôp rơgoh păng hơmet ming đon lui inh. Apinh tơgŭm inh wă huay kơ mơlâu mă-lei nuih pơ̆n, wă ư-ang kơ Anăn Ih lăm dôm tơdrong truh. Krao khan yua anăn Kră Yang Yêsu Krist, Amen.
Lu bơ̆n hăm ‘bôh tơdrong hiôk chơt yua kơ jing bơngai lui kơ ‘Bok Krist ưh?
Đŏk Sơ̆p Hla ar ‘Bok Kei-Dei lăm pêng sơnăm: Galati 2
Kênh Youtube BHKTHN:
